ރައީސް ޞާލިހަށް ވައުދުތައް ފުއްދުނީ ބަސް މަދުކޮށްފަ އަމަލު ގިނަކުރީމަ: ސިޔާމު

ސިޔާސީ މައިދާނުގައި 5 ރައީސުންނާއެކު މަސައްކަތްޕުޅު ކުރެވިއްޖެ ކަމަށާއި، އެހެން ނަމަވެސް ވައުދުތައް އެންމެ ބާރު ސްޕީޑުގައި ފުއްދަވަމުން ގެންދެވި ލީޑަރެއްގެ ގޮތުގައި ފާހަގަކުރެއްވެނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުކަމަށް އެމްޑީއޭގެ ރައީސް އަހުމަދު ސިޔާމު މުޙައްމަދު ވިދާޅުވެއްޖެ އެވެ.

ސިޔާމު މިފަދައިން ވިދާޅުވެފައިވަނީ ރައިސް ޞާލިހުގެ ކެމްޕޭނަށް ކ އަތޮޅަށް ވަޑައިގެން އެ އަތޮޅު މާފުށީގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.

ސިޔާމު ވިދާޅުވީ ރައީސް ޞާލިހު ގެންދަވަނީ އެމަނިކުފާނު ވީ ވައުދުފުޅުތައް ފުއްދަވާ ތަރައްގީގެ މަސައްކަތްތައް ހަރު ދުވެލީގައި މުޅި ރާއްޖޭގައި ކޮށްދެއްވަމުން ކަމަށެވެ.

އެމަނިކުފާނުގެ ފަސް އަހަރުގައި ތަރައްގީގެ މަސައްކަތްތައް އެހާ ބާރު ސްޕީޑުގައި ކުރެވިގެން ދަނީ ރައީސް ޞާލިހުގެ ކިބައިގައި ހުންނަ ވަރަށް ޚާއްސަ ސިފަތަކުގެ ސަބަބުން ކަމަށާއި، ބަސް މަދުކުރުމާއި އަމަލު ގިނަ ކުރުމަކީ ފާހަގަކޮށްލެވޭ ސިފައެއްކަމަށް ސިޔާމު ވިދާޅުވި އެވެ.

އޭގެ އިތުރުން ރައީސް ޞާލިހުގެ ކެތްތެރިކަމާއި، މަޑުމައިތިރިކަމާއި ހިކުމަތްތެރިކަމަކީ ވެސް އެމަނިކުފާނުގެ ވެރިކަން ކާމިޔާބު ވެރިކަމަށް ވެގެންދިޔަ ސަބަބުތަކުގެ ގޮތުގައި ޝިޔާމު ފާހަގަކުރެއްވި އެވެ.

"ތިޔަ ބޭފުޅުން އަޑުއަހާނެ ވާހަކައެއް އެއީ ބަސް މަދުކުރާށޭ، އަމަލު ގިނަކުރާށޭ. އަޅުގަނޑުމެންގެ އިއްޒަތްތެރި ރައީސްގެ ކިބައިން އަޅުގަނޑަށް މިދިޔަ ފަސް އަހަރު ފެނިގެން ދިޔައީ ކެތްތެރިކަމުގެ އެންމެ މަތީ ދަރަޖަ. މަޑުމައިތިރިވުމުގެ އެންމެ މަތީ ދަރަޖަ. ކަންތައް ކުރުމުގައި އަވަސް އަރުވާލައިގެން ނޫޅި، އެކަންތައް ކުރަންޖެހޭ އެންމެ ރަނގަޅަށް ކުރީމާ މިބުނާ ކަންތައްތައް މި ހާސިލްވެގެން ދިޔައީ"

އެމްޑީއޭގެ ރައީސް ސިޔާމު

ސިޔާމު ރައީސް ޞާލިހަށް ތައުރީފު ކުރައްވާ ވާހަކަފުޅު ދައްކަވާފައިވާއިރު، ރައީސް ޞާލިހު ވަނީ އެމަނިކުފާނު ވެރިކަމަށް ވަޑައިގަތުމަށް ވެލެއްވި ވައުދުތަކުގެ ތެރެއިން 90 އިންސައްތަ ވައުދު ފުއްދަވާދެއްވާފައިވާ ކަމަށް ވިދާޅުވެފަ އެވެ.

އެމަނިކުފާނު ދެވަނަ ދައުރަކަށް ކުރިމަތިލަނީ އަމާން ރާއްޖެއެއް ހޯއްދަވާދެއްވުމަށް ކަމަށާއި، ވެރިކަމުގެ ފަސް އަހަރުގައި ވެސް އެކަމަށްޓަކައި މުހިންމު މަސައްކަތްޕުޅުތަކެއް ކޯށްދެވިއްޖެކަމަށް ރައީސް ޞާލިހު ވަނީ ވިދާޅުވެފަ އެވެ.