"މިގައުމަކު ނެތް ސަރުކާރެއް؛ ހޯމް މިނިސްޓަރާއި އެންމެން މިތަނަށް ގެނެސް މަގާމުން ވަކިކުރަންޖެހޭ!"

ދިވެހިރާއްޖޭގައި ކަންކަން ހިނގަމުންދަނީ ސަރުކާރެއް އޮންނަ ގައުމެއްގައި ކަންކަން ހިނގަމުންދާ ގޮތަށް ނޫން ކަމަށާ، މި ގައުމުގައި ސަރުކާރެއް ނެތް ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑެ) ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މަސައްކަތު މާހައުލާއި ސިއްހީ ރައްކާތެރިކަމުގެ ބިލަށް ބަހުސް ކުރައްވަމުން ބޮންޑެ ވިދާޅުވީ، ދައުލަތުގެ އެންމެ އިސް ވާޖިބަކީ ރައްޔިތުންނަށް ރައްކާތެރިކަން ކަށަވަރު ކޮށްދިނުން ކަމަށާ، އެހެންނަމަވެސް މާލެއާއި ރާއްޖެތެރޭގެ ރަށްތަކަކީ މިހާރު ރައްކާތެރިކަން ކަށަވަރު ވެފައިވާ ތަންތަނެއް ނޫން ކަމަށެވެ.

އެގޮތުން މަގުތައް މައްޗަކީ ރައްޔިތުން ހިނގައި ބިނގާވެ އުޅުން އަމާންތަނަކަށް ހަދައިދިނުމަކީ ދައުލަތުގެ ޒިންމާއެއް ކަމަށް ވާއިރު، އެތަން ތަނަކީ މިހާރު ރައްކާތެރި ތަންތަނެއް ނޫން ކަމަށްވެސް އޭނާ ވިދާޅުވި އެވެ.

މަގުމަތީގައި ހިނގާ ބިނގާވެ އުޅުމުގެ އަމާންކަން މި ހުރިހާ ކަމަކީ ރައްޔިތުންނަށް ފުރަތަަމަ ދޭންޖެހޭ އަސާސީ ހައްގު ތެރެއިން އެންމެ މުހިންމު އެއް ހައްގު. އެ ހައްގެއް ނެތް. ކަންކަން މަތީގައި މަސްތުވާތަކެތި މިކަންކަން އެދަނީ ބަރާބަރަށް ހިންގަމުން. ސަރުކާރެއް އޮތް ހެން ރައްޔިތުންނަށް އިހްސާސްވެސް ނުކުރެވޭ.

އިބްރާހިމް ރަޝީދު

މިއާއެކު ބޮންޑެ ވިދާޅުވީ، ދާދިފަހުން ނިރުފެހިގޭގައި ހިނގައިދިޔަ އަލިފާނުގެ ހާދިސާގައި ނިޔާވި މީހުންނަކީ ކޮންބައެއް ކަންވެސް ނޭނގޭ ކަމަށާ، ސަރުކާރަކާއި، ހޯމް މިނިސްޓްރީއެއް އަދި ޑިފެންސް މިނިސްޓްރީއެއް އޮތް އިރު ގައުމުގައި ފިލައިގެން އުޅޭ މީހުންގެ ގޮތްވެސް ނޭނގޭ ކަމަށެވެ.

ތިލަފުށީގައި އަނދައި ދިޔައިރުވެސް ފުރަތަމަ ބުނަމުންދިޔައީ ނެތޭ އެއްވެސް ކަމެއް. މީހަކު އަނދައި ނުދެއޭ. އެއްވެސް ގެއްލުމެއް ނުވެއޭ. އެމީހުން މުޒާހަރާ ކުރީމަ ބުނީ ބޮލެއް ފެނިއްޖެއޭ. އަނެއްދުވަހު. ދެން ޖެހިގެން އައި ދުވަހު ފައެއް ފެނިއްޖެއޭ. އަދި އަދަށްވެސް ނޭނގޭ އެއީ ކޮން ބައެއް ކަމެެއް. މިއީ ދައުލަތެއް. އެހެން ނަމަވެސް މަރުވެދިޔައީ ކޮންބައެއްކަން. އެމީހުންގެ ޑީއެންއޭ އެއް، ފިންގަރ ޕްރިންޓެއް އެކައްޗެއް ވެސް އޮތީކީނޫން، ހަމަ އެއާޕޯޓުން އަންނަ ގޮތަށް އައިސް މާލޭގައި މަސައްކަތް ކުރަނީ.

