ރައީސް ޔާމީން ނޫން ކެންޑިޑޭޓެއް ނެރުމަށް ޕީޕީއެމްގެ ލީޑަޝިޕުން އެދިފައެއް ނުވާނެ: އަބްދުއްރަހީމް

ކުރިއަށް އޮތް ރިޔާސީ އިންތިޚާބުގައި ޕީޕީއެމުން ރައީސް އަބްދުالله ޔާމީން އަބްދުލްގައްޔޫމު ނޫން އެހެން ކެންޑިޑޭޓެއް ނެރުމަށް އިދިކޮޅު އިއްތިހާދުން ރައީސް ޔާމިންގެ ލަފާފުޅަކަށް އެދިވަޑައިގެންފައި ނޯންނާނެކަމަށް އިދިކޮޅު އިއްތިހާދު ވަގުތީގޮތުން ހިންގެވުމާއި ހަވާލުވެހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.

އަބްދުއްރަހީމް މިފަދައިން ވިދާޅުވެފައިވަނީ ކުރިއަށް އޮތް ރިޔާސީ އިންތިޚާބުގައި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމަށް ވާދަނުކުރެވޭނެ ހާލަތެއްގައި ސަރުކާރާއި ވާދަވެރި ކޯލިޝަނުން އަމަލުކުރާނެ ގޮތުގެ ލަފާފުޅަކަށް އެދި ރައީސް ޔާމިނަށް ފޮނުވި ނޯޓު އެމަނިކުފާނު ވީދާލެއްވިކަމަށް އޮންލައިން ނޫހެއްގައި އޮތް ޚަބަރު ދޮގުކުރައްވާ "ވޮއިސް" އަށް ދެއްވި އިންޓަވިއުއެއްގަ އެވެ.

"އަޅުގަނޑުމެން މިހާތަނަށް އައިރު އިތުރު ކެންޑިޑޭޓަކާއި ބެހޭ އެއްވެސް ވާހަކައެއް ރައީސްއާއި ދައްކާފައެއް ނޯންނާނެ. ރައީސްއަށް އަޅުގަނޑުމެން ނޯޓު ފޮނުވަނީ ހަމައެކަނި އަޅުގަނޑުމެންގެ ޕާޓީގެ އެތެރޭގެ ހިންގުމާއި ގުޅޭ ކަންކަމުގައި ލަފާފުޅަކަށް އެދި. ތީ ކަނޑައެޅިގެން ދޮގު ވާހަކައެއް"

ޕީއެންސީގެ ރައީސް އަބްދުއްރަހީމް

ޤާސިމް އިބްރާހިމް ރިޔާސީ އިންތިޚާބުގައި ވާދަކުރައްވަން އިއުލާނު ކުރެއްވުމާއި ގުޅިގެން، ޕީޕީއެމުން އެކަށީގެންވާ ގޮތެއްގައި ކެމްޕޭނު ނުކޮށްފިނަމަ އިންތިޚާބު ކާމިޔާބު ނުވެދާނެކަމުގެ ބިރު އޮތްކަމަށް އިދިކޮޅު އިއްތިހާދުގެ ބައެއް އިސްވެރިން ކަންބޮޑުވާކަމަށާއި، ރައީސް ޔާމީންގެ މައްސަލައިގެ ގޮތެއް ނިމެންދެން ވަގުތު ދުއްވާލުމަކީ ބުއްދިވެރި ގޮތެއް ނޫންކަމަށް ޕީޕީއެމްގެ ބައެއް ލީޑަރުން ދެކެވަޑައިގަންނަވާކަމަށް އޮންލައިން ނޫހެއްގައި ލިޔެފައި ވެއެވެ.

އެހެން ނަމަވެސް އެފަދައިން ކަންބޮޑުވުން އޮތީ ކޮން ލީޑަރުންނެއްކަން އެ ނޫހުން ހާމަކޮށްފައެއް ނުވެއެވެ.

އެކަމާއި ގުޅޭގޮތުން އަބްދުއްރަހީމް ވިދާޅުވީ ޕީޕީއެމްގެ ރިޔާސީ ކެންޑިޑޭޓަކީ ރައީސް ޔާމީން ކަމާމެދު ދެބަސްވާ ނުވަތަ ޚިޔާލުތަފާތުވުން އޮތް އެއްވެސް ބޭފުޅަކު ޕީޕީއެމްގެ އެއްވެސް ގުނަވަނެއްގައި ނުތިއްބަވާ ކަމަށެވެ.

