އަންނަ އަހަރުގެ ބަޖެޓުގައި ހިމަނަން ނުޖެހޭވަރަށް ޕްރޮޖެކްޓުތައް އެބަ ކުރިއަށްދޭ: އަމީރު
އަންނަ އަހަރު ބަޖެޓުގައި ހިމަނަން ނުޖެހޭ ވަރަށް މިހާރުވެސް ގިނަ ރަށްރަށުގައި މަޝްރޫއުތައް ކުރިއަށް ދާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވެފައިވަނީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އަންނަ އަހަރަކީ ރިޔާސީ އިންތިޚާބުކަމަށް ވުމުން، ބަޖެޓުގެ ޚަރަދުތައް އިތުރުވާނެކަމަށް ލަފާކުރެވޭއިރު، މިނަސްޓަރުގެ ޚިޔާލަކީ ކޮބައިތޯ ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ.
އެ ސުވާލުގެ ޖަވާބުގައި މިނިސްޓަރު ވިދާޅުވީ ކޯވިޑްގެ ދަތި ހާލަތުގައިވެސް ރައްޔިތުންނަށް ބޭނުންވާ ގިނަ ކަންކަން ފުއްދާދިނުމަށް އަސާސީ ޚިދުމަތްތަކާއި ގުނޭ ގިނަ މަޝްރޫއުތަކެއް ސަރުކާރުން ހިންގަމުން ދިޔަކަމަށެވެ. އަދި ރައީސުލްޖުމްހޫިރއްޔާގެ ވައުދުފުޅުތައް ފުއްދުމުގެ މަސައްކަތްތައް ރަށްރަށުގައި ކުރެވެމުންދާ މިންވަރު ބަލާލުމުން ފެނިގެންދާނެކަމަށެވެ.
ކޯވިޑް ނަވާރައިގެ ސަބަބުން އިގްތިސާދު އެންމެ ހީނަރުވެފައިވާ ދަނޑިވަޅުގައިވެސް ސަރުކާރުން ރަށްރަށުގައި ގިނަ މަޝްރޫއުތަކެއް ހިންގާފައިވާކަން މިނިސްޓަރު ފާހަގަކުރެއްވިއެވެ.
"ބޭސިކް އިންފްރާ ސްޓްރަކްޗަރ ޕްރޮޖެކްޓު، ފެނާއި ނަރުދަމާއަށް ވިޔަސް، ސުކޫލުތައް ވިޔަސް، ސިއްހީ ކަންތައްތައް ވިޔަސް، އަޅުގަނޑުމެންނަށް އެ މަސައްކަތްތައް އެބަ ކުރެވޭ، އަޅުގަނޑުމެން މި 4 އަހަރު ތެރޭގައި ދިމާވި އެކިއެކި އުނދަގޫތަކާއި އެކުވެސް، އެހެންވީމަ ކުރިއަށް އޮތް ތާގައި ހަގީގަތުގައި އިތުރަށް ބަޖެޓުގައި ޖަހާނެ ކަމެއް ގިނަ ރަށްރަށުގައި ނެތް"
ފިނޭންސް މިނިސްޓަރު އަމީރު
އެކަންކަން ފާހަގަކުރައްވާ މިނިސްޓަރު ވިދާޅުވީ، ރަށްރަށުގައި މިހާރުވެސް ގިނަ މަޝްރޫއުތައް ހިނގަމުންދާއިރު، ރިޔާސީ އިންތިޚާބާއި ދިމާކޮށް ބަޖެޓު ބު ވާނެކަމަށް ގަބޫލު ނުކުރައްވާކަމަށް މިނިސްޓަރު ވިދާޅުވިއެވެ.
މި ސަރުކާރުން ކުރީގެ އެއްވެސް ސަރުކާރުން ނުކުރާވަރަށް ރަށްތައް ތަރައްގީކުރުމުގެ މަސައްކަތް ކޮށްފައިވާކަމަށް މިނިސްޓަރު ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
