ހަސަން ކުރުސީ އަކީ ޖިސްމާނީ ގޮތުން އަޅުގަނޑެއް ނޫން: ރައީސް ނަޝީދު
ޓުވީޓާގައި ހަސަން ކުރުސީގެ ނަމުގައި ޝުޢޫރު ފާޅުކުރަމުންދާ އައިޑީ އަކީ ޖިސްމާނީގޮތުން އެމަނިކުފާނު ނޫން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދުގެ ރަސްމީ ޓުވިޓާއިން މިއަދު ކުރެއްވި ޓުވީޓެއްގައި ވިދާޅުވީ، ހަސަން ކުރުސީ އަކީ އެމަނިކުފާނުގެ ބައެއް ލިޔުންތަކުގެ ހަގީގީ-ހިޔާލީ ޝަހުޝެއް ކަމަށެވެ. އަދި އެއީ އެމަނިކުފާނުގެ ތޮބިއްޔަތު ބަޔާން ނުކޮށްދޭ ޝަހްޝިއްޔަތެއް ކަމަށް ދަންނަވަން އުނދަގޫ ނަމަވެސް އެއީ ޖިސްމާނީ ގޮތުން އެމަނިކުފާނު ނޫން ކަމަށްވެސް ވިދާޅުވިއެވެ.
”ލިޔުމަކުން އުފެދުނު ޝަޚްޝެއް މިދަރަޖައަށް ދިރިގެން ދާކަމީ އަޅުގަނޑަށް ލިބޭ ވަރަށް ބޮޑު އުފަލެއް. ނަމަވެސް އެޗްކޭ ނަމުގަ ސޯޝަލް މީޑިއާގައި ޝާއިޢު ކުރަނީ ހަމަކަށަވަރުންވެސް އަޅުގަނޑެއް ނޫން” ރައީސް ނަޝީދު ވިދާޅުވިއެވެ.
ރައީސް ނަޝީދު މިހެން ވިދާޅުވެފައި ޓުވީޓު ކުރައްވާފައި މިވަނީ، ޓެކްސް އާއި ގުޅިގެން އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ޓެގް ކޮށް ހަސަން ކުރުސީ ކުރި ޓުވީޓަކަށް ރައްދު ދެއްވައި ރޮޒައިނާ ކުރެއްވި ޓުވީޓު ތަކެއްގައި ހަސަން ކުރުސީއާއި ރައީސް ނަޝީދަކީ އެކެއް ގޮތަށް ސިފަ ކުރައްވާފައިވަނިކޮށެވެ. އެގޮތުން، ޓެކްސް ރާއްޖެއަށް ތަޢާރަފް ކުރެއްވީ ރައީސް ނަޝީދު ކަމަށް ވާއިރު، ރޮޒައިނާގެ ޓުވީޓުތަކުގައި ހަސަން ކުރުސީ އަށް ރައްދު ދެއްވައި އޭނާ ޓެކްސް ތަޢާރަފް ކުރި ކަމަށް ވަނީ ބުނެފައެވެ.
ރައީސް ނަޝީދުގެ ޓުވިޓާ ދެ އެކައުންޓެއް މިހާރުވެސް ބޭނުން ކުރައްވަމުން ދާއިރު, އެމަނިކުފާނުގެ އަމިއްލަ ނަންފުޅު، މުހައްމަދު ނަޝީދު ގެ ނަމުގައި ބޭނުންކުރާ އައިޑީ އަކީ ރަސްމީ އައިޑީ ކަމަށާ، އަދި "އެމްއެން އަން އޮފިޝަލް"ގެ ނަމުގައި ބޭނުން ކުރާ އައިޑީ އަކީ ނުރަސްމީ އައިޑީ ކަމަށް މީގެ ކުރިން އެމަނިކުފާނު ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
