އިންތިހާބަށް ސަރުކާރުންވެސް އެބަ ނުފޫޒް ފޯރުވާ: ހަބީބު

ސަރުކާރުންވެސް އިންތިހާބުތަކާ ދިމާކޮށް ވޯޓަށް ނުފޫޒު ފޯރުވާ ކަމަށާއި ވޯޓުލާ މީހާއަށް ވޯޓުލާން ޖެހެނީ އެތައް ނުފޫޒް ތަކަކާއި އެކުގައި ކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއީލް ހަބީބް ވިދާޅުވެއްޖެ އެވެ.

ހަބީބު މިފަދައިން ވިދާޅުވެފައި ވަނީ އިލެކްޝަންސް އިން މިއަދު ބޭއްވި ނޫސްވެރިންގެ ބައްދަލުވުމުގައި ސަރުކާރުން އިންތިހާބަށް ނުފޫޒު ފޯރުވުމާ ގުޅިގެން ނޫސްވެރިއަކު ކުރި ސުވާލަށް ޖަވާބުދެއްވަމުންނެވެ.

އެ ސުވާލަށް ޖަވާބު ދެއްވަމުން ހަބީބު ވަނީ ސަރުކާރުންނާއި އަދި އެނޫންވެސް ފަރާތްތަކުން ވޯޓަށް ނުފޫޒު ފޯރުވަމުންދާކަމަށާ، އަދި އެއީ އަބަދުވެސް ކަންހިނގާގޮތް ކަން ފާހަގަކުރައްވައި އެކަމާއި މެދު ކަންބޮޑުވުން ފާޅުކުރައްވާފައެވެ.

"ހަގީގަތަކީ ހަމައެކަނި ސަރުކާރުން އެކަންޏެއް ނޫން ނުފޫޒު ފޯރުވަނީ. ސަރުކާރުންވެސް ނުފޫޒު ފޯރުވާނެ. އެއީ ހަމަ ކޮންމެ ސަރުކާރެއް އޮތަސް އެ ސަރުކާރު ހިންގާ ޕާޓީ ނޫން ޕާޓީތަކަށް އޮންނަ ފުރުސަތުތައް ތަންކޮޅެއް މަދުވާނެ.... މިސާލަކަށް ރައީސުލްޖުމްހޫރިއްޔާއަކަށް ހުންނަ ބޭފުޅަކު ހަމަ ރައީސުލްޖުމްހޫރިއްޔާގެ އެ ލަގަބާ އެކީގަ ކެމްޕެއިން ކުރައްވަން ވަޑައިގަންނަވާނީ ވެސް. އެހެންވީމަ ފަހަރުގައި ހަމަ އެހެން ކެންޑިޑޭޓަކާ ތަފާތު ގޮތަކަށް އިތުރު އިނާޔަތްތަކަކާއެކު ފުރުސަތުތަކެއް ހުރެދާނެ. އެހެންނަމަވެސް އިލެކްޝަންސް ކޮމިޝަނުން މި ދަންނަވަނީ ވޯޓަށް އެބަ ނުފޫޒު ފޯރުވައޭ ހުރިހާ ފެންވަރެއްގައިވެސް." ހަބީބު ވިދާޅުވިއެވެ.

މިއާއެކު ހަބީބުވަނީ، ވޯޓުލާ މީހާއަށް ކިތަންމެ ގިނަ ނުފޫޒް ތަކެއް އޮތް ނަމަވެސް އޭގެ އިލެކްޝަންސް ކޮމިޝަނުން ބޯޓުލާ މީހާ  ބޭނުންވާ މީހާއަށް ވޯޓު ދިނުމުގެ ފުރުސަތު ފަހިކޮށްދެއްވާނެ ކަމަށް ވިދާޅުވެފައެވެ.

"ވޯޓުލާ މީހާގެ މައްޗަށް ކިތަންމެ ނުފޫޒެއް އޮތަސް އިލެކްޝަންސް ކޮމިޝަނުން ފަހިކޮށްދޭނަމޭ އޭނާގެ ވޯޓު އޭނާ ބޭނުންވާ މީހާއަށް ދިނުމަށްޓަކައި ވޯޓު ކަރުދާސްކޮޅު ފޯރުކޮށްދޭނަމޭ،" ހަބީބް ވިދާޅުވި އެވެ.

މީގެ އިތުރުން، އިލެކްޝަންސް ކޮމިޝަންގެ ރައީސް ފުއާދު ތައުފީގު ވަނީ ރިޔާސީ އިންތިހާބުގެ ކަންކަން ކުރިއަށް ދާނީ އިންސާފުވެރިކަމާ އެކުގައި ކަމަށާ، އެ ކޮމިޝަނުން ސަރުކާރުގެ ފަޅިއަށް ވެސް ސަރުކާރާ ވާދަވެރި ފަޅިއަކަށް ވެސް ނުޖެހޭނެ ކަމަށް ވިދާޅުވެފައެވެ. އަދި ހުރިހާ ފަރާތްތަކާ ވެސް ގެންގުޅޭނީ ހަމަހަމަ އުސޫލެއް ކަމަށްވެސް ފުއާދު ވިދާޅުވިއެވެ.