މަޖިލިސް މެމްބަރުންގެ މުސާރަ ބޮޑުވެގެން ރައްޔިތުން ނޫޅޭ: ޢަބްދުލްޣަފޫރު

ރައްޔިތުންގެ މަޖިލީހުގެ މެމްބަރުންގެ މުސާރަ ބޮޑުވެގެން ރައްޔިތުން ޝަކުވާ ނުކުރާ ކަމުގައި ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު ޢަބްދުލްޣަފޫރު މޫސާ ވިދާޅުވެއްޖެއެވެ.

ރައްޔިތުންގެ މަޖިލީހުގެ މެމްބަރުންގެ އަދަދު މަދުކޮށް ވަކި ވަރެއްގައި ހިފެހެއްޓުމަށް ގާނޫނު އަސާސީ އިސްލާހުކުރުމަށް ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރާހިމް ހުށައެޅި އިސްލާހަށް ވާހަކަދައްކަވަމުން އަބްދުލްޣަފޫރު ވިދާޅުވީ، މަޖިލީހުގެ މެމްބަރުންނަށް ލިބޭ މުސާރައާއި އިނާޔަތް ކުޑަކުރަން ބައެއް މެމްބަރުން ބިލްތައް ހުށަހަޅާ ކަމަށާއި، އެހެން މަޖިލީހުގެ މެންބަރެއްގެ ހައިސިއްޔަތުން އޭނާ މަސައްކަތް ކުރައްވާތާ މިހާ ދުވަސް ވީއިރުވެސް ރައްޔިތުންގެ ފަރާތުން އެ ޝަކުވާ ނާންނަކަމަށެވެ.

"އަޅުގަނޑު ވެސް މި މަޖިލީހުގައި އުޅޭތާ ލައްކަ ދުވަސް ވެއްޖެ. 15 ވަރަކަށް އަހަރު ވަނީ އަޅުގަނޑުގެ ދާއިރާގެ އެއްވެސް ރައްޔިތަކު އަޅުގަނޑު ކައިރީ ނުބުނޭ މުސާރަ މާ ބޮޑޭ، އިނާޔަތް މާ ބޮޑޭ."

މެންބަރު ޢަބްދުލްޣަފޫރު މޫސާ

ޣަފޫރު ވިދާޅުވީ ރައްޔިތުން ޝަކުވާ ކުރަނީ މެންބަރުންގެ މުސާރަ ބޮޑުވެގެން ނޫން ކަމަށެވެ. އެހެނެއްކަމަކު އެ ފަރާތްތަކުގެ ޝަކުވާ އަކީ އެމީހުންނަށް ބޭނުންވާ މަސައްކަތް އިހުލާސްތެރިކަމާއެކު މެމްބަރުން ކޮށްނުދޭ ކަމުގެ ޝަކުވާ ކަމަށެވެ.

"އެއްޗެއް ބޮޑުވެގެނެއް ރައްޔިތުންނެއް ނޫޅޭ. ރައްޔިތުން އަޅުގަނޑުމެން ކައިރީ އަބަދު ކުރާ ޝަކުވާ އަކީ ބިނާކުރަނިވި ރަނގަޅު މަސައްކަތްތަކެއް މަޖިލީހުން ކޮށްދޭށޭ. އޭރުން ރައްޔިތުންގެ ހިތްހަމަޖެހުން މަޖިލީހުގެ މެމްބަރުންނަށް އޮންނާނެ."

މެންބަރު ޢަބްދުލްޣަފޫރު މޫސާ

މިއާއެކު ޣަފޫރު ވިދާޅުވީ، ރައްޔިތުން, ރައްޔިތުންގެ މަޖިލިސް ބަލައިގަނެ، މަޖިލީހަށް ތަރުހީބުދޭނީ، ޒާތީ ތައައްސަބުން އެއްކިބާވެ ތިބެ ގައުމަށް ފައިދާވާނެ ހަރުދަނާ މަސައްކަތެއް ކުރުމުން ކަމަށެވެ.

މަޖިލިސް މެންބަރުންގެ މުސާރަ ބޮޑު ކުރުމާއި މެދު ރައްޔިތުންގެ ޝަކުވާއެއް ނެތް ކަމަށް ޣަފޫރު ވިދާޅުވި ނަމަވެސް ރައްޔިތުންގެ މަޖިލީހުގެ އިންތިހާބުގެ ދުވަސްވަރު ބޭއްވި ބަހުސްގައި ވާހަކަދައްކަވަމުން ޣަފޫރު ވަނީ މަޖިލީހުގެ މެމްބަރުންގެ މުސާރަ އާއި އިނާޔަތްތައް ބޮޑު ކަން ފާހަގަ ކުރައްވާފައެވެ. އަދި އެ އަދަދު ކުޑަކުރަންޖެހޭ ކަމަށްވެސް އޭނާ ވިދާޅުވިއެވެ.