ދިވެހިރައްޔިތުން ދެން އަނބޮއްފުޅަށްވެސް ދަނބޮއްފުޅަށްވެސް ބަލާނެކަމެއް ނެތް: ޣައްސާން

ސަރުކާރު ހިންގާ މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އިސް ވެރިންނަކީ އަމިއްލަ ޕާޓީގެ އާންމު މެމްބަރުންނަށްވެސް ކަންކަން އޮޅުވާލާ ބައެއްކަމަށާއި، ދެން އެމްޑީީގެ ލީޑަރުންނަށް ރައްޔިތުން ފުރުސަތު ނުދިނުމަށް ޕީޕީއެމްގެ ނައިބުރައީސް އަދި މަޖިލީހުގެ ގުރައިދޫ ދާއިރާގެ މެމްބަރު ޣައްސާން މައުމޫނު ގޮވާލައްވައިފި އެވެ.

ޣައްސާނު މިފަދައިން ވިދާޅުވެފައިވަނީ ޕީޕީއެމް އޮފީހުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.

އެގޮތުން ޣައްސާނު ވަނީ މި ސަރުކާރުން ރައްޔިތުންނަށް ވީ ވައުދުތައް ފުއްދާދިނުމުގައި ނުކުޅެދިފައިވާކަމުގެ ގިނަ މިސާލުތައް ދައްކަވާފައެވެ.

"މަސްވެރިންނަށް ވީ ވައުދުތައް.. މިވާހަކަތައް ދައްކާ ހުސްނުވާނެ، އެހެން ނަމަވެސް ފެންނަނީ އެއީ މަސްވެރިންނަށް ކުރި މަލާމާތެއްކަމަށް، 1486 ދުވަހުން ނުވިކަމެއް 340 ދުވަހުގެ ތެރޭގައި މިހާރު އެ ބުނަނީ ކުރާނަމޭ. ކާކު ތޯ ގަބޫލު ކުރާނީ؟ އިންސާފުގެ ދަތުރެކޭ ބުނި، ފެންނަނީ ހިތް ރުހޭ މީހާއަށް ވަކި ގޮތެއް ނަފްރަތު ކުރާ މީހާ ޖަލަށް"

ޕީޕީއެމްގެ ނައިބު ރައީސް ޣައްސާން

ޣައްސާނުގެ ވާހަކައިގައި ވަނީ ރައީސް އިބްރާހިމް ސޯލިހު ވެރިކަމަށް އައުމަށް ވީ ވައުދުތަކާއި، ވެރިކަމަށް އައުމަށްފަހު ކަންކަން ކުރައްވަމުން ދާ ގޮތާއި ދިމާނުވާކަން ފާހަގަކުރައްވާ ބޮޑެތި ފާޑުކިޔުންތަކެއް އަމާޒު ކުރައްވާފައެވެ.

އޭގެ ތެރެއިންވެސް ސަރުކާރުގެ ސިޔާސީ މަގާމުތައް އިތުރު ކުރަމުންދާ ދިއުމާއި، ސްޓިކާ ޖަހައިގެން ދައުލަތަށް އާމްދަނީ ހޯދަމުންދާ ދިއުމަށް ޣައްސާނުގެ ފާޑުކިޔުން އަމާޒުކުރެއްވިއެވެ.

އެއާއެކު އޭނާ ވިދާޅުވީ، އެމްޑީޕީގެ ވެރިކަމުގައި މިއީ އާ ކަންތަކެއް ނޫންކަމަށެވެ. އަދި މި ވެރިކަމުގައި ކަންކަން ހިނގަމުންދާ ގޮތާއި މެދު ހައިރާންވެވަޑައި ނުގަންނަވާ ކަމަށެވެ.

އެމްޑީޕީ ކޮންމެ ފަހަރަކުވެސް ވެރިކަމަށް އަންނަނީ އެމީހުންނަށް ނުފުއްދޭނެ ވައުދުތައް ވެގެން ކަމަށާއި، ވެރިކަމަށް އައުމަށްފަހު މަސައްކަތް ކުރަނީ އެމީހުންގެ އަމިއްލަ އެޖެންޑާތަކެއް ހާސިލް ކުރުމަށްކަމަށް ޣައްސާނު ވިދާޅުވިއެވެ.

"އެމްޑީޕީ ވެރިކަމަށް އަންނަ ކޮންމެ ފަހަރަކުވެސް ފެންނަނީ، ނުފުއްދޭ ވަރުގެ، ނޫނީ އެމީހުންގެ އަމިއްލަ ނަފްސުންވެސް ފުއްދާ ނުދޭނެކަމަށް ނިންމައިގެން ތިބި ވައުދުތަކެއް ރައްޔިތުންނަށް ވެގެން ވެރިކަމަށް އާދެވޭ ހިސާބުން މުޅިން އެހެން ގޮތަކަށް ކަންތައްތައް އަނބުރާލާ އެހެން އެޖެންޑާއެއް ހާސިލް ކުރަން މަސައްކަތް ކުރާތަން"

ޕީޕީއެމްގެ ނައިބު ރައީސް ޣައްސާން

ޣައްސާނުގެ ވާހަކައިގައި ވަނީ އެމްޑީޕީއާއި އެޕާޓީގެ އިސްވެރިން ދައްކަވާ ވާހަކަތަށް ރައްޔިތުން އިތުރަށް ނުހެއްލުމަށް ގޮވާލައްވާފައެވެ. ޕާޓީގެ ދެ ރައީސުންގެ ދެމެދުގައި ނުތަނަވަސްކަމެއް އޮތްކަމަށް ދެއްކުމަށް މަސައްކަތް ކުރި ނަމަވެސް އެ ދެ ބޭފުޅުންނަކީވެސް ހަމަ އެކައްޗެއްކަމަށް ޣައްސާނުގެ ވާހަކައިގައި ވަނީ ސިފަ ކުރައްވާފައެވެ.

"ދިވެހި ރައްޔިތުން ދެން އަނބޮއްފުޅަކަށްވެސް ދަނބޮއްފުޅަކަށްވެސް ބަލާނެކަމެއް ނެތް، ދެ މީހުންވެސް ކުރަނީ އެއް ގޮތަކަށް"

ޕީޕީއެމްގެ ނައިބު ރައީސް ޣައްސާން

އެކަންކަން ފާހަގަކުރައްވާ ޣައްސާނު ވިދާޅުވީ، ދިވެހިރާއްޖޭގައި މިނިވަންކަމާއި އިސްތިގުލާލު ހިމާޔަތް ކުރެވޭނެ ވެރިކަމެއް ގާއިމް ކުރެވެން ޖެހޭކަމަށެވެ. އަދި މި ގައުމުގައި ތިބި އިންޑިއާ ސިފައިންވެސް އަނބުރާ ދާން ޖެހޭ ކަމަށާއި، ދިވެހިންގެ ވެރިކަމެއް މި ގައުމުގައި އުފެދިގެން ނޫނީ ހަމަޖެހުމެއް ނެތްކަމަށް ޣައްސާނު ވަނީ ވިދާޅުވެފައެވެ.