ފުއްގިރި ޑީލްގެ މަޝްވަރާގައި އިބްރާހީމް ރަޝީދު ބައިވެރިވިކަމަށް ބުނި ވާހަކަ ދޮގުކޮށް، މައްސަލަ ފުލުހަށް

ރ. ފުއްގިރި ކުއްޔަށް ދިނުމުގެ މުއާމަލާތުގެ ތެރެއިން ކުރިއަށް ދިޔަ މަޝްވަރާ ބައްދަލުވުމުގައި މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ބައިވެރިވެވަޑައިގެންނެވި ކަމަށް ކުރީގެ ނައިބު ރައީސް އަހުމަދު އަދީބު ވިދާޅުވުމުން އެކަން ދޮގުކޮށް، އެ މައްސަލަ ތަހުގީގުކުރަން ފުލުހުންނަށް ހުށަހެޅުމަށް ރައްޔިތުންގެ މަޖިލީހުގައި އެދިއްޖެ އެވެ.

ރ. ފުއްގިރި ކުއްޔަށް ދޫކުރުމުގެ "ޑީލް" ހަމަޖައްސައިދިން އިންޑިއާގެ ވިޔަފާރިވެރިންގެ ރާއްޖޭގެ މަންދޫބެއްގެ ގޮތުގައި އުޅުއްވީ ރައްޔިތުންގެ މަޖިލިހުގެ މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ކަމަށް، ކުރީގެ ނައިބު ރައީސް އަހުމަދު އަދީބު ކޯޓުގައި ވަނީ ވިދާޅުވެފައެވެ.

އެގޮތުން، އެންމެ ފުރަތަމަ ދުބާއީ ކުންފުނި ހިންގަމުން ދިޔަ ބާރުގަދަ އިންޑިއާގެ ވިޔަފާރިވެރިންތަކާ ފުރަތަމަ ބައްދަލުކުރެއްވި އިރު އެ ބައްދަލުވުމުގައި މެންބަރު އިބްރާހީމް ރަޝީދު ބައިވެރިވެވަޑައިގެންނެވި ކަމަށް އަދީބު ވިދާޅުވި އެވެ. އަދި ބޮންޑެ އެ ބައްދަލުވުމުގައި ބައިވެރިވެވަޑައިގަތީ އެ ކުންފުނީގެ ރާއްޖޭގެ ރެޕްރެޒެންޓެޓިވް ނުވަތަ މަންދޫބެއްގެ ގޮތުގައި ކަމަށްވެސް އަދީބު ވިދާޅުވި އެވެ.

އެކަމާއި ގުޅިގެން، ބޮންޑޭ މަޖިލީހަށް ފޮނުއްވި ސިޓީގައި ބުނީ މިހާރު ކުރިމިނަލް ކޯޓުގައި ކުރިއަށް ގެންދާ އެމްއެމްޕީއާރުސީގެ ހިޔާނާތުގެ މައްސަލާގެ ޝަރީއަތުގައި އަދީބު އޭނާއާ ދެކޮޅަށް ދޮގު ހެކިބަސް ދީފައިވާ ކަމަށެވެ.

އަދި އޭގެ ސަބަބުން އޭނާގެ އަބުރަށް އުނިކަމެއް އައިސްފައިވާ ކަން ފާހަގަކުރައްވައި އެ މައްސަލަ ތަހުގީގުކުރުމަށް ފުލުހުންނަށް ހުށަހަޅައިދެއްވުމަށް އޭނާ ވަނީ އެދިފައެވެ.

"މި ވަގުތަކީ މަޖިލީހުގެ ކޮމެޓީތަކުގެ މަސައްކަތް ވެސް ހުއްޓިފައިވާ ވަގުތެއް ކަމުގައި ވާތީ، މި މައްސަލަ ތަހުގީގުކުރުމަށް ފުލުހުންނަށް ހުށަހަޅައިދެއްވުމަށް އެދި ދެންނެވީމެވެ،" ބޮންޑޭގެ ސިޓީގައިވެ އެވެ.

އަދީބުގެ ހެކިބަހާއި ގުޅިގެން މީގެ ކުރިން ބޮންޑޭ ކުރެއްްވި ޓުވީޓެއްގައި ވަނީ، އޭނާގެ އެކައުންޓަކުން ފުއްގިރިއަށް ދެއްކި ފައިސާ (ކޮރޮސްޗެކް ) އެސްއޯއެފްގެ އެކައުންޓަށް ސަރުކާރުން ޖަމާކޮށް ދައުލަތަށް ލިބެންޖެހޭ ފައިސާއަށް ސަރުކާރުން ހިޔާނަތްތެރިވި ކޮރަޕްޝަންގެ މައްސަލަ 2016 ވަނަ އަހަރު އޭސީސީގެ ސަމާލުކަމަށް ގެންނެވީ އޭނާ ކަމަށް ވިދާޅުވެފައެވެ. އަދި އެ މައްސަލާގައި ބަޔާންވެސް ދެއްވި ކަމަށް ވިދާޅުވި އެވެ.