އިބްރާހިމް ރަޝީދު

އެހެންކަމުން، މަސައްކަތުގެ މާހަލުގައި އަމާންކަން ހޯދައިދޭން ބޭނުން ނަމަ ފުރަތަަމަ ކުރަންޖެހޭ ކަމަކީ މަސައްކަތުގެ މާހައުލުގައި އުޅެނީ ކޮންބައެއްކަން ދެނެގަތުން މައުލޫމާތު ހޯދުންކަމަަށްވެސް ބޮންޑެ ވިދާޅުވި އެވެ.

މީގެ އިތުރުން ބޮންޑެ ވިދާޅުވީ، މަޖިލީހަށް ސަރުކާރުގެ ފަރާތުން ހުށަހަޅާ އެފަދަ ކޮންމެ ބިލަކާއި އެކު، އިތުރު މަގާމުތަކެއްވެސް އުފައްދަމުންދާ ކަމަށާ، އެހެން ނަމަވެސް އެއާއި ގުޅިގެން ކުރާނެ ޚަރަދު ތަކުގެ ތަފްސީލް ބިލުގައި ހިމަނާފައި ނުވާ ކަމަށެވެ.

"ކޮންމެ ބިލެއް އަންނަ އިރު އަނެއްކާވެސް ވަކި ސަރުކާރެއް އެބަ އުފެދޭ ބިލުގެ ތެރެއިން. މިހާރުވެސް އަނެއްކާ މި އުފެދެނީ ވަކި ސަރުކާރެއް. މި ސަރުކާރަށް ކިޔާނީ މަސައްކަތުގެ މާހައުލާއި ގުޅުންހުރި ސަރުކާރު. އެ ކޯލިޝަން ތައްޔާރުވާންވާއިރަށް އަނެއްކާވެސް މި އަންނަނީ މަސައްކަތު މާހައުލާއި ގުޅުން ހުރި ސަރުކާރު."

"އިއްޒަތްތެރި ރައީސް ފުރަތަަމަ މިގައުމުގައި ހުރި ހޯމް މިނިސްޓަރު މި ހުރިހާ އެންމެން ވަކިކުރަންވީ މިތަނަށް ގެނެސް. ކިތަންމެ ވަރަކަށް ބިލު ހެދިޔަސް ނުވާނެ މިކަމެއް. ރައްޔިތުންނަށް މިގައުމުގެ އަމާންކަން ރައްކާތެރިކަން ކަށަވަރު ނުވާ މާހައުލެއްގައި ކިހިނެއްތޯ އަމާން ރައްކާތެރި މާހައުލެއް އަޅުގަނޑުމެން ކަނޑައަޅާނީ. ނެތޭ ސަރުކާރެއް މިގައުމަކު."  ބޮންޑެ ވިދާޅުވިއެވެ.

މިއާއެކު އޭނާ ވަނީ މަސްތުވާތަކެތި އެތެރެކުރުމާއި ގުޅޭގޮތުން މަޖިލީހަށް ހުށަހެޅުނު މައްސަލަ ބަލައި ނުގަންނަން ވިޕް ނެރުމުންވެސް އެކަމަށް ފާޑުވިދާޅުވެ، އެފަދަ ކަންކަމާއި ހުރެ ކަންކަން އިސްލާހު ނުކުރެވޭ ކަމަށް ވިދާޅުވެފައެވެ.