އިހްތިޖާޖު ކުރާ އެފްކޯންސް ގެ މުވައްޒަފުންނަށް ބިރުދައްކާ ކަމަށް ބުނެ ފުލުހަށް

އައްޑޫ ސިޓީގެ މަގުހެދުމުގެ މަސައްކަތްކުރާ މުވައްޒަފުންނަށް މުސާރަ ނުދޭތީއާއި ކާން ނުދޭތީ އެ މުވައްޒަފުން އިހުތިޖާޖުކުރުމުން ކުންފުނިން އެމީހުންނަށް ބިރުދައްކަމުންދާ ކަމަށް ބުނެ އެ ސިޓީގެ ޕޮލިސް ސްޓޭޝަނަށް ގޮސްފިއެވެ.

ޕޮލިސް ސްޓޭޝަނަށް ދިޔަ މުވައްޒަފުން އެމީހުންގެ ކަންބޮޑުވުންތައް ހިއްސާކޮށްފައިވާ ވީޑިއޯ ގައި ބުނެފައިވާ ގޮތުގައި، އެމީހުން ޕޮލިސް ސްޓޭޝަނަށް އައީ އެމީހުން ހަޅުތާލުކޮށް އިހުތިޖާޖުކުރަން ފެށުމުން ތަޅައި އަނިޔާކުރާނެކަމަށް ބުނެ އިންޒާރުދީ ބިރުދައްކާތީ ފުލުހުންގެ ހިމާޔަތާއި ރައްކާތެރިކަން ހޯދުމަށެވެ.

އެމުވައްޒަފުން ކިޔައިދިން ގޮތުގައި، އެމީހުން ކިތަންމެ ބަލިވެ އުޅުނަސް، އަނިޔާވެފައި ހުރި ނަމަވެސް މަސައްކަތް ކުރަން ޖެހޭކަމަށާ، މަސައްކަތް ނުކޮށްފިނަމަ ކާން ނުދޭނެ ކަމަށް ބުނެފައިވާކަމަށެވެ.

އެފަދަ ހާލެއްގައި, ރަނގަޅަށް ކާންނުލިބި މަސައްކަތް ކުރާއިރު، މުސާރަވެސް ބަރާބަރަށް ނުދޭ ކަމަށާ، އެކަމާއި ގުޅިގެން އިހުތިޖާޖުކުރަން ފެށުމުން ހަޅުތާލުކުރާ މުވައްޒަފުން އަނބުރާ ޤައުމަށް ފޮނުވައިލާނެކަމަށް ބުނެ ބިރުދެއްކުމާއެކު ޖިސްމާނީ ގޮތުން އަނިޔާކޮށް ތަޅާނެކަމަށްވެސް އައްޑޫގައި ތިބި ކުންފުނީގެ މެނޭޖުމެންޓުން ބުނެފައިވާކަމަށް އެ މުވައްޒަފުން ބުނެއެވެ.

"ޖެހުމުގެ ސަބަބުން އެކެއްގެ ލޮލު ކައިރިން ލޭ އައިސް އައިސްވެސް ހުރި. އަހަރެެންގެ ބޭބެގެ ފައިގައި ބޮޑު ޒަޚަމެއް ހުރުމުން އެކަމަށް ފަރުވާ ކޮށްދޭން އެދުނިން. އެކަމަކު އެކަން ވެސް ނުކޮށްދިން. ބުނީ މިކޮޅުން އެކަމަށް ފަރުވާ ކޮށްދެވެން ނެތް ކަމަށް. ދެން އަހަރެން ބުނެފިން އަހަރެންނާއި އެކު ބޭބެ އިންޑިޔާ އަށް ފޮނުވާލާށޭ. އޭރުން އެތަނުން ފަރުވާ ކުރެވޭނެ އެއްނު. އެހެން ނަމަވެސް ވިސާ ނުލިބޭނެ އޭ އެހެން އެއްޗެކޭ ކިޔައި އެކަން ވެސް ނުކޮށްދިން. އެފަދަ އިހުމާލު ތަކުގެ ސަބަބުން ކަންކަން ސީރިއަސްވެ މީހަކު މަރުވެއްޖެނަމަ ދެން މިތާ އަހަރުމެން ކިހިނެއް ހަދާނީ." އެފްކޮންސް މުވައްޒަފުން ކިޔައިދިނެވެ.

އައްޑޫގައި އެފްކޯންސްގެ މުވައްޒަފުން ހަޅުތާލުކޮށް އިހުތިޖާޖުކުރާތާ 4 ދުވަސްވެއްޖެއެވެ. އެ މުވައްޒަފުން އިހުތިޖާޖުކުރަން ފެށުމުން އައްޑޫ ސިޓީގެ ދެ ކައުންސިލަރަކުވަނީ އެ މުވައްޒަފުންނާ ބައްދަލުކޮށް އެމީހުންގެ ކަންބޮޑުވުންތައްވެސް އޮޅުންފިލުވައިފައެވެ. އެހެންނަމަވެސް މައްސަލަ އަށް ހައްލު ލިބިފައި ނުވާއިރު، މަގު ހެދުމުގެ މަސައްކަތް ކުރިއަށްދާ ގޮތް ބެލުމަށް ޕްލޭނިންގެ މިނިސްޓަރު މުހައްމަދު އަސްލަމް މިވަގުތު ހުންނެވީ އެ ސިޓީ ގައެވެ.