"އަޅުގަނޑުމެން 2018ގައި ބެލީ ރައީސް ޞާލިހު ކުރައްވަނީ ހެޔޮވެރިކަމެއްތޯ, އަނިޔާވެރި ވެރިކަމެއްތޯ"

2018 ވަނަ އަހަރުގެ އިންތިޚާބަށް ފަހު އެމްޑީއޭ ހަމަހިމޭނުން ތިބީ ނޫން ކަމަށާ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ވެރިކަން ހަވާލުކުރުމަށްފަހު އެމަނިކުފާނު ކުރައްވަނީ ހެޔޮވެރިކަމެއްތޯ ނޫނީ އެމަނިކުފާނު ކުރައްވަނީ އަނިޔާވެރި ވެރިކަމެއްތޯ ބަލަމުން ގެންދިޔައިީ ކަމަށް މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ޑެޕިއުޓީ ލީޑަރު އަލީ މައުރޫފް ވިދާޅުވެއްޖެއެވެ.

މިއަދު ގުރައިދޫގައި އެމްޑީޕީން ބޭއްވި ކެމްޕެއިން ޖަލްސާގައި ވާހަކަދައްކަވަމުން، މައުރޫފު ވަނީ އިދިކޮޅު ޕީޕީއެމަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ވިދާޅުވީ، ޕީޕީއެމްއާއެކު ކޯލިޝަން ހެދުމުގެ ހިތި ތަޖުރިބާ އެމްޑީއޭއަށް ލިބިފައިވާކަމަށެވެ. އެހެންނަމަވެސް ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި ކޯލިޝަނުގައި ދެމިއޮތީ އެމްޑީއޭގެ ވެރިން ހުރަގެއަށް ލައިފާނެ ކަމުގެ ބިރާއި، ރާއްޖޭގެ ރައްޔިތުންނަށް ލިބިދާނެ ގެއްލުމަކަށް ބެލުމަށްފަހު ކަމަށެވެ.

މިއާއެކު މައުރޫފު ވަނީ ޕީޕީއެމްގެ ވެރިކަން ނިމި، 2018 ވަނަ އަހަރު، ރައީސް ޞާލިހު ވެރިކަމާއި ހަވާލުވެ ވަޑައިގެންނެވި ފަހުން ކަންކަން ރަނގަޅު ވެގެން ދިޔަ ކަމަށެވެ.

ރާއްޖޭގެ ރައީސްއަކީ މިއަދު ޓޫރިޒަމް ދާއިރާއަށް އެންމެ ބޮޑު އިންވެސްޓެއް ކުރައްވާފައިވާ ބޭފުޅާ. ދެބިލިއަން ޑޮލަރު އިންވެސްޓް އެބަހުރި. އަޅުގަނޑުމެން ޕީޕީއެމްއާއެކު ކޯލިޝަން ހަދާ 2018ގަ ހުއްޓިގެން ދިޔައީ ކީއްވެގެންތޯ؟ އަޅުގަނޑުމެން އެދޭ ކަންތައްތައް ނޫން ސިޔާސީ ވެރިން ހުރަގެއަށް ލުމަކީ. އަޅުގަނޑުމެން އެދޭ ކަމެއް ނޫން އދ.އާ ގުޅުން ކަނޑާލުމަކީ. އަޅުގަނޑުމެން އެދޭ ކަންތައްތަކެއް ނޫން ޔޫރަޕިއަން ޔޫނިއަނާ އޮތް ގާތްކަން ދުރުވެގެން ދިއުމަކީ. އަޅުގަނޑުމެން އެދޭ ކަމެއް ނޫން ކޮމަންވެލްތުން ވަކިވެގެން ދިއުމަކީ. މިހުރިހާ ސަބަބުތަކާހުރެ މިއަދު މިތިބީ އެމްޑީޕީއާއެކު.

