ޤާސިމް އަލީ ވަހީދަށް: ޅަ އުމުރުގަ ދިމާވާނެ ތިކަހަލަ ކިތަންމެ ކަމެއް، މާޔޫސްވާކަށް ނުވާނެ

ޅަ އުމުރުގަ ކަންކަން ދިމާވާނެ ކަމަށާއި އެފަދަ ކަންކަމާއި މެދު މާޔޫސްވެގެން ނުވާނެ ކަމަށް ރައްޔިތުން މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީ (ޖޭޕީ) ގެ ލީޑަރު ޤާސިމް އިބްރާހިމް، ކުރީގެ ޓޫރިޒަމް މިނިސްޓަރ އަލީ ވަހީދަށް ނަސޭހަތް ދެއްވަމުން ވިދާޅުވެއްޖެއެވެ.

ޤާސިމް މިފަދައިން ވިދާޅުވެފައިވަނީ އަލީ ވަހީދު ވިލާ މާމިގިލީ އެއަރޕޯޓަށް ވަޑައިގަތުމުން މަރުހަބާ ދެންނެވުމަށްފަހު ދެއްވި ބަސްދީގަތުމެއްގައެވެ.

އެގޮތުން ޤާސިމް ވިދާޅުވީ ޅަ އުމުރުގައާއި އުމުރުގެ ފަހު ކޮޅުގައިވެސް ބައިވަރު އެތައް ކަންތައްތަކެއް ދިމާވާނެ ކަމަށެވެ.

"ދުނިޔޭގެ ހަޔާތަކީ ބައެއް ފަހަރަށް ނޫން ހުރިހާ ފަހަރަކުވެސް އަޕް އެންޑް ޑައުންގެ ކާޅު ކާޅުއޮތްދުޅަ އަށޭ މީހުން ބުނާނެ. ދުނިޔޭގެ ހަޔާތުގަ އިންސާނާ ދާނެ ދަތުރު ކުރާނެ އެއް ވަތް މަތިން އަނެއް ވަތް ދަށުން ލާފަ."

ޤާސިމް އިބްރާހިމް

އެހެންކަމުން ކުރިމަތިވާ ކަންތައްތަކާއި ހެދި ނާއުންމީދު ވެގެން މީހާގެ މުޅި ހަޔާތް ބަރުބާދު ކޮށްލައި، މީހާގެ އެއްވެސް ކަހަލަ ޝައުގުވެއި ކަމެއް ނެތި، މާޔޫސް ވެގެން ދިޔުމަކީ ވެގެން ވާނެ ކަމެއް ނޫން ކަމަށް ޤާސިމް ވިދާޅުވިއެވެ.

މީގެ ބަދަލުގައި އަބަދުވެސް ދާންވާނީ ކުރިއަށް ކަމަށް ޤާސިމް ވިދާޅުވިއެވެ.

"އަބަދުވެސް ކުރިއަށް އޮންނަން ވާނީ ހުރިހާ ރަނގަޅު ކަމެއްގަވެސް ދާންވާޏީ ކުރިއަށް ވިޔާނުދާ ކަމެއް ހުރިއްޔާ އެކަމުން ތައުބާވެެ ތައުބާވެ އިސްތިޣްފާރުކުރާނީ ރަނގަޅު ކަންތައްތައްތަކުގައި އަބަދުވެސް ދާންވާނީ ކުރިއަށް."

ޤާސިމް އިބްރާހިމް

ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާކުރުމާއި ޖިންސީ އަނިޔާ ދިނުމާއި ރޭޕްކުރަން އުޅުމާއި ބޭއަދަބީ ގޮތުގައި ޖިންސީ ގުނަވަން ހާމަކުރުމާއި ހުއްދަ ނޫން ޖިންސީ މުއާމަލާތެއް ހިންގުމުގެ ދައުވާ އުފުލާފައިވަނިކޮށް، ބޭސްފަރުވާއަށް ކަމަށް ބުނެ ރާއްޖެއިން ބޭރަށް ދިޔުމަށްފަހު، އެ ދައުވާ އަނބުރާ ގެންދިޔުމުން އަލީ ވަހީދު އަނބުރާ ރާއްޖެ އައިސްފައިވަނީ މިދިޔަ އަންގާރަ ދުވަހުއެވެ.