ރައީސް ޔާމީންގެ މައްޗަށް ހިންގި ތަހުގީގާއި، ކުރި ދައުވާ އަކާއި އެއްވެސް ގުޅުމެއްނެތް: ޝިޔާމް

މަނީލޯންޑަރިންގެ ދައުވާ ސާބިތުވެ، ފަސް އަހަރަށް ޖަލަށް ހުކުމް އިއްްވާފައިވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް ހިންގި ތަހުގީގަކާއި ދައުލަތުން ކުރި ދައުވާ އާއި އެއްވެސް ގުޅުމެއް ނެތް ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމު ވިދާޅުވެއްޖެއެވެ.

އިދިކޮޅު ކޯލިޝަނުން ރޭ ހުޅުމާލޭގައި ބޭއްވި ޖަލްސާގައި ވާހަކަ ދައްކަވަމުން ޝިޔާމު ވިދާޅުވީ، ރައީސް ޔާމީންގެ މައްޗަށް ދަށު ކޯޓުން ކުރި ޝަރީއަތަކީ މިހާތަނަށް އެންމެ ގިނަ މީހުން ބެލި ޝަރީއަތް ކަމަށާއި ޝަރީއަތް ކުރިޔަށް ދިޔައީ އިންސާފުވެރިކޮށް ނޫންކަން ރައްޔިތުންނަށް ފެނިގެންދިޔަ ކަމަށެވެ.

ޝިޔާމު ވިދާޅުވީ، ރައީސް ޔާމީންގެ މައްޗަށް ދައުލަތުން ކުރި ބޮޑު ތުހުމަތުން ބަރީއަވުމަށްޓަކައި ރައީސް ޔާމީން ވަނީ އެމަނިކުފާނުގެ ސާބިތުކަން ރައްޔިތުންނަށް ދައްކަވާފައި ކަމަށެވެ. އަދި ދަށު ކޯޓުން ޝަރީއަތް ކުރިޔަށް ގެންދިޔައިރު، ރައީސް ޔާމީނާ މެދު އެއްވެސް އިންސާފެއްނެތި ކަންކަން ނިންމެވިކަން ހާމަވެގެންދިޔަ ކަމަށްވެސް ޝިޔާމު ވިދާޅުވިއެވެ.

''ރައީސް ޔާމީންގެ މައްޗަށް ޝަރީއަތްކުރި ފަނޑިޔާރުން އެބޭފުޅުން އަމިއްލައަށް ބަޔާންތައް ނެރުއްވައި މިއަދުގެ ސަރުކާރުން މައްސަލައަށް ނުފޫޒު ފޯރުވަން އިންތިހާއަށް މަސައްކަތްކުރި ވާހަކަ އެފަނޑިޔާރުން އަމިއްލަފުޅަށް ބަޔާން ނެރުއްވައި އެހުރީ ވިދާޅުވެފައި. ކޮން މުއައްސަސާއަކުންތޯ އެމައްސަލަ ބެއްލެވީ. މައްސަލަ ކުރިޔަށް ގެންދަން ތިން ގަޑިއިރަށް ވެފައި ހުއްޓައި ޝަރީއަތް ކެންސަލްކުރީ، އެފަނޑިޔާރު ސަސްޕެންޑްކުރީ.'' ޝިޔާމު ވިދާޅުވިއެވެ.

ޝިޔާމު ވިދާޅުވީ، ރައީސް ޔާމީންގެ މައްސަލަ ބެއްލެވި ފަނޑިޔާރުގެ ސުލޫކީ މައްސަލައެއް ފެންމަތި ކުރުވިއިރު، ފަހުން އެމައްސަލަ ބެއްލެވި ފަނޑިޔާރުންގެ ބެންޗްގެ އިސް ފަނޑިޔާރުގެ ސުލޫކީ މައްސަލައެއްވެސް އޮތް ކަމަށެވެ. ނަމަވެސް އެމައްސަަލަ ނުބަލައި ފަނޑިޔާރުންގެ ބެންޗުގެ އިސް ފަނޑިޔާރު އަވަސް އަރުވާލައިގެން މައްސަލަ ކުރިޔަށް ގެންދިޔަ މަންޒަރުވެސް ރައްޔިތުންނަށް ފެނިގެން ދިޔަ ކަމަށް ޝިޔާމު ވިދާޅުވިއެވެ.

''ދިވެހި ރާއްޖޭގެ ކޯޓުތަކުން ލިޔެފައި ނެރޭ ހުކުމް އޮންނަ ގޮތަކަށްނޫން އެހުކުމް އޮތީކީ، ބަޔަކު ބުނެގެން ބަޔަކު ބޭނުންވި ގޮތަކަށް ބަޔަކު ބޭނުންވި އެއްޗެއް އެ ހުކުމުގައި ލިޔެފައި އޮތްތަން އަޅުގަނޑުމެންނަށް ފެނުނީ. ހުކުމުގައި ރިއާޔަތްކޮށްފައި ހުރި ދައުލަތުގެ މުއައްސަސާތަކުން ހުންނާނެ ކަމަށް ބުނި އެއްޗަކާއި ހުކުމުގައި ލިޔެފައި އޮތް އެއްޗަކާއި ދިމަލެއް ނުވޭ.'' ޝިޔާމު ވިދާޅުވިއެވެ.

ޝިޔާމު ވަނީ އެހެން މީހުންގެ މައްސަލަތައް ރިވިއު ކުރާ އުސޫލުން ރައީސް ޔާމީންގެ މައްސަލަވެސް އަލުން ރިވިއު ކުރުމަށް ޕްރޮސިކިއުޓާ ޖެނެރަލަށް ގޮވައިލައްވާފައެވެ.