އެމީހާގެ ވޯޓު އެމީހާ ތަމްސީލުކުރާ ދާއިރާ ފޮއްޓަށް ނުލެވޭ މެމްބަރުން މަޖިލީހަށް ނުވަނުން ރަނގަޅީ: ތާރިގު

މެމްބަރުން ނިސްބަތްވާ ދާއިރާތައް ނޫން އެހެން ދާއިރާތައް ތަމްސީލުކުރެއްވުމަށް މަޖިލީހުގައި ތިއްބަވާތީ ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ފާޑުވިދާޅުވެއްޖެއެވެ.

ރައްޔިތުންގެ މަޖިލީހުގެ މެމްބަރުންގެ އަދަދު މަދުކޮށް، މެމްބަރުންގެ އަދަދު ހިފެހެއްޓުމަށް ގާނޫނު އަސާސީ އިސްލާހުކުރުމަށް ހުށައެޅި އިސްލާހަށް ވާހަކަދައްކަވަމުން ތާރިގު ވިދާޅުވީ އެ އިސްލާހަށް ދެތިންކަމެއް އިތުރުކުރުމަށް ހުށައަޅުއްވަން ބޭނުންފުޅުވާކަމަށެވެ.

އެގޮތުން މިހާރު މަޖިލީހުގައި ތިއްބެވި ބައެއް މެމްބަރުންނަކީ ކޮންޓްރެކްޓު އުސޫލުން ގޮނޑި ގަނެގެން މަޖިލީހަށް ވަދެވަޑައިގެން ތިއްބެވި މެމްބަރުކަމަށް އޭނާ ވިދާޅުވިއެވެ.

"ރައްޔިތުންގެ މަޖިލީހުގެ ބައެއް މެމްބަރުންނަކީ އެ މެމްބަރު ހިމެނޭ ދާއިރާ ނޫން އެހެން ދާއިރާތަކަށް ކުރިމަތިލައިގެން ކޮންޓްރެކްޓް އުސޫލުން ރައްޔިތުންގެ މަޖިލީހަށް ވަދެތިބޭ ބައެއް"

މަހިބަދޫ ދާއިރާގެ މެމްބަރު ތާރިގު

އެކަމާއި ނުރުހުން ފާޅުކޮށް ތާރިގު ވިދާޅުވީ ގާނޫނު އަސާސީ އިސްލާހުކުރާ ބިލު މަޖިލީހަށް ހުށައެޅުއްވި ގާސިމް އިބްރާހިމްގެ ސަމާލުކަމަށްވެސް އެކަން ގެނެސްފައިވާނެކަމަށެވެ.

އެގޮތުން އޭނާ ނިސްބަތްވެ ވަޑައިގަންނަވާ ދާއިރާއާއި ޖެހިގެން އޮތް ދަނގެތީ ދާއިރާއަށް އެ ދާއިރާގެ ރައްޔިތަކު ނޯމިނޭޓްކޮށްދިނުމަށް އެދުނުކަމަށާ، އެހެން ނަމަވެސް ގާސިމް އެގޮތަށް އަމަލު ނުކުރައްވާ ދާއިރާއާއި ގުޅުމެއް ނެތް މެމްބަރަކު ޖުމްހޫރީ ޕާޓީގެ ފަރާތުން އެންޑޯސްކޮށް މަޖިލީހަށް ހޮއްވަވާދެއްވުމުން، އެ ބޭފުޅާ އޭރު ހުންނެވި ޖުމްހޫރީ ޕާޓީއިން ވަކިވެވަޑައިގެން އަމިއްލަ ޕާޓީއެއް އުފައްދަވާފައިވާކަންވެސް ތާރިގު ފާހަގަކުރެއްވިއެވެ. އަދި ވިދާޅުވީ އެއީ ދަނގެތީ ދާއިރާގެ ރައްޔިތުން ކަންބޮޑުވާ އަދި ޝަކުވާ ކުރަމުންދާ މައްސަލައެއްކަމަށެވެ.

"އަޅުގަނޑުގެ ދާއިރާއާއި ޖެހިގެން އޮތް ދާއިރާގެ ރަށްތަކަށްވާތީ މި ދަންނަވާލަނީ އެ ރައްޔިތުންގެ ޝަކުވާތަކެއް އެބަހުރި. މިހާރުވެސް ޖުމްހޫރީ ޕާޓީގެ ފަރާތުން ދަނގެތީ ދާއިރާއަށް އޭރު އިންތިޚާބު ކުރި މެމްބަރު ވަނީ ޕާޓީއެއް އުފައްދައިގެން ގޮސްފަ. އެ ދާއިރާގެ ރައްޔިތުންގެ ޝަކުވާތައް އެބަހުރި. ޖުމްހޫރީ ޕާޓީގެ ލީޑަރަށް ތަކުރާރުކޮށް ދެންނެވިން އަރިއަތޮޅުން ރައްޔިތުންގެ މަޖިލީހަށް އިންތިޚާބުކޮށްދޭށޭ އެ އަތޮޅުގެ މީހަކު"

މަހިބަދޫ ދާއިރާގެ މެމްބަރު ތާރިގު

ތާރިގު އިތުރަށް ވިދާޅުވީ އެ މީހާގެ ދާއިރާގެ ނޫން އެހެން ދާއިރާއަކުން މަޖިލީހަށް އިންތިޚާބުވާ މެމްބަރުން ގިނަ ފަހަރަށް، ދާއިރާގެ ކަންކަން ބަލަމުން ނުދާކަމަށެވެ. އަދި ދާއިރާއަށް ކުލުނެއްވެސް ލޯތްބެއްވެސް ނޯންނަކަމަށެވެ.

އެހެންކަމުން މަޖިލީހަށް އިންތިޚާބުވުމަށް، އެމީހާ ނިސްބަތްވާ ދާއިރާ ނޫން އެހެން ދާއިރާތަކުން ކުރިމަތި ލުމުގެ ފުރުސަތު އޮވެގެން ނުވާނެކަމަށް ތާރިގު ވިދާޅުވިއެވެ.

"އެމީހަކުގެ ވޯޓު އެ މީހާގެ ދާއިރާގެ ފޮއްޓަށް ނުލެވޭ މީހުން މަޖިލީހަށް ނައިއްޔާ ރަނގަޅުވާނީ"

މަހިބަދޫ ދާއިރާގެ މެމްބަރު ތާރިގު

އޭގެ އިތުރުން ތާރިގުގެ ވާހަކައިގައިވަނީ މާލެއަށް މީހުން ޖަމާވާގޮތަށް ސަރުކާރުތަކުން ކަންކަން ކުރުމަށްފަހު މާލެ އަތޮޅަށް ގޮނޑި އިތުރުވާ ގޮތް ހެދުމާއި ގުޅިގެންވެސް ނުރުހުން ފާޅުކޮށްފައެވެ. އަދި ދަފްތަރުގައި ޖެހޭ ފަރާތްތައް އެކި ފަހަރު އެކި ދާއިރާއަށް ރަޖިސްޓްރީ ވާން ޖެހޭ އުސޫލަކީވެސް އެ ރައްޔިތުންނަށް ވަރަށް ބޮޑު ތަކުލީފެއްކަމަށާއި، މިފަދަ ބިލެއް ހުށައެޅިގެންދާއިރު، އެ ކަންކަމަށް ރިއާޔަތްކުރުން މުހިންމުކަން އޭނާ ފާހަގަކުރެއްވިއެވެ.