އިންޑިއާ އެމްބަސީ ކުރިމައްޗަށް އެއްވުމަށް ލަތީފު ގޮވައިލައްވައިފި

މާލޭގައި ހުންނަ އިންޑިއާ އެމްބަސީ ކުރިމައްޗަށް އެއްވެ މުޒާހަރާކުރާނެ ކަމުގެ އިންޒާރު، ދިއްދޫ ދާއިރާގެ ކުރީގެ މެންބަރު އަބްދުއްލަތީފު ދެއްވައިފިއެވެ.

އިދިކޮޅު ކޯލިޝަނުން ރޭ ހުޅުމާލޭގައި ބޭއްވި ޖަލްސާގައި ވާހަކަ ދައްކަވަމުން ލަތީފު ވިދާޅުވީ، މިސަރުކާރަށް އިންޑިއާ އާއި ނުލައި ހަމަ އެއްވެސް ކަމެއް ނުކުރެވޭ ކަމަށެވެ.

އެގޮތުން ޓީޗަރުން ނާއި ނަރުހުންނާއި ޑޮކްޓަރުންވެސް ގެންނަން ޖެހެނީ އިންޑިއާ އިން ކަން ފާހަގަކުރައްވާ ލަތީފު ވިދާޅުވީ، އިންޑިއާ މީހުންނަށް ނޫނީ ރާއްޖޭގައި އެއްވެސް ކަމެއް ނުކުރެވޭ ދަރަޖައަށް ކަންކަން ހިނގައްޖެ ކަމަށެވެ.

''ޖިންސީ ގޯނާގެ މައްސަލަތައް އިންތިހާއަށް އިތުރުވަނީ، ގައުމުގެ ހާލަތު އެހާ ދަށަށް މިދަނީ، ބޭރު މީހުންނަށް ނޫނީ އެއްވެސް ކަމެއް ނުކުރެވޭ ހިސާބަށް މިދަނީ، ޑޮކްޓަރުން ގެނެވެނީ އިންޑިއާ މީހުންނަށް، ނަރުހުން ގެނެވެނީ އިންޑިއާ މީހުންނަށް، ތަނެއް ހިންގަން އެނގެނީ އިންޑިއާ މީހުންނަށް. މިހުރިހާ ކަމެއްގައި އިންޑިއާ އިންޑިއާ، މާދަމާ ހުރިހާ މީހުން ނުކުންނަންވީ އިންޑިއާ އެމްބަސީ ކައިރީގައި މުޒާހަރާ ކުރަން." ލަތީފު ވިދާޅުވިއެވެ.

މީގެއިތުރުން ލަތީފު ވިދާޅުވީ ރައީސް ސޯލިހަށާއި ރައީސް ނަޝީދަށް އިތުބާރުކުރަން ހެޔޮވެސް ނުވާނެ ކަމަށެވެ. ރައީސް ސޯލިހާއި ރައީސް ނަޝީދު ބޭނުންހާ ގޮތެއް މިގައުމަކަށް ނުހެދޭނެ ކަމަށާއި ގައުމުގެ ހުރިހާ މުދަލެއް ވިއްކާ އެކުވެރިންނާއި އާއިލާ މީހުންނަށް ބަހައި ހުސްކޮށްފި ކަމަށެވެ.

މިހުރިހާ ކަމެއް ހިނގަމުންދާއިރު އިދިކޮޅު ފަރާތްތަކުން ބަސް އަހައިގެން ބަލަން ނުތިބޭނެ ކަމަށް ލަތީފު ވިދާޅުވިއެވެ.

ލަތީފު ވިދާޅުވި ގޮތުގައި މަޖިލީހުގެ ރައީސް މުހައްމަދު ނަޝީދު ހިތުހުރިހާ ވާހަކައެއް ދައްކަވަނީ ރައްޔިތުންނަކީ މޮޔައިން ކަމަށް ހަދައިގެންނެވެ. އެގޮތުން ނަޝީދު ބޭނުންފުޅުވާ ކަންކަން ކުރަމުންދަނީ ރައްޔިތުން މޮޔަ ހައްލައިގެން ކަމަށް ވެސް ލަތީފު ވިދާޅުވިއެވެ.