ޝިއާއުގެ މަރު: ޝާހިލްގެ މައްޗަށް ކުށް ސާބިތުވާވަރަށް ހެކި އެބަހުރި، މޯޓިބް ޔަގީނެއް ނޫން: ފުލުހުން
ހ. ޝީރީން ވިލާގައި އަނިޔާވެރިގޮތަކަށް މަރާލާފައި އޮތްވާ ފެނުނު ޝިޔާއު މުހައްމަދު ސައީދު (22 އަހަރު) ގެ މައްސަލައިގައި ތުހުމަތުކުރެވޭ އަލީ ޝާހިލްގެ މައްޗަށް ކުށް ސާބިތުވާވަރަށް ހެކި ހޯދިފައިވާކަން ފުލުހުން ހާމަކޮށްފިއެވެ.
އެކަން ފުލުހުން ހާމަކޮށްފައިވަނީ މުހިންމު 3 މައްސަލައަކާއި ގުޅިގެން ފުލުހުންގެ ފަރާތުން ބޭއްވި ނޫސްވެރިންގެ ބައްދަލުގައި މައުލޫމާތު ހިއްސާކުރަމުންނެވެ.
ފުލުހުން ބުނީ ޝިޔާއުގެ ޕޯސްޓްމޯޓަމްގެ ވަގުތީ ވަތީޖާތައް ލިބިފައިވާކަމަށެވެ. އަދި އެ ނަޖީތާއަށް ބަލާއިރު، ޝިޔާއުއަށް ބޮޑެތި އަނިޔާތަކެއް ދީފައިވާކަން ދެނެގަނެވިފައިވާކަމަށެވެ. އަދި ޝިޔާއު މަރުވުމަށް ދިމާވި ސަބަބަކީވެސް ބޮޑެތި އަނިޔާތަކެއް ލިބުންކަން ފުލުހުން ފާހަގަކުރެއްވިއެވެ. އަދި އޭނާ މަރުވުމަށް ފަހުގައިވެސް އިތުރު އަނިޔާ ތަކެއް ދީފައިވާ ކަމަށް ފުލުހުން ބުނެފައިވެއެވެ.
އެއާއެކު ފުލުހުން ބުނީ ކުށް ސާބިތުވާވަރަށް ހެކި ހޯދިފައިވީނަމަވެސް މިހާތަނަށް އަދި އެ މަރުގެ މޯޓިވް ދެނެގަނެވިފައި ނުވާކަމަށެވެ. އަދި މިހާރު ފުލުހުން މޯޓިވް ޔަގީންކުރުމުގެ މަސައްކަތް ކުރަމުންދާކަމަށް ފުލުހުން ވަނީ ބުނެފައެވެ. އެގޮތުން ޝާހިލްގެ ފޯނުންވެސް މައުލޫމާތު ތަކެއް ނެގުމުގެ މަސައްކަތް މިހާރު ކުރެވެމުންދާ ކަމަށް ފުލުހުން ފާހަކުރެއްވިއެވެ.
ފުލުހުން އިތުރަށް ބުނީ މި މައްސަލައާއި ގުޅިގެން ޕީޖީ އޮފީހާއި އެކު ގާތުން މަސައްކަތްތެކެއް ކުރެވެމުންދާކަމަށެވެ. އަދި ކުރިއަށް އޮތް ދެ ހަފްތާތެރޭގައި ދައުވާ އުފުލުމަށް ޕީޖީއަށް ފޮނުވޭނެކަމަށް ފުލުހުން ވަނީ ބުނެފައެވެ. ޝާހިލްގެ މައްޗަށް އުފުލުމަށް ނިންމާފައިވަނީ ގަސްދުގައި މީހަކު މެރިކަމުގެ ކުށުގެ ދައުވާކަމަށް ފުލުހުން ވަނީ ހާމަކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
