"މީސްތަކުން ބޯކޮޅު ވަތަށް ނަރަކައަށް އެއްލައިލެވެނީ އެބައިމީހުން ދައްކާ ވާހަކަތަކުގެ ސަބަބުން ނޫންހެއްޔެވެ؟"

މީސްތަކުންގެ ދުލުގެ ނުބައިކަމުގެ ސަބަބުން އެމީހާ ނަރަކައަށް އެއްލައިލެވޭނެކަން ހަދީޘް ބަސްފުޅުތަކުން އެނގޭކަން މިއަދުގެ ޚުޠުބާގައި ބުނެފިއެވެ.

"މުސްލިމުންގެ އަބުރާއި ޢިއްޒަތް" މި މައުޟޫޢަށް ޚާއްޞަކޮށްގެން މިއަދު އިއްވި ޚުތުބާގައި ބުނީ، މާތް الله އިންސާނާ މާތްކުރައްވައި، އޭނާގެ ޤަދަރާއި ޢިއްޒަތް ގެއްލިދާނެ ކޮންމެ ކަމެއް ނަހީކުރައްވާފައިވާ ކަމަށެވެ. އަދި އިސްލާމީ ޝަރީޢަތުގެ މައިގަނޑު ފަސް މަޤުޞަދުގެ ތެރޭގައި އިންސާނާގެ އަބުރު ރައްކާތެރިކުރުން ހިމެނޭކަން ޚުތުބާގައި ފާހަގަކުރިއެވެ.

މިގޮތުން، ޙައްޖަތުލްވަދާޢުގެ ޚުޠުބާގައި ކީރިތި ރަސޫލާ ﷺ ޙަދީޘްކުރެއްވި ބަސްފުޅެއް ހަނދާންކޮށްދެމުން ޚުތުބާގައި ބުނީ، މައްކާ އާއި ޙައްޖު މަހާއި އެ ދުވަސް ޙުރުމަތްތެރިވެގެންވާ ފަދައިން، މުސްލިމުންގެ މައްޗަށް އެބައިމީހުންގެ ލެޔާއި، މުދަލާއި، އަބުރާއި، ހަށިތައް ޙުރުމަތްތެރި ކުރައްވާފައިވާ ކަމަށެވެ. އަދި ގެފުޅުވަށައި ޠަވާފުކުރައްވަމުން ކީރިތި ރަސޫލާ ﷺ ޙަދީޘްކުރައްވާފައިވަނީ ގެފުޅުގެ ޙުރުމަތަށްވުރެ ވެސް މާތް الله ގެ ޙަޟުރަތުގައި މުއުމިނެއްގެ ޙުރުމަތް މާ މަތިވެރިވެގެންވާ ކަމަށެވެ.

ޚުތުބާގައި ފާހަގަކުރި ގޮތުގައި، ޖިސްމާނީ ގޮތުން މީހަކަށް އަނިޔާ ދިނުމަށްވުރެ މީހެއްގެ އަބުރު ކަތިލުމުން ލިބޭ ހިތާމައާއި ގެއްލުން މާ ބޮޑެވެ. އެއީ މުޖުތަމަޢުގެ އެއްބައިވަންތަކަން ގެއްލި، އިޖުތިމާޢީ ފޭރާން ވީދިގެންދާނެ ކަމެކެވެ. މީގެއިތުރުން، އިސްލާމްދީނުގައި ކުއްތާއާއި އޫރަކީ ނަޖިހެއް ކަމުގައި ވިޔަސް، ކަރުހިއްކައިގެންފައިވާ ކުއްތާއަކަށް ފެންދިން މީހެއްގެ ފާފަ މާތް الله ފުއްސަވައި ދެއްވިކަން ހަނދާންކޮށްދެމުން ޚުތުބާގައި ވަނީ، ނަޖިސް ޖަނަވާރަކަށް ހެޔޮކޮށްހިތުމުން ދަރުމަ ލިބޭއިރު، މާތް الله މާތްކުރެއްވި އާދަމުގެ ދަރިއެއްގެ އަބުރު ކަތިލުމުން ލިބޭނެ ފާފައިގެ ބޮޑުމިނާ މެދު ވިސްނުމަށް އެދިފައެވެ.

