ޤަވާއިދުން މުސާރަ ލިބޭއިރު މަޖިލީހަށް މެންބަރުން ހާޒިރުނުވާތީ ރައީސް ނަޝީދުގެ ނުރުހުން!

ގަވާއިދުން މުސާރަ ލިބޭއިރު ރައްޔިތުންގެ މަޖިލީހުގެ މެންބަރުން މަޖިލީހަށް ހާޒިރުނުވާތީ ރައްޔޮތުންގެ މަޖިލީހުގެ ރައީސް މުހައްމަދު ނަޝީދު ނުރުހުން ފައުޅުކޮށްފިއެވެ.

މިހާރު ކުރިއަށްދާ ރައްޔިތުންގެ މަޖިލީހުގެ ތިންވަނަ ދައުރުގެ 12 ވަނަ ޖަލްސާ ފައްޓަވަމުން ދެއްކެވި ވާހަކަފުޅުގައި ރައީސް ނަޝީދު ވަނީ މިއަދު މަޖިލީހުގެ ޖަލްސާ ފެށުނުއިރު މަޖިލީހުގެ ތަޅުމުގައި ހާޒިރުވެވަޑައިގެން ތިއްބެވީ އެންމެ 24 މެންބަރުން ކަން ފާހަގަކުރައްވާފައެވެ.

ރައްޔިތުންގެ މަޖިލީހަކީ 87 އިދާރީ ދާއިރާގެ މައްޗަށް އެކުލެވޭ މަޖިލީހެއް ކަމަށްވާއިރު މަޖިލިސް މެންބަރުންގެ ތެރެއިން މިއަދުު ސަލާމުގައި ތިއްބެވީ 6 މެންބަރުންނެވެ. އަދި ރަސްމީ ދަތުރުފުޅުގައި 3 މެންބަރުން ތިއްބެވި ކަމަށާ، އެ މެންބަރުންނަކީ މަޖިލީހުގެ ޖަލްސާއަށް ވަޑައިނުގެންނެވޭ ހާލަތުގައި ތިއްބެވި ބޭފުޅުން ކަމުގައިވެސް ނަޝީދު ވިދާޅުވިއެވެ.

އެހެންނަމަވެސް މަޖިލީހުގެ ޖަލްސާ ފެށިގެންދާއިރު މަޖިލީހުގައި 24 މެންބަރުން ތިބުމަކީ، މަޖިލީހުގެ މެންބަރުންނަށް އެކަށީގެންވާ ގޮތެއްގައި މެންބަރުންގެ ޤާނޫނީ ވާޖިބަށް ފަރުވާނުބެހެއްޓެވުން ކަމަށް ރައީސް ނަޝީދު ވިދާޅުވިއެވެ.

"އެހެންނަމަވެސް 87 މެންބަރުންގެ މަޖިލީހެއްގައި އަދި ޤަވާއިދުން މުސާރަ ލިބޭ މަޖިލީހެއްގައި ހެނދުނުގެ ޖަލްސާ ފެށޭއިރުގައި 24 މެންބަރުން ތިބުމަކީ އަޅުގަނޑު ދެކޭ ގޮތުގައި އަޅުގަނޑުމެންގެ ޤާނޫނީ ވާޖިބަށް އަޅުގަނޑުމެންނަށް ފަރުވާތެރިކަން ނުބެހެއްޓެނީ،" ރައީސް ނަޝީދު ވިދާޅުވިއެވެ.

ރައްޔިތުންގެ މަޖިލީހުގެ ޖަލްސާތަކަށް މެންބަރުން ހާޒިރު ނުވާ މައްސަލަ އަކީ އާއްމުންގެ ފާޑުކިޔުންވެސް ވަރަށް ބޮޑަށް އަމާޒުވާ މައްސަލައެކެވެ. އެގޮތުން ރައްޔިތުންގެ ފައިސާއިން ބޮޑު މުސާރަ ނަގައިގެން ތިބޭއިރު މަޖިލީހަށް ހާޒިރު ނުވާއިރުވެސް މުސާރައިން އުނި ނުވާތީވެސް އާއްމުންގެ ފާޑުކިޔުންތައް އަންނަނީ އަމާޒުވަމުންނެވެ.