ހައްޔަރުކުރި މީހުން އުޅުނީ އައިއެސް އާއި ގުޅިގެން ގިނަބަޔަކު މަރާލަން: ފުލުހުން

އައްޑުއާއި މާލެއާއި ކ. ގުރައިދޫގައި ސިފައިންނާއި ފުލުހުން ގުޅިގެން ހިންގި ކައުންޓާ ޓެރަރިޒަމް އޮޕަރޭޝަނުގައި ހައްޔަރު ކުރި މީހުން ރާވަމުންދިޔައީ އިސްލާމިކް ސްޓޭޓް (އައިއެސް) ޖަމާއަތާއި ގުޅިގެން ޓެރަރިސްޓު ހަމަލާއެއްދީ ގިނަ ބައެއްގެ ފުރާނަ ގެއްލުވާލަން ކަމަށް ފުލުހުން ވިދާޅުވެއްޖެއެވެ.

ޓެރަރިޒަމާއި ދެކޮޅަށް މާލެސިޓިއާއި އައްޑޫ ސިޓީ އަދި ކ.ގުރައިދޫގައި ފުލުހުންނާއި ސިފައިން ދާދިފަހުން ހިންގި އޮޕަރޭޝަނެއްގައި 14 މީހަކު ހައްޔަރު ކޮށްފައިވާ ކަމަށް ފުލުހުން ވަނީ ބުނެފައެވެ.

އަދި ފުލުހުންގެ މި އޮޕަރޭޝަނާއި ގުޅޭގޮތުން މަޢުލޫމާތު ދިނުމަށް އިސްކަންދަރު ކޮށީގައި ބޭއްވި ޕްރެސްކޮންފަރެންސްގައި ޓެރަރިޒަމް އެންޑް ވަޔަލަންޓް އެކްސްޓްރީމިޒަމް އިންވެސްޓިގޭޝަން ޔުނިޓުގެ ހެޑް އިންސްޕެކްޓަރ އޮފް ޕޮލިސް އުސްވަތު އަޙްމަދު ވިދާޅުވީ، ހައްޔަރުކުރި މީހުންނަކީ ޓެރަރިސްޓު ޖަމާޢަތެއްކަމަށްވާ އައިއެސް ޖަމާއަތާއި ގުޅިގެން، ޓެރަރިޒަމް ހަމަލާތަކެއް ދީ ގިނަ ބައެއްގެ ފުރާނަ ގެއްލުވާލުމަށް މަސައްކަތްކުރި ބައެއްކަމަށެވެ.

"މިފަރާތްތަކުން ރާވަމުން ދިޔައީ ގޮވާތަކެތި ބޭނުންކޮށްގެން ދިވެހިރާއްޖޭގެ ތަންތަނަށް ހަމަލާދީ ގިނަ ބައެއްގެ ފުރާނައަށް ނުރައްކާވާ ފަދަ ހަމަލާއެއް ދިނުމަށް ކަން ފާހަގަކުރެވިފައިވޭ،" އުސްވަތު ވިދާޅުވި އެވެ.

މި މައްސަލާގައި ފުލުހުން ތިން ސަރަހައްދަކުން މީހުން ހައްޔަރު ކޮށްފައި ވީ ނަމަވެސް އެ އެންމެންނަކީވެސް އައްޑޫ ސިޓީއަށް ނިސްބަތްވާ ފިރިހެނުން ކަމަށް އުސްވަތު ފާހަގަކުރައްވާފައިވެއެވެ.

އަދި މި އޮޕްރޭޝަންގެ ތެރެއިން އައްޑޫއިން 10 މީހުން ހައްޔަރުކޮށް 11 ގެއެއް ބަލައި ފާސްކޮށްފައިވާކަމަށާއި، މާލެއިން 2 މީހުން ހައްޔަރުކޮށް 4 ގެއެއް ބަލައި ފާސްކޮށްފައިވާކަމަށާއި، ކ.ގުރައިދޫއިން 2 މީހުން ހައްޔަރުކުރިކަމަށް އުސްވަތު ވިދާޅުވިއެވެ.

މީގެ އިތުރުން އުސްވަތު ވިދާޅުވީ ހައްޔަރުކުރި 14 މީހުންގެ ތެރެއިން 9 މީހުންނަކީ ޓެރަރިޒަމްގެ މައްސަލައިގެ ރެކޯޑް އޮތް މީހުންކަމަށާ، އެމީހުންގެ ބަންދަށް މުއްދަތު އިތުރުކޮށްފައިވާކަމަށެވެ.

އުސްވަތު ވިދާޅުވީ މިހާތަނަށް ތަހުގީގަށް އެނގިފައިވާގޮތުގައި މިއީ ގޮވާ ތަކެތި ބޭނުންކޮށް ގިނަބައެއްގެ ފުރާނައަށް ގެއްލުން ދިނުމަށް ރާވަމުންދިޔަ ބައެއްކަމަށެވެ. އެގޮތުން ހަމަލާ ދިނުމަށްޓަކައި ބޭނުންކުރަން ތައްޔާރުކުރަމުން ދިޔަ ބައެއް ތަކެތި ފުލުހުންގެ ބެލުމުގެ ދަށަށް ގެނެވުނު ކަމަށާއި އޭގެ ތެރޭގައި ބޮމުގެ ހަމާލާއެއް ދިނުމުގެ ބައެއް ސާމާނުކަމަށް ބެލެވޭ ތަކެތި ވެސް ހިމެނޭ ކަންވެސް އޭނާ ފާހަގަކުރެއްވިއެވެ.

އެހެންނަމަވެސް އެ ހަމަލާދޭން އުޅުނީ ކޮން ތަނަކަށް ނޫނީ ސީދާ ވަކި ބަޔަކަށް އަމާޒުކޮށްގެންތޯ ވެސް މި ވަގުތު ހާމަކުރެވެން ނެތް ކަމަށް އުސްވަތު ވިދާޅުވި އެވެ.

"އެކަމަކު އެ ހަމަލާ ކާމިޔާބުވި ނަމަ، ގިނަ ބައެއްގެ ފުރާނަ ގެއްލިގެން ދިޔުމުގެ ފުރުސަތު ބޮޑު. އެހެންވެ އަޅުގަނޑުމެން މި އޮޕަރޭޝަން ޑިސްރަޕްޓިވް އޮޕަރޭޝަނެއްގެ ގޮތުގަ ކުރިއަށް ގެންދިޔައީ،" އޭނާ ވިދާޅުވި އެވެ.