ޝަކުވާ ކުރާނީވެސް އެކަން ހައްލު ކުރުމުގެ ގާބިލްކަން ހުރި މީހެއް ކައިރީ: ހުސައިން

އަދުގެ ސަރުކާރާއިމެދު ރައްޔިތުންގެ ޝަކުވާއެއް ނެތް ކަމަށް ސަރުކާރުން ބުނާއިރު، ޝަކުވާ ކުރާނީ އެކަން ހައްލު ކުރުމުގެ ގާބިލްކަން ހުރި މީހެއް ކައިރީގައި ކަމަށް ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު (ސެމްބެ) ވިދާޅުވެއްޖެެއެވެ.

ރައްޔިތުންގެ މަޖިލީހުގެ މެމްބަރުންގެ އަދަދު މަދުކޮށް ވަކި ވަރެއްގައި ހިފެހެއްޓުމަށް ގާނޫނު އަސާސީ އިސްލާހުކުރުމަށް ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރާހިމް ހުށައެޅި އިސްލާހަށް ވާހަކަދައްކަވަމުން ސެމްބެ ވިދާޅުވީ، ސިޔާސީ މަގާމުތައް މަދުކުރާ ވާހަކަ އިދިކޮޅުން ހުއްޓުމެއްނެތި މަޖިލީހުގައި ދައްކަވަމުންދާކަމަށެވެ.

އެހެން ނަމަވެސް އެފަދައިން ވާހަކަދައްކަވަމުން ދާއިރުވެސް، ރިޔާސީ އިންތިހާބާއި ދިމާކޮށް، ސިޔާސީ މަގާމުތަކާއި، ދައުލަތުގެ ކުންފުނި ތަކާއި ނުބައްދަލަށް ވަޒީފާތައް ދެމުންދާ ކަމަށްވެސް ސެމްބެ ވިދާޅުވިއެވެ.

ސިޔާސީ މަގާމްތައް މަދުކުރާ ވާހަކަ އަޅުގަނޑުމެން ހުއްޓުމެއްނެތި މިތަނުގައި ދައްކަމުން މިދަނީ. ދައްކަމުންދާއިރު ސިޔާސީ މަގާމުތަކުގެ އިތުރަށް ދައުލަތުގައި ހުރި ކުންފުނި ތަކާއި ނުބައްދަލަށް އެއޮއް ވަޒީފާތައް އޮއްސާލަނީ، ތިރީސް ހާހުން، ވިހި ހާހުން، ދިހަ ހާހުން. ކީއްކުރަންތޯ؟ ރިޔާސީ އިންތިހާބާއި ދިމާކޮށް. ކޮންތާކުންތޯ ކުންފުނި ތަކުން ފައިސާ ނެރެފައި، ވަޒީފާތަކަށް ނުކުންނަ ފަރާތްތަކަށް މުސާރަދެނީ. ކިހިނަކުންތޯ ހޯދަނީ؟ މިވެސް ބަލާލަންޖެހޭ ކަންތައްތައް.

ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު

ސެމްބެ އިތުރަށް ވިދާޅުވީ މިވީހާ ދުވަހުވެސް ހައްގުތަކަށް ވަކާލާތުކުރަމުން އައީ އެމްޑީޕީ ކަމަށެވެ. ހައްގުތަކުގެ ހުރިހާ ބައްޕައިންނާއި މަންމައިންވެސް ތިބީ އެ ޕާޓީތެރޭގައި ކަމަށް ވާހަކަދައްކާއިރު، ހައްގުތަކުގެ ތެރެއިން އެންމެ މުހިއްމު ކަންތައް ކަމަށްވާ ހައްގުތައް ކަވަރުކުރުމުންވެސް އެމްޑީޕީއަށް ލިބޭނީ ސުމެއް ކަމަށް އޭނާ ވިދާޅުވިއެވެ.

މީގެ އިތުރުން، އެމްޑީޕީން އެ ޕާޓީގެ ހުރިހާ ފަލްސަފާ ދޫކޮށްލައި  ވެރިކަމާއި ކޯޅެމުންދާ ކަމަށާ، ޕާޓީގެ އެތޭރެގެ ހާލަތުވެސް ނުހަނު ގޯސް ކަމަށް ސެމްބެ ވިދާޅުވިއެވެ. އަދި އެ ޕާޓީން ވެރިކަމަށް އައުމުގެ ކުރިން ރައްޔިތުންނަށް ވީ ވައުދުތަކާއި ރައްޔިތުން މަތިންވެސް ހަނދާނެއް ނެތް ކަމަށް ވިދާޅުވެ އޭނާ ވަނީ އެމްޑީޕީ އަށް ފާޑުވިދާޅުވެފައެވެ.

ދެން ދެކުނުގެ އަތޮޅުތަކުގެ ރައްޔިތުންނާ ބައްދަލު ކުރައްވާފައި ވިދާޅުވަނީ އެއްވެސް ޝަކުވާއެއް ނެތޭ. ކިހާ އުފާވެރި ވާހަކައެއްތޯ؟ ޝަކުވާ އުފުލާނީވެސް އިއްޒަތްތެރި ރައީސް، އަޅުގަނޑު ވެސް ގޮއްސަ އަޅުގަނޑު ބައްޕަ ކައިރީގައި އަޅުގަނޑު އެއްބަނޑު އެއްބަފާ އެހެން މީހުންގެ ޝަކުވާއެއް ނޫނީ ދައްތަ މެންގެ ޝަކުވާއެއް އުފުލާނީ، އަޅުގަނޑުގެ ބައްޕަ ގައިގައި އެކަން ހައްލު ކުރުމުގެ ގާބިލް ކަން ހުރެއްޖެއްޔާ ދެއްތޯ؟ އަޅުގަނޑު ތަސައްވުރު ފުދިފައިވާ މީހެއް ނަމަ އަޅުގަނޑު ގޮސް އެ ޝަކުވާ އުފުލާނީ އެ ބައްޕަ ގައިގައި އެ ގާބީލުކަން، ހައްލު ކުރުމުގެ އެކަންކަމާ ވަކާލާތު ކުރާ، ވާހަކަ ދެއްކުމުގެ، ސުލްހަ ކުރުމުގެ މަސްލަހަތު ނެގެހެއްޓޭ ވަރުގެ ބޭފުޅަކަށް އެބޭފުޅާ ވައްޏާމު ދެއްތޯ؟

ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު

އެހެން ނަމަވެސް މިހާރު ރައްޖޭގެ ރައީސުލްޖުމްހޫރިއްޔާ ކަމުގައި ހުންނެވީ އެފަދަ ބައްޕައެއް ނޫން ކަމަށާ، މިހާރުން މިހާރަށްވެސް ރައީސް ޞާލިހު އިސްތިއުފާ ދެއްވަން ޖެހޭނެ ކަމަށް ސެމްބެ ވިދާޅުވިއެވެ. އަދި ސަރުކާރާއި ދެކޮޅަށް ސަރުކާރުގެ ކޯލިޝަންގައި ހިމެނޭ ޕާޓީތަކުންނާއި، އެމްޑީޕީގެ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަންގައި ހިމެނޭ ބޭފުޅުންވެސް ތެދުވަންޖެހޭނެ ކަމަށް އޭނާ ވިދާޅުވިއެވެ.