ބީއެމްއެލް ގެ އެކި ވައްކަންތަކާއި ސައިބާ ކްރައިމްއާއި ގުޅުން އެބަހުރި: ރައީސް ނަޝީދު

ބޭންކް އޮފް މޯލްޑިވްސް (ބީއެމްއެލް) ގެ ބައެއް ވައްކަންތަކާއި ސައިބާ ކްރިމްއާއި ގުޅުން އޮތް ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ނަޝީދު މިފަދައިން ވިދާޅުވެފައިވަނީ މިއަހަރުގެ ފުރަތަމަ ދައުރުގެ 17 ވަނަ ޖަލްސާގައި ހުށައެޅި ސައިބާ ކްރައިމްގެ އަމަލުތަކަކީ ކުށެއްކަމަށް ހެދުމަށް ގާނޫނުލް އުގޫބާތަށް އިސްލާހު ގެނައުމުގެ ބިލާއި ގުޅޭގޮތުން މެމްބަރުން ވާހަކަދައްކަވަން ފެއްޓެވުމުގެ ކުރިން، އަދި އެ އިސްލާހު ފާސްކުރާއިރު ވިސްނާލުން މުހިންމު ކަންކަމަށް އަލިއަޅުވާލައްވާ ވާހަކަދައްކަވަމުން ނެވެ.

ސަރުކާރުގެ ފަރާތުން ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒު ހުށައަޅުއްވާފައިވާ ގާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްއުޤޫބާތަށް) އިސްލާޙު ގެނައުމުގެ ބިލުގައި ވަނީ ސައިބާ ކްރައިމްއާއި ގުޅުންހުރި ހުރިހާ ކުށަކީ އެ އިސްލާހުގެ ތެރެއިން އަދަބު ކަނޑައެޅޭނެ ކަންކަމަށް ހެދުމަށް ހުށައަޅާފަ އެވެ.

އެގޮތުން ހުއްދަ ނެތި ކޮމްޕިއުޓާ ސިސްޓަމަށް އެކްސެސްވުމާއި، އިތުރުކުށެއް ކުރުމަށް މަގުފަހި ކުރުމުގެ ނިޔަތުގައި ހުއްދަނެތި ކޮމްޕިއުޓާ ސިސްޓަމަށް އެކްސެސްވުމާއި ހުއްދަނެތި ކޮމްޕިއުޓާ ސިސްޓަމްގެ ޑޭޓާ އިންޓަފިއާ ކުރުމުގެ އިތުރުން، ނަހަމަ ގޮތުގައި ޑިވައިސް ބޭނުން ކުރުމާއި ސައިބާ ވަޔަލެންސްގެ އަމަލުތަކާއި ކޮންޕުޓާއާއި ގުޅުންހުރި ފޯޖަރީގެ އަމަލުތައް އަދި އޮޅުވާލުމުގެ އަމަލުތައް ޤާނޫނުލްއުޤޫބާތުގެ ދަށުން އަދަބުލިބޭ ކުށްތަކުގެ ގޮތުގައި ކަނޑައަޅައި ދިނުމަށް ވަނީ ހުށައަޅާފަ އެވެ.

އެ ބިލަށް ބަހުސްކުރަން ހުޅުވާލުމުގެ ކުރިން ނަޝީދު ވިދާޅުވީ ސައިބާ ކްރައިމްއަކީ ވަރަށް ބޮޑަށް ވިސްނަން ޖެހޭ މައްސަލައެއް ކަމަށެވެ. އެގޮތުން ބޭންކުން ހިންގާ ބައެއްކަހަލަ ވައްކަންތަކާއި ޓެރަރިޒަމްގެ އަަލުތަކާއިވެސް ސައިބާ ކްރިމްއާއި ގުޅިފައިވާކަމަށް ނަޝީދު ވިދާޅުވި އެވެ.

"އެނގިވަޑައިގަންނަވާނެ ސައިބާ ކްރައިމްގެ މައްސަލަތައް މަޖިލީހުގައި އެކި ގޮތްގޮތަށް އެބަ ފާހަގަކުރެވޭ. ބެންކް އޮފް މޯލްޑިވްސްގެ އެކި އެކި ވަށްކަންވެސް ސައިބާ ކްރައިމްއާއި ގުޅިފައި އެބަހުރި. އަދި އެހެންވެސް ބައެއް ޓެރަރިސްޓު މަސައްކަތާއި މި ބާވަތުގެ ކަންކަން ހިމެނޭ. އަދި އެކި ގޮތްގޮތަށް ދޮގު މައުލޫމާތު ފޯރުކޮށްދިނުމާއި އޮޅުވާލުމުގެ ކަންކަންވެސް ހިމެނޭ"

މަޖިލީހުގެ ރައީސް މުޙައްމަދު ނަޝީދު

ނަޝީދު ވިދާޅުވީ އެ މައްސަލައިގައި ޤާނޫނުލްޢުޤޫބާތަށް އިސްލާހު ގެނައުމުގައި ކަމާގުޅުންހުރި ތަޖުރިބާކާރުންގެ އެހީތެރިކަން ހޯދި ނަމަވެސް މަޖިލީސް މެމްބަރުންވެސް ވިސްނުންތަކެއް ގެންގުޅެން ޖެހޭ ކަމަށެވެ.

އޭގެއިތުރުން، އެ ބިލަށް ބަހުސްކުރައްވާއިރު، އޭގެ މާއްދާތަކަށް ފުރިހަމައަށް ވިސްނަވާ މަޖިލީހުން ކުރަން މި އުޅެނީ ކޮންކަމެއްކަން ރަނގަޅަށް އެގިވަޑައިގެން ތިއްބަވާ އެކަން ކުރެއްވުމަށް އިލްތިމާސް ކުރައްވާކަމަށް ނަޝީދު ވިދާޅުވި އެވެ.