އެމްޑީއޭގެ ޑެޕިއުޓީ ލީޑަރު އަލީ މައުރޫފް

މިއާއެކު މައުރޫފު ވިދާޅުވީ، 2018 ވަނަ އިންތިހާބަށްފަހު، އެ ޕާޓީ ހިމޭނުން އޮތީ ނޫން ކަމަށެވެ. އެހެނެއް ކަމަކު އޭރު އެ ޕާޓީން ބަލަމުން ދިޔައީ، އެ އަހަރު ވެރިކަމާއި ހަވާލުވެ ވަޑައިގެންނެވި ރައީސް ޞާލިހު ކުރައްވަނީ ކޮން ކަހަލަ ވެރިކަމެއްތޯ ކަމަށްވެސް މައުރޫފު ވިދާޅުވި އެވެ.

2018ގަ ހަމަހިމޭނުން ތިބީއެއް ނޫން. ރައީސްއާ ވެރިކަން ހަވާލުކުރުމަށްފަހު އެމަނިކުފާނު ކުރައްވަނީ ހެޔޮވެރިކަމެއްތޯ ނޫނީ އެމަނިކުފާނު ކުރައްވަނީ އަނިޔާވެރި ވެރިކަމެއްތޯ ބަލަމުން ގެންދިޔައިން. ފެނިގެން ދިޔައީ ރާއްޖޭގެ އިގްތިސާދު ބިނާކުރައްވާ، ރާއްޖޭގެ އެއްވެސް ސިޔާސީ ބޭފުޅަކު ޖަލަށް ނުލައްވާ، ވިޔަފާރިވެރިންނަށް އެއްވެސް ދައްޗެއް ނުކުރައްވާ އެމަނިކުފާނު ވެރިކަން ނިންމަވަމުންދާތަން. އެހެންވީމަ ދެވަނަ ދައުރަކަށް ރައީސް ނޫން ޗޮއިސްއެއް އޮތް ކަމަށް ގަބޫލެއް ނުކުރަން.

އެމްޑީއޭގެ ޑެޕިއުޓީ ލީޑަރު އަލީ މައުރޫފް

މީގެ އިތުރުން މައުރޫފް ވިދާޅުވީ، މިއަހަރުގެ ރިޔާސީ އިންތިހާބުގައި ވެސް، ޕީޕީއެމްއިން ކޯލިޝަން ހެދުމަށް ދައުވަތު ލިބިވަޑައިގަތް ކަމަށެވެ. އެގޮތުން ކުރެވުނު މަޝްވަރާގެ ތެރެއިން ޕީޕީއެމްގެ ރިޔާސީ ކެންޑިޑޭޓަކީ ކޮބައިތޯ ސުވާލުކުރެއްވުމުން, އެއީ ރައީސް ޔާމީން ކަމަށް ދެންނެވުމުން އެކަމުން ދުރުވެވަޑައިގަތީ ކަމަށެވެ. އަދި ޕީޕީއެމަކީ ކަރަންޓީނު ކުރަންޖެހޭ ޕާޓީއެއް ކަމަށްވެސް އޭނާ ވިދާޅުވި އެވެ.

މިއަދު އަޅުގަނޑު ދަންނަވާނީ، ކަރަންޓީން ކުރަންޖެހޭ ޕާޓީއެކޭ ޕީޕީއެމްއަކީ. އެއީ ކުރީ ޒަމާނުގަ ވެސް ތޯއޫނު ބަލި އުފެދިއްޖެއްޔާ އެބައިމީހުންނާ އެއްވެސް ބަޔަކު ކައިރިއެއް ނުވާނެ. އެހެންވީމަ މިއަދު ސިޔާސީގޮތުން އަޅުގަނޑު ބުނާނީ އެއްވެސް ބަޔަކު ޕީޕީއެމްއަކާ ކައިރިނުވާނޭ.

އެމްޑީއޭގެ ޑެޕިއުޓީ ލީޑަރު އަލީ މައުރޫފް

މައުރޫފު ވިދާޅުވީ، އެ ޕާޓީން ޕީޕީއެމާ އެކު ކުރި ހިތި ތަޖުރިބާއަށްފަހު، މިހާރު އެމްޑީޕީއާއި އެކު ތިބި ކަމަށާ، މި ފަހަރުގެ އިންތިހާބު އެ އެމްޑީޕީީން ކާމިޔާބު ކުރާނީ އެއްބުރުން ކަމަށެވެ.