ބިދޭސީންނަށް މިނިމަމް ވޭޖު ދިނުމަށްވުރެ މުހިންމީ ސިއްހީ ދާއިރާގެ މުސާރަ ބޮޑުކުރުން: ޝިފާއު

ދިވެހިރާއްޖޭގައި ތިބި ބިދޭސީ މަސައްކަތްތެރިންނަށް މިނިމަމް ވޭޖު ކަނޑައެޅުމަށްވުރެ މުހިންމީ ސިއްހީ ދާއިރާގެ މަސައްކަތްތެރިންގެ މުސާރަ ބޮޑުކުރުންކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެއެވެ.

އޭނާ މިފަދައިން ވިދާޅުވީ ވަޒީފާއާއ ބެހޭ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ހުށައަޅާފައިވާ ބިލަށް ބަހުސްކުރައްވަމުންނެވެ.

ޝިފާއު ވިދާޅުވީ، މިނިމަމް ވޭޖު ކަނޑައަޅާ، ގާނޫނެއްގެ ތެރެއިން އެންމެ ކުޑަ އުޖޫރަ ދޭން ފެށީ ދެ ފިޔަވައްސަކަށް ބަހާލއިގެންކަމަށެވެ. އަދި އެ ގާނޫނުގެ ދަށުން ދިވެހި މަސައްކަތްތެރިންނަށް މިނިމަމް ވޭޖެއް ކަނޑައަޅާފައިވާކަން އޭނާ ފާހަގަކުރެއްވިއެވެ. އަދި އެކަން ކުރީ އިގްތިސާދީ ގޮތުން ގައުމު އެންމެ ރަނގަޅު ހާލަތުގައި އޮތްވައި ނޫންކަންވެސް އޭނާ ފާހަގަކުރެއްވިއެވެ.

އެއާއެކު އޭނާ ވިދާޅުވީ، މިއަދުގެ ހާލަތަށް ބަލާއިރު، ގައުމުގެ އިގްތިސާދީ ހާލަތު މި އޮތީ ބދޭސީންނަށް މިނިމަމް ވޭޖު ކަނޑައަޅައި މުސާރަތައް ދެވޭ ވަރުގެ ހާލަތުގައި ތޯ ސުވާލުކުރެއްވުން މުހިންމުކަމަށެވެ.

އަދި ދިވެހިރާއްޖޭގައި ބިދޭސީ މަސައްކަތްތެރިން އިންތިހާއަށް ގިނަވެފައިވާއިރު، އެ އެންމެނަށް މިނިމަމް ވޭޖު ދިނުމުގެ ގާބިލުކަން ރާއްޖޭގެ އިގްތިސާދުގައި ހުރިކަމަށް ގަބޫލުނުކުރައްވާކަމަށް ޝިފާއު ވިދާޅުވިއެވެ.

އެހެން އެވާހަކަ ވިދާޅުވުމަށްފަހު ޝިފާއު ވަނީ މިހާރު އެންމެ މުހިންމީ ސިއްހީ ދާއިރާގެ މުސާރަ ބޮޑުކުރުންކަން ފާހަގަކޮށްފައެވެ. މިހާލަތުގައި ބިދޭސީންނަށް މިނިމަމް ވޭޖު ދިނުމަށްވުރެ ސިއްހީ ދާއިރާގެ މަސައްކަތްތެރިންގެ ޝަކުވާ އަހައި، އެ ފަރާތްތަކުގެ މުސާރަތައް ބޮޑުކޮށްދިނުން ބޭނުންތެރިކަމަށް އޭނާ ވިދާޅުވިއެވެ.

ބިދޭސީ މަސައްކަތްތެރިންނަށް މިނިމަމް ވޭޖު ދިނުމަށްވުރެ އެތައް ގޮތަކުން މާ މުހިންމުކަމެއް އަޅުގަނޑުމެންގެ ރާއްޖޭގައި މަސައްކަތްކުރާ ދިވެހި ސިއްހީ ޚިދުމަތްތެރިންނަށް ރަނގަޅު ހައްގު އުޖޫރަ މިހާރުން މިހާރަށްވެސް ދިނުން"

އިހަވަންދޫ ދާއިރާގެ މެމްބަރު މުހައްމަދު ޝިފާއު

ޝިފާއުގެ ވާހަކައިގައި ވަނީ މިހާރު ހުށައަޅާފައިވާ ގޮތަށް އެ ބިލު ފާސްކުރުމަށް ތާއީދުކުރައްވާކަމަށް ވިދާޅުވެފައެވެ.

މަޖިލީހަށް ހުށައަޅާފައިވާ ވަޒީފާއާއި ބެހޭ ގާނޫނަށް ހުށައަޅާފައިވާ އިސްލާހުގައި ވަނީ ބިދޭސީ މަސައްކަތްތެރިންނަށް މިނިމަމް ވޭޖު ކަނޑައެޅުން މުއްދަތެއް ނެތްގޮތަށް ފަސްކުރުމަށް ހުށައަޅާފައެވެ.

އެ އިސްލާހާއި ގުޅިގެން މަޖިލީހުގައި ހޫނު ބަހުސެއް ކުރިއަށްދާކަން ފާހަގަކޮށްލެވެއެވެ.