އަބުރު ރައްކާތެރިކުރުމުގެ ގޮތުން އިސްލާމްދީން އަޅާފައިވާ ހަރުދަނާ ފިޔަވަޅުތަކުގެ ތެރޭގައި، ޢިއްފަތްތެރި އަންހެނުންނަށް ޤަޛުފުކޮށް، ހަތަރު ހެކިން ނުގެނެވޭ މީހުންގެ ގައިގައި 80 އެތިފަހަރުން ޙައްދުޖަހައި، އެއީ ފާސިޤުން ކަމުގައި ކަނޑައަޅައި، އެމީހުންގެ ހެކިބަސް ދުވަހަކުވެސް ޤަބޫލުނުކުރުމަށް އަންގަވާފައިވާކަން ޚުތުބާގައި ހަނދާންކޮށްދިނެވެ. އަދި މީސްމީހުންނާ މެދު ގޯސްކޮށް ހީކުރުމާއި، އެކަކު އަނެކަކަށް ޖާސޫސްކުރުމާއި ޣީބަބުނުން މުޅިން މަނާކުރައްވާފައިވާކަމަށް ވެސް ވިދާޅުވިއެވެ.

މިއަދުގެ ދުނިޔޭގައި މީސްމީޑިއާ މެދުވެރިކޮށް ހިންގާ ނުބައި ޢަމަލުތަކަށް އަލިއަޅުވާލަމުން ޚުތުބާގައި ވަނީ، ކުޑަ ސިކުންތުކޮޅެއްގެ ތެރޭގައި ތެދުދޮގު ބެލުމެއް ނެތި، ޒާތީ ހަސަދައިގެ ސަބަބުން މީހުން ފަޟީޙަތްކޮށް އަބުރު ކަތިލަމުންދަނީ ތިމާމެންގެ ޅަދަރިންގެ ކުރިމަތީގައި ކަމަށާއި، މާދަމާ ޤައުމާ ހަވާލުވާން ތިބި ކުދިންނަށް ދެއްކޭ މި ނަމޫނާއާ މެދު ވިސްނާލަންޖެހޭ ކަމަށް ވިދާޅުވިއެވެ.

ކީރިތި ރަސޫލާ ﷺ ޙަދީޘްކުރައްވާފައިވެއެވެ: "މީހަކު، އޭނާއަށް އިވޭހައި ވާހަކައެއް ދެއްކުން ދޮގަކަށްވުމަށް ފުދެއެވެ."

އަދި އާންމުކޮށް އަބުރަށް އަރައިގަނެވެނީ ދުލުގެ ސަބަބުން ކަން ފާހަގަކުރައްވައި، މުޢާޛުގެފާނަށް ކީރިތި ރަސޫލާ ﷺ ޙަދީޘްކުރެއްވި ބަސްފުޅު ޚުތުބާގައި ގެނެސްފައިވެއެވެ.

އެކަލޭގެފާނު ޙަދީޘްކުރެއްވިއެވެ: "މީސްތަކުން ބޯކޮޅު ވަތަށް ނަރަކައަށް އެއްލައިލެވެނީ އެބައިމީހުން ދައްކާ ވާހަކަތަކުގެ ސަބަބުން ނޫންހެއްޔެވެ؟"

ހަމައެއާއެކު، ދުލާއި ލަދުވެތި ގުނަވަން ރައްކާތެރިކޮށްފި މީހަކަށް ސުވަރުގެ ލިބޭނެކަމުގެ ޔަޤީންކަން ރަސޫލާ ﷺ ދެއްވާފައިވާކަން ވެސް ބަޔާންކުރިއެވެ.

ޚުތުބާ ނިންމާލަމުން ވަނީ އަނެކުންގެ އަބުރެކޭ އެއްފަދައިން ތިމާގެ އަމިއްލަ ނަފުސުގެ އަބުރު ވެސް ޝައްކުތަކުން ރައްކާތެރިކުރުމަށް ނަޞޭޙަތްތެރިވެފައެވެ. އިންސާނާގެ ލޭހިނގާ ނާރުތަކުގައި ޝައިޠާނާ ދައުރުވާ ފަދައިން، ހިތަށް ވަސްވާސް ވައްދައިފާނެތީ އެކަލޭގެފާނު ބިރުވެތިވެވަޑައިގެންނެވި ކަމަށް ޙަދީޘްކުރެއްވި ފަދައިން، ޝައްކު އުފެދޭ ފަދަ ކަންކަމުން ދުރުހެލިވެ އަމިއްލަ އަބުރު ވެސް ރައްކާތެރިކުރުމަށް މިއަދުގެ ޚުތުބާގައި ވަނީ ގޮވާލާފައެވެ.