މިއަދު ނުކުމެގެން ދާންޖެހުނަސް ހިތްހަމަޖެހޭ ވަރަށް ކަންތައް ކޮށްދެވިއްޖެ: މަހުލޫފް
މިއަދު ނުކުމެގެން ދާންޖެހުނަސް ވަރަށް ހިތްހަމަޖެހިލައިގެން ހުރެގެން ދެވޭ ވަރަށް ކަންކަން ކޮށްދެވިއްޖެ ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެއެވެ.
މަހުލޫފް މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ކުޅިވަރުގައި ހޯދުނު ކާމިޔާބީތަކާ ގުޅޭގޮތުން ހޯރަފުށީ ދާއިރާގެ މެންބަރު އަހްމަދު ސަލީމް ކުރެއްވި ސުވާލަކަށް ޖަވާބުދެއްވަމުންނެވެ.
"ކޮބާތޯ ކުޅިވަރުގެ ދާއިރާއަށް މިހާތަނަށް ހޯދުނު ކާމިޔާބީ އަކީ، ކޮބާތޯ ނިންމެވުނު މަސައްކަތް ތަކަކީ" މެންބަރު ސަލީމް ސުވާލުކުރެއްވިއެވެ.
ސަލީމް ކުރެއްވި ސުވާލަށް ޖަވާބުދެއްވަމުން މަހުލޫފް ވިދާޅުވީ ކުޅިވަރަށް ކުރެވުނު މަސައްކަތް ތަކަށް ބަލާނަމަ "މިއަދު މިތަނުން ނުކުމެގެން ދާންޖެހުނަސް ވަރަށް ހިތްހަމަޖެހިލައިގެން ހުރެގެން" ދެވޭ ވަރަށް ކަންކަން ކޮށްދެވިއްޖެ ކަމަށެވެ.
އެގޮތުން ކުޅިވަރުގައި ހޯދުނު އެންމެ ބޮޑު ކާމިޔާބީއަކީ ނުކުޅެދުންތެރިކަން ފަރާތްތައް ކުޅިވަރުގެ ތެރޭގައި ބައިވެރިވެ ވާދަކުރުމުގެ ފުރުސަތު ގާއިމުވެގެން ދިއުން ކަމަށް މަހްލޫފް ވިދާޅުވި އެވެ.
އަދި ދުވަހަކުވެސް ރާއްޖޭގެ ކުޅިވަރުގެ އިންފްރާސްޓްރަކްޗާގެ މަސައްކަތް ނުކުރާވަރަށް މި ސަރުކާރުން މަސައްކަތް ކޮށްފައިވާ ކަމަށް ވިދާޅުވި އެވެ.
"ދުވަހަކުވެސް މީގެ ކުރިން އެއްވެސް ސަރުކާރެއްގައި ނެތޭ އެންމެ ބޮޑު ދަނޑެއްވެސް ތަރައްގީކޮށްފަ، އެންމެ ދަނޑެއްވެސް، މީ ހަމަ ފެންނަން ހުންނާނެ ކަންކަން. މިއަދު އަޅުގަނޑުމެން 40 ދަނޑު ނިންމައި 85 ދަނޑުގެ މަސައްކަތް އެބަ ކުރަން، ވޮލީ ކޯޓެއް އައުޓްޑޯ، އެންމެ ސަރުކާރެއްގައި ވެސް އަޅާފައެއް ނޯންނާނެ، ސްކޭޓް ޕާކެއް އަޅައިދިން ސަރުކާރެއް ނޯންނާނެ، ސާފް ޓްރެކެއް އަޅައިދިން ސަރުކާރެއް ނޯންނާނެ."
މިނިސްޓަރު އަހުމަދު މަހުލޫފް
މަހްލޫފް ވިދާޅުވީ، ރާއްޖޭގައި ފުރަތަމަފަހަރަށް ސާފިންނަށް ކޯޗެއް ވެސް ހޯދައި ދީފައިވަނީ މީގެ ދެދުވަސް ކުރިން ކަމަށެވެ. މީގެ ކުރިން ކޯޗު ވެސް ހުންނަންޖެހެނީ ހަމައެކަނި ފުޓުބޯޅައިގަ ކަމަށާ، ކުޅިވަރުގައި އަންހެނުންނާއި ފިރިހެނުންނާއި ދެމެދު އޮންނަ ތަފާތު ނައްތާލައި، ކުޅިވަރު ތަކުގެ މެދުގައި އޮންނަ ތަފާތު ނައްތާލައި ހަމަހަމަ ފުރުސަތު ހޯދައި ދިނީ މި ސަރުކަާރުން ކަމަށެވެ.
މި ސަރުކާރު ފިޔަވައި އެހެން އެއްވެސް ސަރުކާރަކުން ރާއްޖޭގައި ސްކޭޓް ޕާކެއް ގާއިމުނުކޮށްދޭ ކަމަށް މަހްލޫފް ވިދާޅުވި ނަމަވެސް ހުޅުމާލޭގެ ސްކޭޓް ޕާކު ގާއިމުކުރީ ކުރީގެ ރައީސް ޔާމީންގެ ވެރިކަމުގަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
