ތިން ޑޮކްޓަރުން ޤާސިމަށް ބައިއަތު ހިއްޕަވައިފި

މިއަހަރުގެ ރިޔާސީ އިންތިޚާބުގައި ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހީމަށް ތާއީދު ކުރައްވައި ކުރީގެ ސަރުކާރުތަކުގެ ވަރަށް އިސް މަގާމްތަކެއް ފުރުއްވާފައިވާ ތިން ޑޮކްޓަރުން ޖުމްހޫރީ ޕާޓީއަށް މިރޭ ސޮއިކުރައްވައިފިއެވެ.

މިރޭ ޤާސިމަށް ބައިއަތު ހިއްޕެވި ތިން ބޭފުޅުންނަކީ ކުރީގެ ރައީސް ޑޮކްޓަރ މުހައްމަދު ވަހީދާއި ރައީސް އަބްދުﷲ ޔާމީންގެ ސަރުކާރުގެ ފިޝަރީޒް މިނިސްޓަރ ޑޮކްޓަރ ޝައިނީއާއި ރައީސް ވަހީދު ސަރުކާރުގައި ރައީސް އޮފީހުގައި އިސް މަގާމެއް އަދާކުރެއްވި ޑޮކްޓަރ މުހައްމަދު އަލީއެވެ. ރައީސް ވަހީދުގެ ދަރިކަލުން ޖެފްރީ ސާލިމް ވަހީދުވެސް ޖުމްހޫރީ ޕާޓީއަށް މިރޭ ސޮއިކުރެއްވިއެވެ.

ޖުމްހޫރީ ޕާޓީން މިރޭ ޤާސިމް އިބްރާހީމްގެ ރަށް މާމިގިލީގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް މުހައްމަދު ވަހީދު ވިދާޅުވީ ދިވެހި ރާއްޖެއަށް ކުރިއަށް އަންނަން މިއޮތް ދަތި ދުވަސްތަކުގައި ގައުމު ސަލާމަތުގެ އައްސޭރިއަށް ގެންދެވޭނެވަރުގެ ތަޖުރިބާއާއާއި ގާބިލްކަން ހުރި ހަމައެކަނި ކެންޑިޑޭޓުކަމަށް އެމަނިކުފާނަށް ފެނިވަޑައިގަތީ ޤާސިމް އިބްރާހީމް ކަމަށެވެ.

އެމަނިކުފާނު ސަރުކާރު ހިންގެވިއިރު ރާއްޖޭގެ އެއަރޕޯޓް ޖީއެމްއާރު އަތުން އަތުލުމަށް ކުރި މަސައްކަތުގައި އެންމެ ބޮޑު އެހީތެރިކަމެއް ވެދެއްވީ ގާސިމްކަމަށްވެސް ވިދާޅުވިއެވެ.

ދިވެހި ދައުލަތަށް އެންމެ ބޮޑު އާމްދަނީއެއް ލިބެމުންދިޔަތަނަކީ އެއަރޕޯޓްކަމަށާއި ދިވެހި ރާއްޖެއަށް ގަންނަ ތެޔޮފޮދު ގަންނަނީ އެތަނުން ލިބެމުންދިޔަ އެއްޗަކުންކަމަށްވެފައި އެތަން ޖީއެމްއާރުގެ އަތްމައްޗަށް ދޫކޮށްލުމުން ދިވެހި ސަރުކާރަށްޖެހުނީ ސަރުކާރަށް އާމްދަނީއެއް ލިބުމުގެ ބަދަލުގައި ޖީއެމްއާރަށް އަހަރަކު ހަތްމިލިޔަން ޑޮލަރު ދައްކަދައްކައި ތިބެންކަމަށް ވިދާޅުވިއެވެ.

އެއަރޕޯޓް އަލުން ހޯދުމުގައި އެހެންމެ ބޮޑު އެހީތެރިކަމެއް ދެއްވީ ޤާސިމް ކަަމަށާއި ރާއްޖޭގެ ދުސްތޫރީ ނިޒާމަށް ގެނެވުނު ބޮޑު ބަދަލުގެ އެންމެބޮޑު ހިއްސާދާރަކީ ޤާސިމް ކަމަށްވެސް ވިދާޅުވިއެވެ.

އެހެންވީމާ އެހެންޕާޓީތަކަށްބަލާއިރު އެއްވެސް ތަޖުރިބާއެއްނެތް ބޭފުޅެއްގެ އަތްމައްޗަށް ގައުމުގެ އިގްތިސާދު ހަމަޔަކަށް އަޅުވަން ދޫކޮށްލައްވަންވީތޯ ސުވާލުކުރައްވަމުން ވަހީދު ވިދާޅުވީ ޤާސިމް ރައީސްކަމަށް ވަޑައިގަންނަވަން މިހާރުވެސް މާ ލަސްވެއްޖެކަމުގައެވެ.