މާފުށީގެ ރައްޔިތުންނަށް ރައީސް ޞާލިހުގެ ވައުދުތަކެއް!

ރައީސުލްހުމްހޫރިއްޔާ އިބްރާހިމް މުހައްމަދު ޞާލިހު ކ. މާފުށީގެ ރައްޔިތުންނަށްޓަކައި ވައުދުތަކެއް ވެއްޖެއެވެ.

ރައީސް ޞާލިހާއި އެމަނިކުފާނަށް ތާއީދު ކުރައްވާ މެމްބަރުން ވަނީ ކެމްޕެއިން ކުރުމަށް މިރޭ މާފުށްޓަށް ވަޑައިގެންފައެވެ.

އަދި އެ ރަށުގައި އޮތް ރަސްމިއްޔާތުގައި ވާހަކަފުޅު ދައްކަވަމުން ރައީސް ޞާލިހު ވަނީ އެމަނިކުފާނުގެ ރިޔާސީ ވައުދުތައް ފުއްދުމުގެ މަސައްކަތް ނިމުމަކާ ހަމައަށް އައިސްފައިވާ ކަމަށް ފާހަގަކުރައްވާފައެވެ.

އެގޮތުން މާފުށީގެ ބިން އިތުރުކުރުމުގެ މަޝްރޫއަކާއި ޕިކްނިކް އައިލެންޑެއް ރައްޔިތުން އެދުން ގޮތަށް ހަދައިދެއްވާ، އެދެރަށް ގުޅުވުމުގެ މަަސައްކަތް ކުރިއަށް ދާކަމަށް ރައީސް ޞާލިހު ވަނީ ފާހަގަކުރައްވާފައެވެ.

އަދި ބަނދަރުގެ ދަތިކަން ފިލުވުމަށްޓަކައި މިހާރަށްވުރެ ފުރިހަމަ ބަނދަރެއް ތަރައްގީ ކުރުމުގެ މަސައްކަތްތައް ކުރިއަށް ގެންދާ ކަމަށް ރައީސް ޞާލިހު ވަނީ ފާހަގަކުރައްވާފައެވެ.

މިއާއިއެކު މާފުށީގެ ސިއްހީ މަރުކަޒަކީ އެމަނިކުފާނު ވެރިކަމަށް އައިއިރު ނަމަކަށް އޮތް ތަނެއް ކަމަށް ފާހަގަކުރައްވާ އޭރު ނުލިބުނު އެތައް ޚިދުމަތެއް މިހާރު ސިއްހީ މަރުކަޒުން ލިބިގެންދާނެ ކަމަށް ރައީސް ޞާލިހު ވިދާޅުވިއެވެ.

އަދި އެވަރުން ނިންމާނުލާ އެރަށުގެ ސިއްހީ މަރުކަޒު ހޮސްޕިޓަލަކަށް ބަދަލުކޮށްފައިވާ ކަމަށާއި އެތަނަށް ބޭނުންވާ އިތުރު ވަސީލަތްތައް ހޯދާ ގާއިމުކުރުމުގެ މަސައްކަތް ކުރިއަށް ގެންދާ ކަމަށް އެމަނިކުފާނު ވަނީ ފާހަގަކުރައްވާފައެވެ.

"މާފުށްޓައް އިތުރަށް ކޮށްދޭންޖެހޭ ކަންތައްތަކެއް އެބަ ހުރި." ރައީސް ޞާލިހު ވިދާޅުވިއެވެ.

މީގެ ތެރޭގައި ރަށު ރައްޔިތުން އެދޭގޮތަށް ރަށުގެ ބޮޑު މަގު ހަދައިދިނުމުގެ އިތުރުން ބަނދަރު ނިންމުމުގެ މަސައްކަތްވެސް ހިމެނޭ ކަމަށް ރައީސް ޞާލިހު ވިދާޅުވިއެވެ.

"ދެން މާފުށީގައި އަޅުގަނޑުމެން ފަށާނެ މަސައްކަތަކީ މާފުށީގެ ރައްޔިތުން އެދޭ ގޮތަށް މާފުށީގެ ބޮޑެތި މަގުތައް ހެދުމުގެ މަސައްކަތް. މި ބަނދަރު ނިމިގެން ދާއިރުގައި މި ސަރަހައްދުގައި ރަނގަޅު ފެރީ ޓާމިނަލްއަކާއި އެރައިވަލް ޖެޓީއެއް މި ޒަމާނުގެ ފެންވަރަށް އިރާދަކުރެއްވިއްޔާ އަޅުގަނޑުމެން ގާއިމު ކުރާނަން."

ރައީސް ޞާލިހު

މީގެ އިތުރުން މާފުށީގެ ހިއްކި ބިމުގައި ފެނާއި ނަރުދަމާގެ މަސައްކަތް ކޮށް ސިއްހީ މަރުކަޒުގެ ޚިދުމަތް އިތުރަށް ފުރިހަމަ ކޮށްދޭނެ ކަމަށްވެސް ރައީސް ޞާލިހު ވައުދުވިއެވެ.

"ހިއްކި ބިމުގަ ފެނާއި ނަރުދަމާގެ ނިޒާމް އިރާދަކުރެއްވިއްޔާ އަޅުގަނޑުމެން ގާއިމު ކޮށްދީ އެތަނުގައި ބޯހިޔާވަހިކަން، ގެދޮރު އިމާރާތް ކުރަމުންދާއިރުގައި އެ ވަސީލަތްތައް އެގެދޮރަށް ލިބޭނެ ގޮތް އަޅުގަނޑުމެން ހަމަ ޖައްސަދޭނަން. ކުރިންވެސް ދެންނެވި ފަދައިން މާފުށީ ހޮސްޕިޓަލަކީ ފެންވަރު ރަނގަޅު ޚިދުމަތްތައް ލިބިގެންދާ ހޮސްޕިޓަލަކަށް އަޅުގަނޑުމެން ބަދަލުކޮށްދޭނަން."

ރައީސް ޞާލިހު