ޕާޓީތަކުގެ ނިޒާމުގެ ބޭނުމަކީ އަރާރުން ވުމެއް ނޫން؛ ޚިދުމަތް ކުރުން: ރައީސް ނަޝީދު

ދިވެހިރާއްޖޭގައި ގިނަ ސިޔާސީ ޕާޓީތަކެއް އެކުލެވޭ ނިޒާމެއް އުފެދިގެން އައީ އެއްބަޔަކު އަނެއް ބަޔަކާއި އަރައިރުން ވުމަށް ނޫން ކަމަށާ، އެހެން ނަމަވެސް އެއީ ރައްޔިތުންނަށް ޚިދުމަތް ކުރުމަށް އައި ނިޒާމެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ކުޅުދުއްފުށީ ސިޓީ ކައުންސިލަށް ދެ އަހަރު ފުރުމުގެ ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވިދާޅުވީ، ދިވެހިރާއްޖޭގައިވާ ގިނަ ސިޔާސީ ޕާޓީތައް އެކުލެވޭ ނިޒާމް ދިވެހިން ބަލައި ގަތީ ރަށްތަކަށާއި ރައްޔިތުންނަށް ސިޔާސީ ބާރުވެރިކަން ހޯދައިދިނުމަށް ކަމަށެވެ.

ގިނަ ޕާޓީ އެކުލެވޭ ނިޒާމުގެ ބޭނުމަކީ އަރާރުން ވުމެއް ނޫން. އަދި މައްސަލަޖެހި ޒުވާބު ކުރުމެއްވެސް ނޫން. ސިޔާސީ މަސައްކަތް ހިނގަމުންދާއިރުގައި، ޖޯޝާއި ޖަޒުބާތުގައި، އަބަދުވެސް ކޮންމެވެސް މިންވަރަކަށް ޒުވާބު އުފެދޭނެ. އެއީ ސިޔާސީ މަސައްކަތުގެ އެއް ޠަބީޢަތް. އެހެންނަމަވެސް، މި މަސައްކަތުގެ މާ ބޮޑު މަގުސަދެއް، އެއީ ޚިދުމަތް ކުރުން.

ރައީސް މުހައްމަދު ނަޝީދު

ރައީސް ނަޝީދު ވިދާޅުވީ، ރައްޔިތުންގެ އުއްމީދުތައް ފުރިހަމަށް ކޮށްދީ، ކުރިއެރުން ހޯދައިދިނުން ގުޅިފައިވަނީ ވެރިކަމާއި ކަމަށެވެ. އަދި އެ ވެރިކަމާއިމެދު ހިތްހަމަ ނުޖެހުމުން، ނުވަތަ، ވެރިކަމުން ފޯރުކޮށްދެމުންދާ ޚިދުމަތްތަކަށްވުރެ އިތުރު ޚިދުމަތްތަކެއް ބޭނުންވާނަމަ ފިޔަވަޅުތަކެއް އަޅަން ޖެހޭ ކަމަށްވެސް ވިދާޅުވި އެވެ.

އެގޮތުން، ކުޅުދުއްފުށީ ސިޓީ ކައުންސިލުގެ ހުރިހާ ކައުންސިލަރުން، ވެރިކަންކުރާ އެމްޑީޕީން ވީއްލިގެން، އައު ޕާޓީއާއި ގުޅުނު ގުޅުން ފާހަގަކުރައްވައި ރައީސް ނަޝީދު ވަނީ އެކަމަށް މަރުހަބާ ދަންނަވާފައެވެ. އަދި އެ ނިންމުމަކީ ވަކި މީހެއްގެ ތައްޕާހުގައި، ވަކި މީހަކު ދައްކާމަގުން ހިނގުމުގެ ބަދަލުގައި، އަމިއްލަ މިޝްރާބަކަށް، އަމިއްލަ ވިސްނުމާއި އެއްގޮތަކަށް ކުޅުދުއްފުށި ތަރައްގީ ކުރުމަށް ނިންމެވި ނިންމުމެއް ކަމަށްވެސް ނަޝީދު ވިދާޅުވި އެވެ.

"ވެރިކަން ކުރާ އެމްޑީޕީން ވީއްލިގެން، ތިޔަ ބޭފުޅުން ތިޔަ ކުރުއްވަން އުޅެނީ ބޮޑު ކަމެއް. އަޅުގަނޑު ވިދާޅުވާނީ، ބައްލަވާނެ ކަމެއް ނެތޭ، މިއީ ބޮޑު މުހައްމަދުގެ ބޮޑު ތިލަދުންމައްޗޭ، ތިބޭފުޅުން އަބަދުވެސް އުޅުއްވާނީވެސް، ކުރައްވާނީވެސް ބޮޑެތި ކަންކަން."

ރައީސް މުހައްމަދު ނަޝީދު

ރައީސް ނަޝީދު ވިދާޅުވީ އެމަނިކުފާނަކީ މިހާރުވެސް އެމްޑީޕީ މެންބަރެއް ކަމަށެވެ. އަދި އެޕާޓީ އުފެދުނީ ރައްޔިތުންނަށް އުއްމީދު ދެއްވައި، ރައްޔިތުންގެ އާންމު ހާލަތު ރަނގަޅުކޮށްދިނުމަށް ކަމަށެވެ. އެގޮތުން، 2008 ވަނަ އަހަރު، އެމަނިކުފާނުގެ ވެރިކަމުގައި ރައްޔިތުންނަށް ގިނަ ހައްގުތަކެއް ކަށަވަރުކޮށްދެއްވި ކަމަށްވެސް ވިދާޅުވި އެވެ.