ރައީސް ޔާމީން މިނިވަންކުރުމަށް ގޮވާލާ ހުކުރު ދުވަހު މުޅި ރާއްޖޭގައި އިދިކޮޅުގެ އިހުތިޖާޖެއް!

ޕީޕީއެމްގެ ރައީސް އަދި އެ ޕާޓީގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމު މިނިވަންކުރުމަށް ގޮވާލާ އަންނަ ހުކުރު ދުވަހު މުޅި ރާއްޖޭގައި އިހުތިޖާޖު ކުރުމަށް ނިންމާފައިވާކަން އިދިކޮޅު އިއްތިހާދުން އިއުލާނުކޮށްފި އެވެ.

އެކަން އިއުލާނުކޮށްފައިވަނީ އިދިކޮޅު ކޯލިޝަނުން މިއަދު ބޭއްވި ޕްރެސް ކޮންފަރެންސްއެއްގަ އެވެ.

އެ ހަރަކާތް ކުރިއަށް ގެންދިއުމަށް ޚާއްސަ ކޮމެޓީއެއް އެކުލަވާފާފައިވާއިރު، އެ ކޮމެޓީގައި ޕާޓީގެ އެކްޝަން ޑިޕާޓްމަންޓުގެ ޗެއާގެ އިތުރުން މަޖިލީސް މެމްބަރުންނާއި ޕާޓީގެ ލީޑަޝިޕް ބޭފުޅުން ހިމެނިވަޑައިގަންނަވަ އެވެ.

މުޅި ރާއްޖޭގައި ބާއްވާ އެ އިހުތިޖާޖާއި ގުޅޭގޮތުން އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލް ވިދާޅުވީ އަންނަ ހުކުރު ދުވަހުގެ 4:00 ގައި އިދިކޮޅުގެ އިހުތިޖާޖު ފަށާނެ ކަމަށެވެ.

އަދި އެއްވަގުތެއްގައި ރާއްޖޭގެ މީހުން ދިރިއުޅޭ ހުރިހާ ރަށެއްގައި އެ އިހުތިޖާޖު ކުރިއަށް ގެންދިއުމަށް ނިންމާފައިވާކަމަށް ވިދާޅުވި އެވެ.

އޭގެ އިތުރުން މާލެ ސަރަހައްދުގައި އެ ހަރަކާތް ކުރިއަށް ގެންދާނީ ރަސްފަންނުގައި ކަމަށާއި، ހަރަކާތް ކުރިއަށް ގެންދާނީ މާހެފުމަކާއިވެސް އެކުގައިކަމަށް މުހައްމަދު އިސްމާއިލް ވިދާޅުވި އެވެ.

"ހުރިހާ ރަށެއްގައިވެސް މި އިހުތިޖާޖު ކުރިއަށް ގެންދާގޮތަށް ޕާޓީގެ ލީޑަޝިޕުން ވަނީ ނިންމާފަ. ފުރަމާލޭގައި މި އިހުތިޖާޖު ކުރިއަށް ގެންދާނީ ރަސްފަންނުގައި، މާހެފުމަކާ އެއްކޮށް. މާލެ ވިލިމާލެ އަދި ހުޅުމާލޭގެ އެންމެހާ ރައްޔިތުން ރަސްފަންނަށް 4:00 އަސް ވަޑައިގެން ދެއްވުންއެދި ދައުވަތު އަރުވަމުން ރާއްޖޭގެ ހުރިހާ ރަށެއްގެ ރައްޔިތުންވެސް ހަމަ ދާއިރާތަކުގެ ރައީސުންނާއި ނައިބުރައީސުންނާއި ޒުވާނުންގެ ރައީސްއާއި އަދި ސްޓިއަރިން ކޮމެޓީތަކުގެ ރައީސުންނާއި އެންމެން ގުޅިގެން ރަށުގައި މި ހަރަކާތްތައް ކުރިއަށް ގެންދިއުމަށް މަސައްކަތްކޮށްދިނުމަކީ ޕާޓީގެ ލީޑަޝިޕުން ވަރަށް ބޮޑަށް އެދިވަޑައިގަންނަވާ ކަމެއް"

އިދިކޮޅު ހަރަކާތު ކޮމެޓީގެ ޗެއާ މުޙައްމަދު އިސްމާއިލް

މުހައްމަދު އިސްމާއިލް އިތުރަށް ވިދާޅުވީ ރައީސް ޔާމީން މިނިވަންކުރުމަށް ކުރެވޭ މަސައްކަތުގައި ހުރިހާ ރައްޔިތުންވެސް ބައިވެރިވާން ޖެހޭ ކަމަށެވެ.

މި ޤައުމު މިހާރު އޮތް ހާލަތުން ނަގައިގަނެވޭނެ ހަމައެކަނި ލީޑަރަކީ ރައީސް ޔާމީންކަމަށް ވާތީ، އެމަނިކުފާނަށް އިންސާފު ހޯދުމަށް ކުރެވޭ މަސައްކަތުގައި ވީހާވެސް ގިނަ ބަޔަކު އަމަލީގޮތުން ބައިވެރިވުމަކީ މުހިންމުކަމެއްކަން ފާހަގަކުރައްވާ މުހައްމަދު އިސްމާއިލްވަނީ ހުކުރު ދުވަހު އޮންނަ އިހުތިޖާޖުގައި ވީހާވެސް ގިނަ ރައްޔިތުން ބައިވެރިވުމަށް އެދިވަޑައިގެންފަ އެވެ.

އިދިކޮޅުން ބުނީ އެ ހަރަކާތާއި ގުޅުންހުރި ކަންކަމުގައި ކުރިއަށް އޮތްތަނުގައި ޕާޓީ އޮފީހުން، ޕާޓީގެ އާންމު މެމްބަރުންނަށް ގުޅަމުން ގެންދާނެ ކަމަށެވެ.

އޭގެއިތުރުން ރަށްރަށުގައި އެ ހަރަކާތްތައް ކުރިއަށް ގެންދަންވީ ގޮތުގެ މައުލޫމާތުތައް ފޯރުކޮށްދިނުމަށް ދާއިރާ ރައީސުންނާއި ނައިބު ރައީސުންނާއި ސްޓިއަރިން ކޮމެޓީގެ މެމްބަރުންނާއި ގުޅިގެން ހަރަކާތްތެރިވާނެ ކަމަށާއި، އެ ފަރާތްތަކަށް ވެސް ލީޑަޝިޕްގެ ފަރާތުން މައުލޫމާތުތައް ފޯރުކޮށްދެމުން ގެންދާނެ ކަމަށް އިދިކޮޅުން ވަނީ ބުނެފައެވެ.