ކުޅުނު 6 މެޗުން ވެސް މޮޅުވެ، ގުރޫޕްގެ އެއްވަނަ ޓީމުގެ ގޮތުގައި ސިޓީ ދެވަނަ ބުރަށް

ޔުއެފާ ޗެމްޕިއަންސްލީގު ގްރޫޕް ޖީގައި ބުދަ ދުވަހުގެރޭ ރަށުން ބޭރުގައި 3-2 ގެ ނަތީޖާއަކުން ސާބިއާގެ ކްރްވެނާ ޒެވޭޒްޑާ ބަލިކޮށް، އެންމެ ފަހުގެ ޗެމްޕިއަން މެންޗެސްޓާ ސިޓީ އިން ގުރޫޕްގެ އެއްވަނަ ޓީމުގެ ގޮތުގައި މުބާރާތުގެ ދެވަނަ ބުރުން ޖާގަ ހޯދައިފިއެވެ.

މިރޭގެ މެޗަށް ނުކުތްއިރު ވެސް ގުރޫޕްގެ އެއްވަނަ މެންޗެސްޓާ ސިޓީއަށް ކަށަވަރުވެފައިވާއިރު، އެޓީމުން މިމެޗަށް ނިކުތީ ވެސް ބަދަލުތަކަކާއި އެކުގައެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މެންޗެސްޓާ ސިޓީ އިން މިމެޗުގައި ލީޑު ހޯދީ 19 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އިގިރޭސި ޒުވާން މިޑްފީލްޑަރު  މީއިކާ ހެމިލްޓަން އެވެ. މިއީ އެޓީމުގެ ޕޯޗުގަލް މިޑްފިލްޑަރު މެތިއަސް ނުނޭސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން މެންޗެސްޓާ ސިޓީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ފުރަތަަމަ ފެނިގެންދިޔައީ ސިޓީގެ ލަނޑެކެވެ. މިލަނޑު މެޗުގެ 62 ވަނަ މިނެޓުގައި ކާމިޔާބުކޮށްދިނީ ނޯވޭގެ ޒުވާން މިޑްފީލްޑަރު އޮސްކާ ބޮބް އެވެ. މިއީ އިގިރޭސި ޒުވާން ޑިފެންޑަރު ރިކޯ ލުވިސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ކްރްވެނާ ޒެވޭޒްޑާ އިން ނަތީޖާގެ ފަރަގު ކުޑަކުރި ލަނޑު މެޗުގެ 76 ވަނަ މިނެޓުގައި ކާމިޔާބުކޮށްދިނީ ސައުތު ކޮރެއާގެ މިޑްފީލްޑަރު އިން ބީއޯމް ހުވާންގް އެވެ. މިއީ އެޓީމުގެ ގާނާ ފޯވާޑް އުސްމާން ބުކަރީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިމެޗުގައި ސިޓީ އިން ކާމިޔާބުކުރި ތިންވަނަ ލަނޑު މެޗުގެ 85 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ އިގިރޭސި މިޑްފީލްޑަރު ކެލްވިން ފިލިޕްސް އެވެ. ނަމަވެސް މެޗުގެ އިތުރު ވަގުތުގެ ތެރޭގައި ކްރްވެނާ ޒެވޭޒްޑާ އިން ވަނީ އިތުރު ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ސާބިއާގެ ފޯވާޑް އެލެގްޒެންޑަރ ކަޓިއާ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 3-2 ގެ ނަތީޖާއަކުން މެންޗެސްޓާ ސިޓީ ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު 6 މެޗުން ސިޓީއަށް 18 ޕޮއިންޓް ލިބިފައިވާއިރު އެޓީމު ގްރޫޕް ސްޓޭޖުގެ މެޗުތައް ނިންމާލީ ގުރޫޕް ޖީގެ އެއްވަނައިގައެވެ. އަދި މިމެޗުން ބަލިވި ކްރްވެނާ ޒެވޭޒްޑާ ކުޅުނު 6 މެޗުން ލިބުނު އެއް ޕޮއިންޓާއެކު އެޓީމު މުބާރާތް ނިންމާލީ ގުރޫޕްގެ ފުލުގައި އޮވެއެވެ.