އެންމެ އުފާވަނީ އެމްޑީޕީ ތެރެއިން ލާދީނީ ފިކުރު ނެތި ދިޔައިމަ: ސިޔާމު
ސަރުކާރު ހިންގާ މައި ޕާޓީއާއި އެކު ކޯލިޝަން ހަދައި ރިޔާސީ ރޭހަށް ނިކުންނައިރު އެންމެ އުފާވަނީ އެ ޕާޓީ ތެރޭގައި މީގެ ކުރިން އޮތް "ލާދީނީ ފިކުރު" މިހާރު ނެތި ދިއުމުންކަމަށް އެމްޑީއޭގެ ރައީސް އަހުމަދު ސިޔާމު މުޙައްމަދު ވިދާޅުވެއްޖެ އެވެ.
ސިޔާމު މިފަދައިން ވިދާޅުވެފައިވަނީ މާފުށީގައި އޮތް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.
ސިޔާމު ވިދާޅުވީ މީގެ ކުރިން ވެރިކަން ކުރެއްވި ބައެއް ރައީސުލް އިސްލާމްދީނަށް ފުރައްސާރަކުރުމާއި ކީރިތި މާތް ނަބިއްޔާއަށް ކުޑައިމީސް ވާ ގޮތަށް އެތައް ފަހަރެއްގެ މަތިން ވާހަކަފުޅު ދައްކަވާފައިވާކަން ރައްޔިތުންގެ ހަނދާނުގައި ހުންނާނެ ކަމަށެވެ.
އެގޮތުން ރާއްޖެއިން ބޭރުގެ ގައުމުތަކަށް ވަޑައިގެން ވެސް އެ މޭރުމުން ވާހަކަފުޅު ދައްކަވާފައިވާކަމަށް ސިޔާމު ވިދާޅުވި އެވެ.
"އަޅުގަނޑުމެން އަޑުއަހައިފީމު މީގެ ކުރީގައި ބައެއް ރައީސުން ޕޯޑިއަމްތަނުގައި އަޅުގަނޑުމެންގެ މާތް ވެގެންދާ އިސްލާމްދީނަށް، އަޅުގަނޑުމެންގެ ރަސޫލާ (ސަލަވާތް) އަށް، ހަޖޫޖަހާ މަންޒަރު ފެނިފައި ދިވެހި ހުރިހާ ރައްޔިތުންނަށް ތިބޭނީ. އޭގެތެރެއިން ބައެއް ވެރިން ޑެންމާކަށް ގޮސް އެހެން ގައުމަށް ގޮސް އިސްލާމް ދީނަށް ހަޖޫ ޖެހުން މި އޮންނަނީ އެމީހުންނަށް އާންމު ކަމަކަށް ވެފައި"
އެމްޑީއޭގެ ރައީސް ސިޔާމު
ވަކި ބޭފުޅެއްގެ ނަން ވިދާޅު ނުވި ނަމަވެސް ޝިޔާމު އެ ނިސްބަތްކުރެއްވީ އެމްޑީޕީގެ ފުރަތަމަ ރައީސް މުޙައްމަދު ނަޝީދަށްކަން އެނގެއެވެ. އެއީ ނަޝީދު ޑެންމާކުގައި ހުންނަވާ ދައްކަވާފައިވާ އިސްލާމްދީނާއި ބީރައްޓެހި ވާހަކަފުޅުތަކުގެ ސަބަބުން އެމަނިކުފާނަށް ދީނީ އިލްމުވެރިންގެ ބޮޑެތި ފާޑުކިޔުންތަކެއް އަމާޒުވެގެން ދިޔައެވެ.
ނަޝީދުގެ އިސްތަށުފުޅުގައި "ލާދީނީ" ޓެގު އެޅުވިގެން ދިޔައީ ވެސް އެ ދުވަސްވަރު އެމަނިކުފާނު ދެއްކެވި ބައެއް ވާހަކަފުޅުތަކާއި ގުޅުވާ ބައެއް ސިޔާސީ ޕާޓީތަކުގައި ތިއްބެވި ދީނީ އިލްމުވެރިންގެ ފާޑުކިޔުންތަކުގެ ތެރެއިން ނެވެ.
އެކަންކަމަށް އިޝާރާތްކުރައްވާ ސިޔާމު ވިދާޅުވީ އެމްޑީޕީއާއި އެކު މިއަދު ކޯލިޝަން ހަދައިގެން ތިބިއިރު ލިބޭ އެންމެ ބޮޑު ހިތްހަމަޖެހުމަކީ އެމްޑީޕީގައި އޭރު އޮތް ލާދީނީ ފިކުރު މިހާރު ޕާޓީތެރެއިން ނެތިގެން ގޮސްފައިވާތީ އެވެ.
"އެމްޑީޕީގެ ތެރޭގައި އެމްޑީޕީގެ ތެރޭގައި ލާދީނީ ފިކުރު ނެތިގެން ދިއުމަކީ އަޅުގަނޑު އެންމެ އުފާކުރާ ކަންތައް، އަދި ދިވެހިރާއްޖޭގެ އެންމެހާ ރައްޔިތުން މިއަދު އުފާކުރަނީ އެކަމާ"
އެމްޑީއޭގެ ރައީސް ސިޔާމު
ސިޔާމު މިފަދައިން ވިދާޅުވެފައިވާއިރު އެމްޑީޕީގެ ރައީސްގެ މަޤާމުގައި ހުންނެވުމަށްފަހު ނަޝީދު ވަނީ އެ ޕާޓީ ދޫކުރައްވާ ވަޑައިގެންފަ އެވެ. އަދި ނަޝީދަށް ތާއީދުކުރާ ގިނަ މެމްބަރުންތަކެއް ވެސް ވަނީ އެ ޕާޓީ ދޫކުރައްވާ ވަަޑައިގެން އާ ސިޔާސީ ޕާޓީއެއް އުފައްދަވާފައެވެ.
އެމްޑީޕީ ތެރޭގައި އޮތް ލާދީނީ ފިކުރު ނެތިގެން ދިޔަކަމަށް ސިޔާމް އެ އިޝާރާތްކުރެއްވީ ނަޝީދާއި އޭނާގެ ވަފާތެރިން އެމްޑީޕީން ނިކުތުމަށްކަމަށް ބެލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
