އެލްޖީއޭގެ ސީއީއޯ ކަމުން އަފްޝަން އިސްތިއުފާ ދެއްވައިފި
ލޯކަލް ގަވަމެންޓް އޮތޯރިޓީ (އެލްޖީއޭ)ގެ ސީއީއޯގެ މަގާމުން އަފްޝަން ލަތީފު އިސްތިއުފާ ދެއްވަން ނިންމަވައިފި އެވެ.
އެލްޖީއޭގެ ސީއީއޯގެ މަގާމުން އިސްތިއުފާ ދެއްވިކަން އަންގައި އަފްޝަން ސިޓީ ހުށަހަޅުއްވާފައިވާ ކަން "ވޮއިސް" އަށް ވަނީ ކަށަވަރުވެފައެވެ.
މަގާމުން އިސްތިއުފާ ދެއްވަން ނިންމަވައި އަފްޝަން އެލްޖީއޭއަށް ފޮނުއްވި ސިޓީގައި ވަނީ އެ މަގާމުގައި ހުންނެވިއިރު އެންމެ އިސްކަމެއް ދެއްވީ ލޯކަލް ކައުންސިލްތަކާއި، ސަރުކާރާއި، ރައްޔިތުންނާމެދު އޮންނަ ގުޅުން ހަރުދަނާކޮށް ލާމަރުކަޒީ ނިޒާމަށް އޮންނަ އިތުބާރު އިތުރު ކުރުމަށް ކަމަށެވެ.
އަދި އެލްޖީއޭގެ އެންމެ މުހިންމު އެއް ދައުރަކީ އިސްނަގައިގެން މައްސަލަ ހައްލުކުރުން ކަމުގައި ދެކި، ކައުންސިލްތަކާއި ސަރުކާރުގެ އެކި އިދާރާތަކާއި އަމިއްލަ މުއައްސަސާ ތަކާއި، މަދަނީ ޖަމިއްޔާތަކާއި، ވިޔަފާރިކުރާ ފަރާތްތަކާއި ކައުންސިލްތަކާ ޖެހޭ މައްސަލަތައް ހައްލު ކުރުމުގައި ހާއްސަ ސަމާލުކަމެއް ދީ، އެފަދަ ހާލަތްތަކުގައި ކައުންސިލްތަކުގެ ހައްގު ދިފާއު ކުރުމަށް ވީހާވެސް ބޮޑު އިސްކަމެއް ދީފައިވާނެ ކަމަށްވެސް ބުނޭފައިވެއެވެ.
މިއާއެކު އަފްޝަން ވަނީ އެލްޖީއޭގެ ސީއީއޯގެ މަގާމުގައި ހުންނެވިއިރު މުވައްޒަފުން ބެހެއްޓެވި ގާތްކަމާއި، ދެއްވި އިރުޝާދާ ލަފައަށް ހިތުގެ ފުންމިނުން ޝުކުރު ދަންނަވާފައެވެ.
އަފްޝަންގެ ސިޓީގައި އެ މަގާމުން އޭނާ އިސްތިއުފާ ދެއްވި ސަބަބު ހާމަކުރައްވާފައެއް ނުވެއެވެ.
އެލްޖީއޭގެ ސީއީއޯއަކަށް އަފްޝަން އައްޔަންކުރެއްވީ ޖޫން 9، 2020 ގަ އެވެ. އޭގެ ކުރިން އޭނާ ވަނީ އެމްޑީޕީގެ ފަރާތުން މާލޭގެ މޭޔަރު ކަމަށް ވާދަކުރުމަށް ޕާޓީގެ ޕްރައިމަރީގައި ވާދަކުރަން ނިންމަވައި ކެމްޕޭން ވެސް ކުރިއަށް ގެންދަވާފައެވެ. ފަހުން ނަން އަނބުރާ ވަނީ ގެންދަވާފައެވެ.
އަފްޝަން އަކީ އެމްޑީޕީގެ ފިކުރެއްގެ ދިރުން ފެކްޝަނުގައި އިސްކޮށް ހަރަކާތްތެރި ވަމުންދާ އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމުރުގެ އަނބިކަނބަލުންނެވެ. އެމްޑީޕީ ޕްރައިމަރީގައިވެސް އަފްޝަން ހުންނެވީ މަޖިލީހުގެ ރައީސް މުހައްމަދު ނަޝީދު އާއި އެއްކޮޅުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
