ކަނޑުގެ ސަރަހައްދުން ގެއްލުނު ބައި ނުހޯދޭނެކަމަށް ބުނުމަކީ އޮޅުވާލުމެއް: ޑރ މުނައްވަރު
ޗާގޯސްއާއި ދިވެހިރާއްޖެއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލަ ނިމިގެން ދިޔަގޮތް ބަދަލުކޮށް، ރާއްޖޭގެ ކަނޑުގެ ސަރަހައްދުން ގެއްލިގެން ދިޔަ ބައި ދެން އަނބުރާ ހޯދޭނެ ގޮތެއް ނޯންނާނެކަމަށް ބުނެ ސަރުކާރުން ވާހަކަދައްކަމުން ދަނީ އޮޅުވާލުމަށް ކަމަށް ކުރީގެ ބަންޑާރަނައިބު ޑރ މުޙައްމަދު މުނައްވަރު ވިދާޅުވެއްޖެ އެވެ.
ފޯޅަވަހި މައްސަލައިގައި ގުޅިގެން މަސައްކަތް ކުރުމަށް އުފައްދާފައިވާ އިއްތިހާދުން ބޭއްވި ޕްރެސް ކޮންފަރެންސްގައި ވާހަކަދައްކަވަމުން ޑރ މުނައްވަރު ވިދާޅުވީ ދިވެހިރައްޔިތުންގެ ފަރާތުން އެ މައްސަލަ އިސްތިއުނާފު ކުރުމުގެ މަސައްކަތް މިހާރު ކުރެވެމުންދާ ކަމަށެވެ.
އެ މައްސަލަ ކުރިއަށްދާއިރު ކަނޑުގެ ސަރަހައްދުން ގެއްލުނުބައި ނުހޯދޭނެކަމަށް ބުނެ ވާހަކަތަކެއް ދެކެވެމުންދާ ކަމަށާއި، އެއީ އޮޅުވާލުމެއްކަމަށް ޑރ މުނައްވަރު ވިދާޅުވި އެވެ.
"މިކަން ކޮށްފަ މި ވިދާޅުވަނީ ދެން ކުރާނެ ކަމެއް ނޯންނާނެއޭ. "ދެން ކުރާނެ ކަމެއް ނޯންނާނެ އޭ" މި އަމާޒު ކުރައްވަނީ ކޮން ބަޔަކަށް ތޯ؟ ދިވެހިރައްޔިތުންނަށް. އެބޭފުޅުން އެ ވިދާޅުވަނީ ކިތަންމެ ވަރަކަށް ހަޅޭލެވިޔަސް ކުރާނެކަމެއް ނޯންނާނެއޭ. އެއީ އޮޅުމެއް. ކުރާނެކަންތައްވެސް އޮންނާނެ. ކުރެވޭނެ ކަންތައް ވެސް އޮންނާނެ"
ކުރީގެ ބަންޑާރަނައިބު ޑރ މުހައްމަދު މުނައްވަރު
ޑރ މުނައްވަރު ވިދާޅުވީ ދިވެހިރާއްޖޭގެ ކަނޑުގެ ސަރަހައްދުން ބައެއް ދޫކޮށްލީ ނޭނގިގެން ނޫން ކަމަށެވެ. އެ މައްސަލައާއި ގުޅިގެން ކަމާގުޅުންހުރި ފަރާތްތަކާއި މަޝްވަރާކުރުމަށް އެދި ދަންނަވަމުން ދިޔަ ކަމަށާއި، އެހެން ނަމަވެސް ސަރުކާރުން އޭރު އެމަނިކުފާނަށް ޖެއްސުންކުރަމުން ގޮސްފައިވާކަމަށް ޑރ މުނައްވަރު ވިދާޅުވި އެވެ.
އޭގެ އިތުރުން އެ މައްސަލަ ކޯޓުގައި ކުރިއަށް ދިޔައިރުވެސް ރައްޔިތުންގެ ހައްގުގައި ވަކާލާތު ކުރެވިފައި ނުވާކަން ހާމަކަން ބޮޑުގޮތެއްގައި ފެންނަން އޮތްކަމަށް ޑރ މުނައްވަރު ވިދާޅުވި އެވެ.
ރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިޔައީ އިހުމާލުންކަމަށް ދަންނަވަން ޖެހެނީ އެފަދަ އެތައް ސަބަބެއް ހުރުމުންކަން ފާހަގަކުރައްވާ ޑރ މުނައްވަރު ވިދާޅުވީ، އެކަން އެގޮތަށް ކުރުމަށްފަހު ދެން ކުރެވޭނެ ކަމެއް ނެތްކަމަށް ބުނުމަކީވެސް ޒިންމާދާރުކަން ކުޑަ ޖަވާބެއް ކަމަށެވެ.
ދައުލަތުން ބޭނުންނަމަ އަދިވެސް ދައުލަތުގެ ފަރާތުން އެކަން ކުރެވޭނެ ގޮތްތައް ހުންނާނެ ކަމަށާއި، އެހެން ނަމަވެސް ކަނޑުގެ ސަރަހައްދުން ބައެއް ގެއްލުމަކީ ކާމިޔާބީއެއްކަމަށް ޤަބޫލުކުރާއިރު، ސަރުކާރުން އެ މައްސަލަ އިސްތިއުނާފު ނުކުރާނެކަން ޔަގީންކުރެވޭކަމަށް ޑރ މުނައްވަރު ވަނީ މީގެ ކުރިންވެސް ވިދާޅުވެފަ އެވެ.
އެހެން ނަމަވެސް އެ މައްސަލައިގައި ގުޅިފައިވާ އިއްތިހާދުން މަސައްކަތް ކުރާނެ ކަމަށާއި، އަދި އެ މައްސަލައިގައި އިހުމާލުވާ ފަރާތްތައް ޒިންމާކުރުމުގެ މަސައްކަތްވެސް އެކުއެކީގައި ކުރައްވާނެކަމަށް ޑރ މުނައްވަރު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
