ފެމިލީ ކޯޓުގެ އިސް ގާޒީއަކަށް މާހިރު

ފެމިލީ ކޯޓުގެ އިސް ގާޒީގެ މަގާމަށް, އިބްރާހިމް މާހިރު އައްޔަންކުރަން ޖުޑިޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.

ޖޭއެސްސީ އިން ބުނީ، އިސް ގާޒީ އަކަށް މާހިރު އައްޔަން ކުރަން ނިންމީ، އެ މަގާމަށް ކުރިމަތިލީ ގާޒީންނާ އިންޓަވިއު ކުރުމަށް ފަހު ފަނޑިޔާރުން އައްޔަން ކުރުމަށް ކޮމިޝަނަށް ލަފާ ދިނުމަށް އޮންނަ ކޮމިޓީން އެ ގޮތަށް ލަފާ ދިނުމުންނެވެ. ޖޭއެސްސީީން އެ ނިންމުން ނިންމީ މިމަހުގެ ފަސްވަނަ ދުވަހު އެވެ. މާހިރަށް މަގާމުގެ ފަތްކޮޅު ހަވާލުކުރާނީ އަންނަ ހަފްތާގަ އެވެ.

އެ ކޯޓުގެ އިސް ގާޒީގެ މަގާމު ހުސްވީ އެ މަގާމުގައި ކުރިން ހުންނެވި ހުޒައިފާ މުހައްމަދު މިދިޔަ ޖޫން މަހުގެ ތެރޭގައި ހައިކޯޓުގެ ފަނޑިޔާރު ކަމަށް އައްޔަންކުރުމާ ގުޅިގެންނެވެ. އެ ދުވަހުން ފެށިގެން ފެމިލީ ކޯޓުގެ އިސް ގާޒީގެ ޒިންމާ ވަގުތީ ގޮތުން އަދާކުރަމުން އަންނަނީ ވެސް ގާޒީ މާހިރު އެވެ.

ގާޒީ މާހިރު އެންމެ ފުރަތަަމަ އައްޔަންކުރީ ސިވިލް ކޯޓުގެ ގާޒީ ކަމަށް ނޮވެމްބަރު 9، 2005 ގަ އެވެ. އޭގެ ފަހުން ފެމިލީ ކޯޓުގެ ގާޒީ ކަމަށް ބަދަލުވެވަޑައިގަތީ މެއި 23، 2010 ގަ އެވެ.

ފެމެލީ ކޯޓުގެ ގާޒީކަމުގެ މަގާމުގައި 12 އަހަރު ދުވަހަށްވުރެ ދިގު މުއްދަތެއްގައި މާހިރު ވަނީ ހިދުމަތް ކުރައްވާފަ އެވެ.