ޖަލު ބަލަހައްޓާ މީހުންނަކަށް އިތުބާރެއް ނެތް، ރައީސް ޔާމީން ގެޔަށް ބަދަލުކޮށްދީ: ޝިޔާމު

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ޖަލުގައި ހުންނަވާއިރު، އެމަނިކުފާނުގެ ސަލާމަތާއި ރައްކާތެރިކަމާއި މެދު ކަންބޮޑުވެލައްވާކަމަށް ޕީޕީއެމްގެ ނައިބުރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ.

ޝިޔާމު މިފަދައިން ވިދާޅުވެފައި ވަނީ ރައީސް ޔާމީން މިނިވަންކުރުމަށް ގޮވާލާ އިދިކޮޅުން މާލޭގައި ސިލްސިލާކޮށް ކުރަމުންދާ މުޒާހަރާގެ ތެރެއިން، މިރޭގެ މުޒާހަރާ ފެއްޓުމުގެ ކުރިން ޕީޕީއެމް އޮފީސް ކުރިމަތީ އޮތް ކުޑަ ޖަލްސާއެއްގައި ވާހަކަދައްކަވަމުން ނެވެ.

ޝިޔާމު ވަނީ ޖަލުގައި ރައީސް ޔާމީންއަށް ރައްކާތެރިކަން ފޯރުކޮށްދޭނެކަމާމެދު ސުވާލު އުފައްދަވާފަ އެވެ.

އެގޮތުން އޭނާ ވިދާޅުވީ، ޖަލުގައި ސެކިއުރިޓީގެ ކަންކަން ބަލަހައްޓަަވަން ތިއްބަވާ ފަރާތްތަކަށް އިތުބާރު ނުކުރައްވާކަމަށެވެ. އަދި ޝިޔާމު ވަނީ ރައީސް ޔާމީން ގެޔަށް ބަދަލުކޮށްދެއްވުމަށް ގޮވާލައްވާފަ އެވެ.

"ދެ ރައީސުން ކެމްޕޭނު ހުއްޓާލާފަ ކުރައްވަންވީ ކަމަކީ ރައީސް ޔާމީން ގެޔަށް ބަދަލުކޮށްދިނުން. އަޅުގަނޑުމެން ނުކުރަން ޖަލަކަށް އިތުބާރެއް. ޖަލު ބަލަހައްޓަން ތިބި މީހުންނަށް އިތުބާރެއް ނުކުރަން. ރައީސް ޔާމީން ގެޔަށް ބަދަލުކޮށް ދީ"

ޕީޕީއެމްގެ ނައިބުރައީސް ޝިޔާމު

ރައީސް ޔާމީން ގެޔަށް ބަދަލުކުރުމަށް ޝިޔާމު އެދިވަޑައިގެންފައިވާއިރު މީގެ ދެ ދުވަސްކުރިން މާފުށީ ޖަލުގައި ވަނީ ހަމަނުޖެހުމެއް ހިނގާފައެވެ. އޭގެ ފަހުން ކަރެކްޝަންގެ ބެލުމުގެ ދަށުގައި ހުރި މީހަކު މަރުވި މައްސަލައެއް ފެންމަތިވެފައިވާއިރު، މީގެ ކުޑަ ދުވަސްކޮޅެއް ކުރިން ފުލުހުންގެ ބެލުމުގެ ދަށުގައި ހުރި މީހަކު އަމިއްލައަށް ދަންޖެހުނުކަމަށް ބުނާ މައްސަލައެއްވެސް ވަނީ ފެންމަތިވެފައެވެ.

ބަންދުގައި ތިބޭ މީހުން މަރުވާ އަދަދުތައް އިތުރުވަމުން އަންނަ އިރު، މިފަދަ މައްސަލަ ނެޝަނަލް އިންޓަގްރިޓީ ކޮމިޝަނުން ބަލާ، ފިޔަވަޅު ނާޅާކަމުގެ ކަންބޮޑުވުންތަކާއެކު އިދިކޮޅުން ވަނީ އެންއައިސީއަށްވެސް ގޮސްފައެވެ.

އެފަދަ މައްސަލަތައް ނުބެލޭތީ ބަންދުގައި ތިބޭ މީހުންގެ ރައްކާތެރިކަމާއިމެދު އެއްވެސް ޔަގީންކަމެއް ނެތްކަމަށް އިދިކޮޅުން ދަނީ ބުނަމުންނެވެ.