ޤާސިމް އިބްރާހިމް ރިޔާސީ ރޭހަށް ނުކުންނަވާނެކަން ރަސްމީކޮށް އިއުލާނު ކުރެއްވީ ރޭގައިކަމަށް ވުމުން، އިދިކޮޅުން އެފަދަ ނޯޓެއް ފޮނުވަން ބޭނުންވި ނަމަވެސް އެކަން އެގޮތަށް ނުކުރެވޭނެކަމަށް އަބްދުއްރަހީމް ވިދާޅުވިއެވެ.

ރައީސް ޔާމީން މިވަގުތު ހުންނެވީ ނުހައްގު ބަންދެއްގައި ޖަލުގައި ކަމަށްވުމުން، އެމަނިކުފާނަށް ނޯޓު ފޮނުވަން ޖެހެނީ ގާނޫނީ ވަކީލުން މެދުވެރިކޮށްގެން ކަމަށާއި، ޤާސިމް ރިޔާސީ ރޭހަށް ނިކުންނާނެކަން އިއުލާނުކުރުމާމެދު މިވީ ވަގުތުގައި އެފަދަ ކަމެއް ކުރުމުގެ ޖާގަވެސް ނެތްކަން އަބްދުއްރަހީމް ހާމަކުރެއްވި އެވެ.

"އެއްކަމަކަށް ނޯޓެއް މި ފޮނުވެނީ ވަކީލުން މެދުވެރިކޮށް. ޑރ ޖަމީލާ ނަމަވެސް ގުޅުއްވާލައްވާ އެއީ ހިނގިކަމެއްތޯ އައްސަވާ؟ ޔަގީން ދޮގެއް އެއީ. އަނެއްކޮޅުން ގާސިމް އިބްރާހިމް ވާދަކުރައްވަން ނިންމެވީ އިއްޔަގަ. އިއްޔެގަ ނިންމެވީމަ ކިހެނެއްތޯ އަޅުގަނޑުމެން ނޯޓު ފޮނުވާނީ ރައީސް ޔާމީން އަރިހަށް؟ ރައީސް ޔާމީން އެ ހުންނެވީ އަޅުގަނޑުމެން ބޭނުން ވަގުތަކު ބައްދަލުކޮށް ބޭނުން ވަގުތަކު ނޯޓު ފޮނުވޭނެ ހާލަތެއްގައެއް ނޫން ދެއްތޯ، އެހެންވީމަ ތީ ކަނޑައެޅިގެން ދޮގެއް. އިތުރު ކެންޑިޑޭޓަކާއި ބެހޭގޮތުން މަޝްވަރާއަކަށް އެދިއެއް ރައީސް ޔާމީނަކަށް ޕީޕީއެމްގެ ލީޑަޝިޕުން ނޯޓެއް ނުފޮނުވާ"

ޕީއެންސީގެ ރައީސް އަބްދުއްރަހީމް އަބްދުالله

އަބްދުއްރަހީމް މިފަދައިން ވިދާޅުވެފައިވާއިރު ރައީސް ޔާމީންގެ އިސް ޤާނޫނީ ވަކީލު ޑރ މުހައްމަދު ޖަމީލު އަހުމަދު ވެސް ވަނީ އެ ނޫހުގައި ޝާއިއުކޮށްފައިވާ ޚަބަރު ދޮގު ކުރައްވާފަ އެވެ.

އެގޮތުން ޑރ ޖަމީލު ވިދާޅުވީ ރިޔާސީ އިންތިޚާބަށް ޕީޕީއެމުން ވާދަކުރަން ނިންމާފައިވާ ގޮތް އެ ޕާޓީން އޮތީ އިއުލާނުކޮށްފައި ކަމަށާއި ރައީސް ޔާމީނާއި ނުލާ މިއަހަރުގެ ރިޔާސީ އިންތިޚާބު ނުބާއްވާނެ ކަމަށެވެ.

ވ. އާރަށުގެ މުއާމަލާތާއި ގުޅުވާ ރައީސް ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމް ތަންފީޒުކުރައްވަމުން ދިޔަ ނަމަވެސް މިހާރު އެ މައްސަލަ ވަނީ އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފަ އެވެ.

ހައިކޯޓު މަރުހަލާއިން އެމަނިކުފާނު މިނިވަންވެ ވަޑައިގަންނަވާނެ ކަމަށާއި، ކެމްޕޭނު ކުރެއްވުމަށް އެކަށީގެންވާ މުއްދަތެއް ލިބިވަޑައިގަންނަވާނެ ކަމުގެ ޔަގީންކަން ރައީސް ޔާމީންގެ ޤާނޫނީ ޓީމުން ދެއްވައެވެ.