"ރާއްޖެއަކީ، ކަނޑުން ބައެއް ދޫކޮށްލުމަށްފަހު ސަރުކާރުން އެކަމާ އުފާކުރާ ހަމައެކަނި ގައުމު"

ރާއްޖެއަކީ، ކަނޑުގެ ސަރަހައްދުން ބައެއް ދޫކޮށްލުމަށްފަހު ސަރުކާރުގެ ވެރިން އެކަމާ އުފާކޮަށް އެއީ ކާމިޔާބީއެއް ކަމަށް ބުނާ ހަމައެކަނި ގައުމު ކަމަށް ރާއްޖޭގެ ކުރީގެ ޚާރިޖީ ވަޒީރު ދުންޔާ މައުމޫން ވިދާޅުވެއްޖެއެވެ.

ޗާގޯސްއާއި ދިވެހިރާއްޖެއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލަ ދިވެހިރާއްޖެއިން ވަކާލާތު ކުރިގޮތަށް ނިމިގެން ދިޔުމުން ސަރުކާރުން އެކަމާއި މެދު އުފާކޮށް، އެއީ ކާމިޔާބީއެއް ކަމަށް  ސިފަކޮށް އަންނަނީ ވާހަކަ ދައްކަމުންނެވެ.

އެކަމާއި ގުޅިގެން ދުންޔާ ކުރެއްވި ޓްވީޓެއްގައި ވިދާޅުވީ، ސަރަހައްދުން ބައެއް އެހެން ގައުމަކަށް ދޫކޮށްލުމަށްފަހު އެކަމާ އުފާ ކުރާ ހަމައެކަނި ގައުމަކީ ރާއްޖެ ކަމަށެވެ. އެހެންނަމަވެސް، އިޓްލޮސް އިން 28 އޭޕްރިލް ވަނަ ދުވަހު އެ ނިންމި ނިންމުން ދިވެހިން ގަބޫލުނުކުރާނެ ކަމަށާ، އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެސް އެކަމާއި ގުޅިގެން ޖަވާބުދާރީ ކުރުވަން ޖެހޭނެ ކަމަށް ދުންޔާ ވިދާޅުވި އެވެ.

ޗާގޯސްއާއި ދިވެހިރާއްޖެއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން ހުށަހެޅި މައްސަލާގައި ދިވެހިންނަށް ލިބުނީ ކާމިޔާބީއެއް ކަމަށް ސަރުކާރުން ބުނި ކަމުގައި ވިޔަސް، އޭގެ ސަބަބުން ދިވެހިރާއްޖޭގެ ގާނޫނު އަސާސީން ދިވެހިންގެ ސަރަހައްދު ކަމުގައި ކަނޑައަޅާފައިވާ 200 ނޯޓިކަލް މޭލުގެ ހާއްސަ އިގްތިސާދީ ސަރަހައްދުން 45،331 އަކަ މީޓަރު ވަނީ ގެއްލިފައި ކަމަށް އިދިކޮޅުން އަންނަނީ ބުނަމުންނެވެ.

އަދި ކަނޑުގެ ސަރަހައްދުން އެ ގެއްލުނުބައި ދެން އަންނަ ވެރިކަމެއްގައި ހޯދާނެ ކަމަށްވެސް އެފަރާތްތަކުން އަންނަނީ ބުނަމުންނެވެ.