އެމްއެމްޕީއާރުސީ ޚިޔާނާތުގެ ތަހުގީގަށް ދުންޔާ އޭސީސީއަށް ހާޒިރުކުރަނީ

އެމްއެމްޕީއާރުސީ ޚިޔާނާތުގެ މައްސަލައިގެ ތަހުގީގަށް ކުރީގެ ފޮރިން މިނިސްޓަރ ދުންޔާ މައުމޫން އެންޓި ކޮރަޕްޝަން ކޮމިޝަން (އޭސީސީ)އަށް ހާޒިރުވުމަށް އަންގައިފިއެވެ.

މައުލޫމާތު ލިބިފައިވާ ގޮތުގައި އޭސީސީން ދުންޔާ ހާޒިރު ކުރުމަށް ހަމަޖެހިފައިވަނީ މިއަދު ހެނދުނު 11 ޖަހާއިރަށެވެ.

މީގެ ކުރިންވެސް މިމައްސަލައިގެ ތަހުގީގަށް ދުންޔާ ހާޒިރުވުމަށް އޭސީސީން އަންގާފައިވެއެވެ. ނަމަވެސް ދުންޔާގެ ފަރާތުން އޭސީސީއަށް ޙަޒިރުވެފައިވަނީ އޭނާގެ ޤާނޫނީ ވަކީލެވެ.

އެމްއެމްޕީއާރުސީގެ ތަހުގީގަށް ކުރީގެ ވެރިކަމުގައި ވަޒީރުކަން ކުރެއްވި ބޭފުޅުންނާއި، މިވެރި ކަމުގައި ވަޒީރުކަން ކުރަމުންދާ ބައެއް ބޭފުޅުންގެ އިތުރުން، ނިމިދިޔަ މަޖިލީހުގެ މެންބަރުންގެ ތެރެއިން ބައެއް މެންބަރުންވެސް ވަނީ މީގެ ކުރިން ހާޒިރުކޮށް ސުވާލުކޮށްފައެވެ.

އެމް.އެމް.ޕީ.އާރު.ސީ މެދުވެރިކޮށް ހިންގާފައިވާ ވައްކަމާއި ޚިޔާނާތުގެ މައްސަލައިގައި ބައިވެރިވިކަމަށް ނުވަތަ މަންފާ ލިބުނުކަމަށް ތުހުމަތުކުރެވޭ 281 މީހެއްގެ ނަން ރައްޔިތުންގެ މަޖިލީހުން އާންމުކުރި ލިސްޓުގައި ހިމެނެއެވެ. އޭގެ ތެރޭގައި ދަޢުލަތުގެ އެކިއެކި މަޤާމުގައި ތިބި 119 މީހަކު ހިމެނެއެވެ. މީގެ ތެރޭގައި މިހާރު ރައްޔިތުންގެ މަޖިލީހުގެ މެންބަރުންގެ ތެރެއިން 16 މެންބަރަކުވެސް ހިމެނެއެވެ.

އެމްއެމްޕީއާރުސީ ޚިޔާނާތާ ގުޅިގެން ގެއްލިފައިވާ ފައިސާ އަނބުރާ ހޯދުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ވައުދެކެވެ. އަދި މި އަހަރުގެ ޖުމްހޫރީ ދުވަހުގައި އޮތް ރަސްމިއްޔާތުގައިވެސް ރައީސް ޞާލިޙުވަނީ އެ ފައިސާ އަނބުރާ ހޯދުމަށް ސަރުކާރުން މަސައްކަތްކުރަމުން އަންނަ ކަމަށް ވިދާޅުވެފައެވެ.

ނަމަވެސް އެ ފައިސާ ލޯންޑާކުރިކަމަށް ތުހުމަތުވާ އެސްއޯއެފް ކުންފުނީގެ ހިއްސާދާރުން ރާއްޖެއަށް ގެނައުމަށް އިންޓަޕޯލް މެދުވެރިކޮށް ނެރެފައިވާ ރެޑް ނޯޓިސްތައް ކެންސަލްކުރީ މި ސަރުކާރުގައެވެ.

އަދި އެ ޚިޔާނާތާ ގުޅިގެން ކުރެވުނު ދައުވާތަކަށް އިއުތިރާފުވެވަޑައިގެންނެވި ކުރީގެ ނައިބުރައީސް އަޙްމަދު އަދީބާއި އެމްއެމްޕީއާރުސީގެ ކުރީގެ އެމްޑީ ޒިޔަތުގެ މައްޗަށް ޖަލު ހުކުމްތަކެއް އިއްވާފައިވަނިކޮށް އެ ބޭފުޅުން ގޭ ބަންދަށް ބަދަލުކޮށްފައިވަނީވެސް މި ސަރުކާރުންނެވެ.