މިފަހަރު ނިންމާ ނިންމުމެއްގެ ސަބަބުން 50 އަހަރަށް ގައުމުގެ މުސްތަގުބަލު ބަދަލުވެދާނެ: ޣައްސާނު

ކުރިޔަށް އޮތް ލޯކަލް ކައުންސިލު އިންތިހާބުގައި ރައްޔިތުން ނިންމާ ނިންމުމެއްގެ ސަބަބުން 50 އަހަރަށް ރާއްޖޭގެ މުޅި މުސްތަގުބަލު ބަދަލުވެގެން ހިނގައިދާނެ ކަމަށް ގުރައިދޫ ދާއިރާގެ މެންބަރު ޣައްސާނު މައުމޫން ވިދާޅުވެއްޖެއެވެ.

އިދިކޮޅު ކޯލިޝަނުން ރޭ ހުޅުމާލޭގައި ބޭއްވި ޖަލްސާގައި ވާހަކަ ދައްކަވަމުން ޣައްސާނު ވިދާޅުވީ، ގައުމުގެ ހާލަތު މިހާރު އޮތީ ވަރަށް ނުރައްކާތެރި ހާލަތެއްގައި ކަމަށެވެ. އެގޮތުންް ކައުންސިލު އިންތިހާބުގައި ވިސްނާނުލައި ރައްޔިތުން ނިންމާ ނިންމުމެއްގެ ސަބަބުން ގައުމަށް ބޮޑެތި ގެއްލުންތަކެއް ވެގެންދާނެ ކަމަށް ޣައްސާނު ވިދާޅުވިއެވެ.

ޣައްސާނު ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، ވެރިކަމުގެ ހުވާ ކުރެއްވި ދުވަހުން ފެށިގެން މިއަދާ ހަމަޔަށް އައިއިރު، ރައްޔިތުންގެ ދިރިއުޅުމުގެ އާންމު ހާލަތު ވަރަށް ބޮޑަށް ދަށަށްގޮސްފައިވާކަން ރައްޔިތުން ހަނދާން ކުރަންޖެހޭ ކަމަށެވެ.

''ގައުމުގެ ހާލަތު މިދަނީ މައްޗަށްތޯ ނުވަތަ ދަށަށްތޯ އެބަޖެހޭ ވިސްނާލަން. އާމްދަނީ ލިބުން މިދަނީ މައްޗަށްތޯ ނުވަތަ ދަށަށްތޯ އެބަޖެހޭ ވިސްނާލަން. ވަޒީފާގެ ފުރުސަތުތަސް ދަނީ ދަށަށްތޯ ނޫނީ މައްޗަށްތޯ އެބަޖެހޭ ބަލައިލަން. ތައުލީމީ ދާއރާއިން ދަނީ ދޮރުތައް ހުޅުވެމުންތޯ ނޫނީ ލެއްޕެމުންތޯ ބަލަން އެބަޖެހޭ. އިސްލާމް ދީނާ މެދު ސަރުކާރުން އަމަލުކުރަމުން ދަނީ އަޅުގަނޑުމެން އެންމެ އެދޭ ގޮތަށްތޯވެސް އެބަޖެހޭ ވިސްނާލަން.'' ޣައްސާނު ވިދާޅުވިއެވެ.

ޣައްސާނު ވިދާޅުވީ އެކަންކަމަށް ވިސްނާ ފިކުރު ކުރުމަކީ މއިަދު ކޮންމެ ދިވެހި ރައްޔިތެއްގެ ކޮނޑުގައި އެޅިފައިވާ މަސްއޫލިއްޔަތެއް ކަމަށާއި އަދި އެއީ އަދާ ކުރަން ގައުމީ ވާޖިބެއް ކަމަށެވެ.

ކައުންސިލު އިންތިހާބުގައި ރައްޔިތުން ގޮތް ނިންމަންވާނީ ގައުމަށް އެންމެ ފައިދާހުރި ގޮތަކަށް ކަމަށް ޣައްސާނު ވިދާޅުވިއެވެ. އަދި ރައީސް ޔާމީންގެ ދުރު ވިސްނުންފުޅާއެކު ކައުންސިލު އިންތިހާބަށް އިދިކޮޅު ކޯލިޝަނުން ނެރެފައި ތިބީ އެކަމަށް އެންމެ ގާބިލު ކެންޑިޑޭޓުން ކަމަށްވެސް ޣައްސާނު ވިދާޅުވިއެވެ.