ޅޮހީ ސިއްޚީ މަރުކަޒުގެ ޚިދްމަތް 24 ގަޑިއިރަށް ހަދައި ލެބޯޓްރީގެ ޚިދްމަތް ފަށާނަން: ރައީސް ޞާލިޙް

ނ ޅޮހީގެ ރައްޔިތުން އެދުނީ ސިއްޚީ މަރުކަޒުގެ ޚިދްމަތް ހަދަން ކަމަށާއި ނަމަވެސް ދެން އަންނަދައުރެއްގައި 24 ގަޑިއިރު ޚިދްމަތްދީ ލެބޯޓްރީގެ ޚިދްމަތްވެސް ނިންމައިފައިވާ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ  ނ.އަތޮޅަށް ކުރައްވަމުން ގެންދަވާ ކެމްޕޭނު ދަތުރު ފުޅުގައި އެއަތޮޅު ޅޮއްސައި ވަޑައިގެން އެރަށު ރައްޔިތުންނާއި ބައްދަލު ކުރައްވައި ވާހަކަފުޅު ދައްކަވަމުންނެވެ.

ރައީސް ވިދާޅުވީ އެހެން ކެންޑިޑޭޓުންގެ ސިޔާސަތުތަކާއި ޚިލާފަށް އެމަނިކުފާނުގެ ސިޔާސަތަކީ ތަފާތު ކުރުމެއް ނެތި އަސާސީ ޚިދްމަތްތައް ފޯރުކޮށްދިނުން ކަމަށެވެ.

"މުޅި ރާއްޖެއެކީ ވިއުގަޔަކުން ގުޅާލުން، އެއީ ދަތުރުފަތުރުގެ ނިޒާމަކުން ގުޅާލުމަކީ އެއީ އަޅުގަނޑުމެން ވީ ވަޢުދެއް، ކަނޑު މަގުންނާއި ވައިގެ މަގުން ދަތުރުކުރެވޭނެ ފަސޭހަ ގޮތްތަކެއް ހޯދައި ދިނުން އެއީ އަޅުގަނޑުމެންގެ އެއް ވަޢުދު، އެގޮތުން އާރްޓީއެލްގެ ޚިދްމަތް ބޮޑުތިލަދުން މަތީގައި ފެށި މިހާރު ހުވަދު އަތޮޅުގައިވެސް  ފެށިގެން ކުރިއަށް އެދަނީ، ދެން އިރާދަކުރެއްވިއްޔާ އެ ޚިދްމަތް އަންނާނީ ނ. އަތޮޅަށް، މިހާރު ވަނީ އެކަމަސް ބޭނުންވާ ލޯންޗުފަހަރު އުޅަނދުފަހަރު ބަނުނަށް ކޮންޓްރެކްޓް ކުރެވިފަ، އަޅުގަނޑުމެންގެ އުންމީދަކީ ކުރިއަށް އޮތް ދެތިން މަސްތެރޭގައި، މިއަހަރު ނިމުމުގެ ކުރިން މިއަތޮޅުގައި އެ މަޝްރޫޢު، އެޚިދްމަތް ފެށިގެން ދިޔުން"

ރައީސް އިބްރާހިމް މުޙައްމަދު ޞާލިޙް

އަދި އޭރުން ހީނުކުރާ ފަދަ ކުރިއެރުންތަކެއް ރަށްތަކުން ފެންނާނެ ކަމަށް ރައީސް ވިދާޅުވިއެވެ.

ނ ޅޮއްސަށް ޚާއްސަކޮށް ކޮށްދެއްވަން ވަޢުދުވާ ކަންތައްތަކެއް އެބަހުރި ކަމަށް ވިދާޅުވެ ވާހަކަފުޅު ކުރިއަށް ގެންދަވަމުން ރައީސް ވިދާޅުވީ ޅޮހީގެ ގިރާ ސަރަހައްދު ހިމާޔަތް ކޮށް ޓޫރިސްޓުން މޫދަށް އެރުމަށް ވަކި ބީޗެއް ހަދައިދެއްވާނެ ކަމަށެވެ.

މިއާއި އެކު ޅޮހީގެ ރައްޔިތުން އެދިފައި އޮތީ 8 ގަޑިއިރަށް ޚިދްމަތް ދެމުންދާ ސިއްޚީ މަރުކަޒުގެ ޚިދްމަތް 16 ގަޑިއިރަށް ހަދައިދިނުމަށް ކަމަށާއި ނަމަވެސް މިހާރު ނިންމާފައިވަނީ ދެންއަންނަ ދައުރެއްގައި އެ މަރުކަޒުގެ ޚިދްމަތް 24 ގަޑިއިރަށް ހަދައި އެތަނުގައި ލެބޯޓްރީގެ ޚިދްމަތްވެސް ދިނުމަށް ކަމަށް ރައީސްގެ ވާހަކަފުޅުގައި ވިދާޅުވިއެވެ.

މީގެއިތުން އެރަށު ސްކޫލަށް ބޭނުންވެފައިވާ މަލްޓިޕާޕަސް ހޯލް އަޅުއްވައިދެއްވައި ސްކޫލްގައި ރިސޯސް ރޫމްތައް އަޅައިދެއްވައި ރަށު ކައުންސިލް އިދާރާއާއި ޒުވާނުންނަށް ޚާއްސަ ޔޫތް ސެންޓަރެއް އަޅުއްވައިދެއްވާނެ ކަމަށް ރައީސް ވިދާޅުވިއެވެ.

ރައީސް ޞާލިޙް ނ އަތޮޅަށް ކުރައްވަމުން މިގެންދަވާ ދަތުރުފުޅުގައި އިއްޔެވެސް ވަނީ އެއަތޮޅުގެ ފަސް ރަށަކަށް ވަޑައިގެންފައެވެ. މިއަދު ދަތުރު ފެއްޓެވީ ނ ޅޮހިންނެވެ.