ސަރުކާރު ޖަވާބުދާރީ ނުކުރެވޭނެ ޙާލަތަށް ހުރިހާ މުއައްސަސާއެއް އޮތީ ވައްޓާލާފަ: އިދިކޮޅު

ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހު މިއަދު ވެރިކަން ކުރައްވަމުން ގެންދަވަނީ ސަރުކާރު ޖަވާބުދާރީ ނުކުރެވޭ ޙާލަތަށް މުއައްސަސާތައް ވައްޓާލައިގެންކަމަށް ޕްރޮގްރެސިވް ކޮންގްރެސް ކޯލިޝަނުން ބުނެފި އެވެ.

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ ޝަރީއަތްތަކާއި، ސަރުކާރު ހިންގަމުންދާ ގޮތާއި ގުޅޭގޮތުން އިދިކޮޅުގެ ހުރި ކަންބޮޑުވުންތައް ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޕީޕީއެމްގެ ނައިބު ރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވީ ވާދަވެރި ސިޔާސީ ލީޑަރުގެ މައްޗަށް އުފުލާފައިވާ ދައުވާތަކާއި ގުޅިގެން ކުރިއަށް ގެންދާ ޝަރީއަތަށް ސަރުކާރުން ނުފޫޒު ފޯރުވަމުންދާ ކަމަށެވެ. އަދި އެ މައްސަލަތަކަށް ނުފޫޒު ފޯރުވަނީ ރައީސުލްޖުމްހޫރިއްޔާ އިސްކޮށް ހުންނަވައިގެންކަމަށް ޝިޔާމު ތުހުމަތު ކުރެއްވި އެވެ.

ދިވެހިރާއްޖޭގައި އޮތީ ތިން ބާރު ވަކިވެފައިވާ ވެރިކަމުގެ ނިޒާމެއް ނަމަވެސް، މިއަދު ފެންނަމުން ދަނީ ތިންބާރު މަސްހުނިވެފައިވާ މަންޒަރުތައް ކަމަށާއި، ސަރުކާރު ޖަވާބުދާރީ ކުރެވޭނެ އެއްވެސް ގޮތެއް މިއަދު ނެތްކަމަށް ޝިޔާމު ވިދާޅުވި އެވެ.

"މިއަދު ދިވެހިރާއްޖެ އޮތް ހާލަތަކީ އެ ނިޒާމު (ތިން ބާރު ވަކި ކުރެވިފައިވާ ނިޒާމުގެ) އެއް ބާރު މިއަދު މި އޮތީ ބޮޑު ތަޅު އަޅުވާފަ. ރައީސުލްޖުމްހޫރިއްޔާ ތަކުރާރުކޮށް ވިދާޅުވޭ ތިމަންމަނިކުފާނު އަތްޕުޅުގައި އެބައޮތޭ ރައްޔިތުންގެ މަޖިލީހުގެ މެޖޯރިޓީ. މެޖޯރިޓީ ބާއްވައިގެން ރައްޔިތުންގެ މަޖިލީސް ތަޅުއަޅުވައިގެން ދިވެހިރާއްޖޭގެ އެއްވެސް މުއައްސަސާއެއް ޖަވާބުދާރީކޮށް ޒިންމާދާރު ނުކުރެވޭނެ ހާލަތަށް ވައްޓާލައިގެން ރައީސުލްޖުމްހޫރިއްޔާ ވެރިކަން މި ހިންގަނީ"

ޕީޕީއެމްގެ ނައިބު ރައީސް ޝިޔާމު

ޝިޔާމު ވިދާޅުވީ އެއީ އިދިކޮޅުން އިންތިހާއަށް ކަންބޮޑުވާ މައްސަލައެއް ކަމަށެވެ.

މުޅި ނިޒާމު ވަކިގޮތަކަށް ބައްޓަންކޮށްގެން ރައީސް ޔާމިނަށް އަނިޔާކޮށް، އެމަނިކުފާނުގެ ހައްގުތަކަށް ސަރުކާރުން އަރައިގަންނަމުންދާ ކަމަށް އިދިކޮޅުން ވަނީ ބުނެފައެވެ.

ރައީސް ޔާމިނުގެ ސިއްޙީ ޙާލުކޮޅަށް ބެއްލެވުމެއް ނެތި ޝަރީއަތްތައް ދިގުދަންމަމުން ދާ ދިއުމާއި، އެމަނިކުފާނުގެ އިސްތިއުނާފީ މައްސަލައަށް ހުރަސްއެޅޭ ގޮތަށް ދަށުކޯޓުގައި އޮތް މައްސަލަ ކުރިއަށް ގެންދިއުމަށް ސަރުކާރުން ބާރުއަޅަމުންދާ ދިއުމުން ވެސް އެކަން ސާފުވާކަމަށް ޝިޔާމު ވިދާޅުވި އެވެ.