ރައީސް ޞާލިހު މޮރިޝަސްއަށް ސިޓީ ފޮނުވުން ކުށްވެރިކުރަން، އިސްތިއުފާ ދެއްވާ: ގދ އަތޮޅު ކައުންސިލް
ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ސޮއިކުރައްވާ މޮރިޝަސްއަށް ސިޓީއެއް ފޮނުވާފައިވާ ކަމަށާއި އެކަން ކުށްވެރި ކުރާ ކަމަށް ހުވަދުއަތޮޅު ދެކުނުބުރީ އަތޮޅު ކައުންސިލުން ބުނެފިއެވެ.
އެ ކައުންސިލުން ނެރުނު ބަޔާނުގައި ބުނީ ރާއްޖޭގެ ކަނޑުގެ ސަރަހައްދުން ބައެއް ގެއްލޭގޮތަށް އިޓްލޮސްއިން ހުކުމް ކުރަން ޖެހުނު އެންމެ ބޮޑު ސަބަބަކީ ރައީސް ސޮއިކުރައްވާ އިޓްލޮސްގެ ބޮޑުވަޒީރަށް ފޮނުއްވެވި ސިޓީ ކަމަށާއި ޒަމާނުއްސުރެ ދިވެހިރާއްޖޭގެ ދެކުނުން ފޯޅަވަހި ހިމެނޭ ދިވެހިރާއްޖޭގެ ހާއްސަ އިގްތިސާދީ ސަރަހައްދަކީ ގާނޫނުގައިވާ ގޮތުގެ މަތިން 200 ނޯޓިކަލް މޭލު ކަމުގައި ވާއިރު އެގޮތަށް އެކަން ބޭއްވުމަށް ރާއްޖެއިން ވަކާލާތު ކޮށްފައި ނުވާކަމަށެވެ.
ދިވެހިރާއްޖޭގެ ކަނޑުގެ ސަރަހައްދުތަކާ ބެހޭ ގާނުނުގައި ބަޔާންކުރާ ރާއްޖޭގެ ހާއްސަ އިގްތިސާދީ ސަރަހައްދުގެ ދެކުނުން ފޯޅަވަހީގެ އުތުރުން އޮންނަ ސަރަހައްދުން 45331 އަކަިލޯމީޓަރު ގެއްލޭގޮތަށް އިޓްލޮސްއިން ކުރި ހުކުމުގެ ސަބަބުން މުޅި ދައުލަތަށާއި ރައްޔިތުންނަށް އަދި ހާއްސަކޮށް މަސްވެރިންނަށް އިޔާދަ ނުކުރެވޭ ވަރުގެ ގެއްލުމެއް ލިބިފައި ވާކަމަށް އެ ކައުންސިލްގެ ބަޔާނުގައި ބުނެފައިވެއެވެ.
ދިވެހިންނަކީ ދޮށީގެ މަސްވެރިކަން ކުރުމަށް ނަމޫނާ ބައެއްކަން ފާހަގަ ކުރަމުން އެ ކައުންސިލުން ބުނީ މޮރިޝަސްއަކީ އެއްވެސް ވަރަކަށް އެ ސަރަހައްދުން މަސްވެރިކަން ކުރާ ބައެއް ނޫން ކަމަށާއި އެމީހުންނަކީ ދާ އަޅައިގެން މަސް ހިފުމަށް ލައިސަންސް ދޫކުރާ ބައެއް ކަމަށެވެ.
އެހެންކަމުން އެ ސަރަހައްދުން ދާ އަޅައިގެން މަސްވެރިކަން ކުރާ ނަމަ ރާއްޖޭގެ ދޮށީގެ މަސްވެރިކަމަށް އެކަމުން ބޮޑެތި އަސަރުތަކެއް ކުރާނެ ކަމަށް ގދ. އަތޮޅު ކައުންސިލުން ބުންޏެވެ.
މިކަމާ ގުޅިގެން ރައީސް ސޯލިހު އިސްތިއުފާ ދެއްވަން ޖެހިވަޑައިގަންނަވާނެ ކަމަށް ގދ އަތޮޅު ކައުންސިލުން ބުންޏެވެ.
މީގެ އިތުރުން އެ ކައުންސިލުން ވަނީ، ދިވެހިރާއްޖޭގެ މިނިވަންކަމާއި ސިޔާދަތު ދަމަހައްޓައި ކެނޑިނޭޅި މަސައްކަތް ކުރުމަށް ކަމާބެހޭ އިދާރާތަކަށް ގޮވާލާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
