އެއްޖިންސުން ގުޅުން ހިންގުން ޕްރޮމޯޓް ކުރާ ޖާޒީ ލާތީ، މެޗް ބޯއިކޮޓް ކޮށްފި

ފްރެންޗް ލީގުގެ މެޗެއްގައި އެއްޖިންސުން ގުޅުން ހިންގުން ޕްރޮމޯޓް ކުރާ ކުލަތައް ހިމެނޭ ޖާޒީ ލާންޖެހޭތީ ހަތަރު ކުޅުންތެރިއެއް މެޗް ބޯއިކޮޓް ކޮށްފިއެވެ.

އެއްޖިންސުން ގުޅުން ހިންގުން ޕްރޮމޯޓް ކުރުމުގައި އެންމެ އިސް ސަފުގައި މަސައްކަތް ކުރާ ފްރާންސްގައި ބާއްވާ ފްރެންޗް ލީގުގެ 1 ގެ މެޗުތައް މިހަފްތާ ބަންދުގައި ފަށާފައިވާއިރު، ލީގުގައި ބައިވެރިވާ ހުރިހާ ޓީމެއްގައިވެސް ވިއްސާރަ ދުނީގެ ކުލަތަކުން އެއްޖިންސުން ގުޅުންހިންގުން ޕްރޮމޯޓްކުރާ ކުލަތައް ހިމެނޭ ޖާޒީއެއް އޮންނަން ޖެހެއެވެ. އަދި އެ ޖާޒީ ލައިގެން މެޗެއް ކުޅެންވެސް ޖެހެއެވެ.

އެހެންނަމަވެސް، އެ ލީގުގެ ޓީމެއް ކަމުގައިވާ ޓުލޫޒް އެފްސީގެ ފަސް ކުޅުންތެރިން ވަނީ އެ ޖާޒީ ލައިގެން އިއްޔެގެ މެޗުގައި ނުކުޅޭނެ ކަމަށް ޓީމުގެ މެނޭޖްމަންޓަށް އަންގައި މެޗް ބޯއިކޮޓް ކޮށްފައެވެ. އެގޮތުން، އެ މެޗް ބޯއިކޮޓް ކޮށްފައިވާނީ، ގަތަރުގައި ބޭއްވުމު ފީފާ ވޯލްޑް ކަޕްގައި މޮރޮކޯގެ ޓީމުން ވިދާލި ޒަކަރިއްޔާ އަބޫކްލާލް އާއި، މޫސާ ޑިއާރާ އާއި، ފާރެސް ޝައިބީ އާއި، ލޯގަން ކޯސްޓާ އާއި ސައީދު ހަމުލިސް އެވެ.

އެ ކުޅުންތެރިން މެޗު ކުޅުމާއި ދެކޮޅު ހެދުމުން ޓީމުގެ މެނޭޖްމަންޓުން ކުޅުންތެރިން މެޗު ކުޅުމަށް އެއްބަސްކުރެވޭތޯ މަސައްކަތް ކުރި ކަމަށްވެސް މީޑިއާ ރިޕޯޓްތައް ބުނެއެވެ. އެހެން ނަމަވެސް އެ ކުޅުންތެރިންވަނީ މެޗުގައި ނުކުޅުމަށް ނިންމި ނިންމުން ދަމަހައްޓާފައެވެ.

އެ ނިންމުމާއި ގުޅިގެން ޒަކަރިއްޔާ އަބޫކްލާލް އޭނާގެ އިންސްޓަގްރާމްގައި ކޮށްފައިވާ ޕޯސްޓެއްވަނިީ އޭނާ އަކީ އެންމެނަށްވެސް އިހްތިރާމް ކުރާ މީހެއް ކަމަށެވެ. އަދި އެގޮތުން އޭނާ ގަބޫލުކުރާ ގަބޫލުކުރުންތަކަށްވެސް އިހްތިރާމް ކުރާ ކަމަށާ، އޭގެ ސަބަބުން، އެއްޖިންސުން ގުޅުން ހިންގުން ޕްރޮމޯޓް ކުރާ ކެންޕެއިންގައި ބައިވެރި ވުމަށް ދެކޮޅު ހަދާކަމަށެވެ. މިއާއެކު އޭނާ ވަނީ އޭނާގެ އެ ނިންމުމަށް އިހްތިރާމް ކުރުމަށްވެސް ޓީމުގެ ކިބައިން އެދިފައެެެވެެ.

ޓުލޫޒް ގެ ކުޅުންތެރިންގެ އިތުރުން، އާދިއްތަ ދުވަހުގެ މެޗުގައި، އެ ޓީމާއި ދެކޮޅަށް ނުކުތް ޓީމުގެ ކުޅުންތެރިއެއް ކަމަށްވާ މުސްތަފާ މުހައްމަދު ވެސް ވަނީ އެއްޖިންސުން ގުޅުން ހިންގުން ޕްރޮމޯޓް ކުރާ އެ މެޗް ބޯއިކޮޓް ކޮށްފައެވެ.

އެއްޖިންސުން ގުޅުން ހިންގުން ޕްރޮމޯޓް ކުރާތީ މީގެ ކުރިންވެސް ބައެއް މުސްލިމު ކުޅުންތެރިން މެޗްތައް ބޯއިކޮޓް ކޮށްފައިވެއެވެ. އެގޮތުން ބޯއިކޮޓް ކުރި ކުޅުންތެރިންގެ ތެރޭގައި ޕީއެސްޖީ ޓީމުގެ ސެނެގާލް މިޑްފީލްޑަރު އިދްރީސާ ގޭ ހިމެނެއެވެ.