އަމާޒަކީ 41.5 ބިލިއަން ރުފިޔާގައި 2023 ވަނަ އަހަރުގެ ބަޖެޓް ހިފެހެއްޓުން: އަމީރު

ސަރުކާރުގެ އަމާޒަކީ 41.5 ބިލިއަން ރުފިޔާގައި 2023 ވަނަ އަހަރުގެ ބަޖެޓް ހިފެހެއްޓުން ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެެއެވެ.

މިއަދު ރައީސް އޮފީހުގައި ކުރިއަށް ދިޔަ ނޫސްވެރިންގެ ބައްދަލުވުމުގައި، ރައްޔިތުންގެ މަޖިލީހަށް 2023 ވަނަ އަހަރުގެ ބަޖެޓް ގެ ގޮތުގައި ހުށަހަޅުއްވާނެ ކަމަށް އަންދާޒާ ކުރައްވަނީ ކިހާ ވަރެއްގެ ބަޖެޓެއްތޯ ނޫސްވެރިއެއް ކުރެއްވި ސުވާލަށް ޖަވާބު ދެއްވަމުން އަމީރު ވިދާޅުވީ، ބަޖެޓްގެ އެންމެ ބޮޑު އަމާޒަކީ ފިސްކަލް ސްޓްރެޓެޖީއާއި އެއްގޮތަށް ބަޖެޓް ހުށަހެޅުން ކަމަށެވެ.

"ފިސްކަލް ސްޓްރެޓެޖީގައި 2023 ވަނަ އަހަރަށް މަޖިލީހަށް އަޅުގަނޑުމެން ހުށަހަޅާނެ ބަޖެޓެއްގެ ގޮތުގައި ފާހަގަކޮށްފައިވަނީ 41.5 ބިލިއަން ރުފިޔާގެ ބަޖެޓެއް. އަޅުގަނޑުމެން މިހާރު މަސައްކަތް ކުރަމުން މިދަނީ 41.5 ބިލިއަން ރުފިޔާ ގެ ބަޖެޓެއް ހުށަހަޅަން. އެގޮތަށް އަޅުގަނޑުމެން މަސައްކަތް ކުރަމުން މިދަނީ.

މިނިސްޓަރު އިބްރާހިމް އަމީރު

އަމީރު ވިދާޅުވީ ޕޮލިސީ ލެވެލްގައި ކުރެވޭ މަޝްވަރާތަކާއި އެކުގައި އެ އަދަދަށްވުރެ ބަޖެޓް ކުޑަ ވުމަކީ ނުވަތަ ބޮޑު ވުމަކީވެސް ވެދާނެ ކަމަށެވެ. އެހެންނަމަވެސް، މިހާރުގެ އަމާޒަކީ 41.5 ބިލިއަން ރުފިޔާގައި ބަޖެޓް ހިފެހެއްޓުން ކަމަށް އަމީރު ވިދާޅުވިއެވެ.

އަންނަ އަހަރަށް ލަފާ ކުރާ ދައުލަތުގެ ބަޖެޓް މިމަހުގެ 31 ވަނަ މަޖިލީހަށް ހުށަހަޅާނޭކަން ފިނޭންސް މިނިސްޓްރީ މިމަހު 8 ވަނަ ދުވަހު ވަނީ ހާމަކޮށްފައެވެ.

އެކަމާއި ގުޅިގެން ފިނޭންސް މިނިސްޓްރީން ބުނީ، އޮފީސްތަކުގެ ބަޖެޓު އިވެލުއޭޓުކޮށް މިހާރު ނިމިފައިވާ ކަމަށެވެ. އަދި މިވަގުތު ކުރަނީ ދައުލަތުގެ ޕީއެސްއައިޕީ މަޝްރޫޢުތަކުގެ އަޕްޑޭޓުތައް ބެލުމާއި، އެކަންކަން ފައިނަލްކުރުމުގެ މަސައްކަތްތައް ކަމަށްވެސް ފިނޭންސް މިނިސްޓްރީން ހާމަކުރެއެވެ.

މިނިސްޓްރީން އިތުރަށް ބުނެފައިވާ ގޮތުގައި އަންނަ އަހަރު ބަޖެޓްގައި އަލަށް ހިމަނާނެ މަޝްރޫޢުތަކާއި ޕްރޮގްރާމްތަކާއި ގުޅޭގޮތުންވެސް މަޝްވަރާކުރަމުންދާ ކަމަށެވެ.