މުޖުތަމަޢު އިސްލާހު ކުރެވޭނީ އީމާންކަން ވަރުގަދަކޮށް، ޣައިބުގައިވާ ކަންކަމަށް ފުރިހަމައަށް އީމާންވެގެން: ޚުތުބާ

މުޖުތަމަޢު އިސްލާހު ކުރެވޭނީ އީމާންކަން ވަރުގަދަކޮށް، ޣައިބުގައިވާ އެންމެހައި ކަންކަމަށް ފުރިހަމައަށް އީމާންވެގެން ކަމަށް މިއަދުގެ ޚުތުބާގައި ބުނެފިއެވެ.

އީމާންކަން ހަރުދަނާ ކުރުމުގެ މައްޗަށް އަލިއަޅުވާލައި މިއަދު އިއްވި ޚުތުބާގައި ބުނީ އިންސާނާގެ ކާމިޔާބީއާއި ބާއްޖަވެރިކަންވަނީ، މާތް الله އަށް ފުރިހަމައަށް އީމާންވެގެން ކަމަަށެވެ.

މި އީމާންކަމަކީ އިސްލާމްދީނުގެ އަސާސެވެ. އިންސާނާއަށް ދުނިޔަވީ ޙަޔާތުގެ އުފަލާއި އަރާމު އަދި އުޚުރަވީ ޙަޔާތުގެ ބާއްޖަވެރިކަން ލިބޭނީ އީމާންކަން ވަރުގަދަކޮށް، ހަރުދަނާ ކޮށްގެންނެވެ. މާއްދިއްޔަތުގެ ތެރެއަށްގޮސް ހުސްވެފައިވާ، މިފަދަ ދުވަސްވަރެއްގައި، އީމާންކަން ބަލިކަށި ވެ ނުބައިމަގުން ދެވުމަކީ ވަރަށް ކައިރި ކަމެކެވެ. އަދި މީހާގެ އުޅުމާއި، އަމަލުތަކުގެ ސަބަބުންވެސް އީމާންކަން ބަލިކަށި ވެއެވެ. ރަސޫލާ ޞައްލައްالله ޢަލައިހި ވަސައްލަމް ހަދީޘް ކުރައްވާފައިވެއެވެ. "ހަމަކަށަވަރުން ފޭރާން ބާވެ، ވީރާނާވާ ފަދައިން، ތިޔަބައިމީހުންގެ ހިތުތެރޭގައި އީމާންކަމުގެ ނޫރު ފަނޑުވެއެވެ. ފަހެ ތިޔަބައިމީހުންގެ ހިތްތަކުގައި އީމާންކަން ހަރުދަނާކޮށްދެއްވުން އެދި ތިޔަބައިމީހުން މާތް الله އަށް ދަންނަވާހުށި ކަމެވެ."

ހުކުރު ޚުތުބާ

އެހެންކަމުން ހެޔޮ އަމަލުތަކާއި، ވައުޘާއި ނަސޭހަތުގެ އެހީގައި އަހަރެމެން އަބަދުވެސް އީމާންކަން ހަރުދަނާ ކުރަންޖެހޭ ކަމަށް ޚުތުބާގައި ބުނެފައިވެއެވެ.

ޚުތުބާގައި އިތުރަށް ބުނީ ހަގީގީ މާނާގައި، މާތް اللهއަށް އީމާންވުމަކީ އިންސާނާގެ ހިތުގައި އުފާވެރިކަމުގެ ޝުޢޫރުތަކާއި، ބާއްޖާވެރިކަމުގެ އިހްސާސްތައްއުފައްދާ ކަމެއް ކަމަށެވެ.

ނަމަވެސް ދީނީ ވާޖިބުތައް އދާކުރަމުންދާއިރުވެސް ވަރަށް ފަސޭހައިން މާތް الله ހަރާމް ކުރައްވާފައިވާ ކަންތައްތަކަށް .އަރައިގަނެވޭކަމަށް ބައެއް މީހުން ބުނަމުންދާކަން ފާހަގަކޮށް ޚުތުބާގައި ބުނީ، އެއީ އީމާންކަން ބަލިކަށިކަމުގެ ޢަލާމާތެއް ކަމަށެވެ.

ހަގީގީ މުއުމިނުންގެ ވާހަކަ ބަޔާންކުރައްވައި މާތް الله ވަޙީކުރައްވާފައި ވެއެވެ. މުއުމިނުން ވާކަން ކަށަވަރީ الله ހަނދުމަކުރާ ހިނދު އެބައިމީހުންގެ ހިތްތައް ބިރުވެތިވާ މީހުން ކަމުގައެވެ. އަދި އެކަލާނގެ (ބާވައިލެއްވި) އާޔަތްތައް އެއުރެންނަށް ކިޔައިދެވޭ ހިނދު އެއުރެންގެ އީމާންކަން އިތުރުވާ މީހުން ކަމުގައެވެ. އަދި އެއުރެންގެ ވެރިރަސްކަލާނގެއަށް ވަކީލުކުރާ މީހުން ކަމުގައެވެ.

ހުކުރު ޚުތުބާ

މިއާއެކު ޚުތުބާގައި ބުނީ، އަހަރެމެންގެ މުޖުތަމަޢު އިސްލާޙްކޮށް، މަސްތުވާތަކެތީގެ ބޮޑެތި ޖަރީމާތަކުންނާއި، ފާހިޝް ޢަމަލުތަކުން މުޖުތަމަޢު ސަލާމަތް ކުރެވޭނީ އީމާންކަމުގެ ވަރުގަދަކޮށް، ޣައިބުގައިވާ އެންމެހައި ކަންތައްތަކަށް ފުރިހަމަ މާނާގައި އީމާންވެގެން ކަމަށެވެ.

އެހެންކަމުން ގައުމުގެ ތައުލީމީ ފަލްސަފާއާއި، ގައުމީ މަންހަޖު ފުރިހަމައަށް ތަންފީޒުކޮށް، އަހަރެމެންގެ ޅަދަރީންގެ ހިތްތަކުގައި އީމާންކަން ހަރުދަނާކުރެވޭނެ ގޮތްތަކެއް ރާވައި، އެކުދިންގެ ހިތްތަކުގައި ދީނީ އަގީދާ ވަރުގަދަވާނެ ގޮތްތަކެއް ވިސްނަން ޖެހޭ ކަމަށް ހުތުބާގައި ބުންޏެވެ.

".. އަހަރެމެންގެ ތައުމީ ފޮތްތަކުގައި އަގީދާއާއި، އީމާންކަމުގެ ބައިތަކާއި، ވާހަކަތައް އިތުރުކުރަންޖެހެ އެވެ. މުދައްރިސުންނާއި، އުނގަންނައިދޭ މީހުންނަކީ އީމާންކަމުގެ ފޭރާމުން ޒީނަތްތެރިވެފައިވާ މީހުންނަށް ވާންޖެހެއެވެ،" ހުތުބާގައި ބުނެފައިވެ އެވެ.