މި ސަރުކަާރުން ދެވަނަ ދައުރެއްގެ ވާހަކަދައްކަން ހެޔޮނުވާނެ: ހަސަން
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން ރައްޔިތުންނަށް އަންގަންޖެހޭ ކަންކަން ނާންގައި، ހައްލު ކުރަންޖެހޭ ކަންކަން ހައްލު ނުކޮށް، ދެވަނަ ދައުރެއްގެ ވާހަކަ ދެއްކެވުމަކީ ކުރަން ހެޔޮވާވަރުގެ ކަމެއް ނޫން ކަމަށް ވިދާޅުވެ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު އަދި އެމްޑީޕީގެ ކުރީގެ ޗެއާޕާސަން ހަސަން ލަތީފް ސަރުކާރަށް ވަރަށް ބޮޑަށް ފާޑު ވިދާޅުވެއްޖެއެވެ.
ޗާގޯސް މައްސަލައާ ގުޅޭ ގޮތުން ދަނގެތީ ދާއިރާގެ މެމްބަރު މުހައްމަދު ނާޒިމް ހުށަހެޅުއްވި ގަރާރަށް ރައްޔިތުންގެ މަޖިލީހުގެ މިއަދުގެ ޖަލްސާގައި ބަހުސް ކުރައްވަމުން ހަސަން ވިދާޅުވީ ޗާގޯސް އާއި ގުޅޭ މައްސަލައެއްގެ ވާހަކަ ދެކެވޭ އިރު، އެ މައްސަލަ އަކީ ކޮބައިކަމާއި، އޭގައި ވެގެން އުޅެނީ ކީއްކަމެއް ދިވެހި ރައްޔިތުންނަށްވެސް ރަނގަޅަށް ނޭނގޭކަމަށެވެ. އަދި މިހާރު ކަންކަން ވެގެން މިއުޅޭ ގޮތްވެސް ޚުދު އޭނާއަށްވެސް އަދި ރައްޔިތުންގެ މަޖިލީހަށްވެސް ސާފު ނުވާ ކަމަށާ، ސަރުކާރުން އެކަން ސާފު ނުކޮށްދޭ ކަމަށެވެ.
އަދި އެމައްސަލައާއި ގުޅިގެން ވަޒީރުންގެ މެދުގައިވެސް މަޝްވަރާ ކުރެވިފައިވާ ކަމަށް އޭނާ ގަބޫލުނުކުރައްވާއިރު، އެކަމާއި ބެހޭ ކުޑަ ނަމަވެސް މައުލޫމާތެއް ސަރުކާރުން ދެއްވީ ރައްޔިތުން ނުކުމެ "ހޯ ގޮވައި" ހަޅޭލެވުމުން ކަމަށް އޭނާ ވިދާޅުވިއެވެ. އެހެންނަމަވެސް އޭގެ ކުރިން ދެކެވުނު ވާހަކައާއި އެ ޕްރެސްގައި ދެކެވުނު ވާހަކަތަކުން އަނެއްކާވެސް ރައްޔިތުންނަށް ބޮޑު އޮޅުންތަކެއް އަރާފައިވާ ކަމަށް ހަސަން ވިދާޅުވިއެވެ.
މިއާއެކު ހަސަން ވިދާޅުވީ، އަންނަ އަހަރުގެ ރިޔާސީ އިންތިހާބަށް އެމްޑީޕީން ތައްޔާރުވަމުންދާއިރު، އެ އިންތިހާބު ކާމިޔާބު ކުރުމުގެ ވިސްނުން ސަރުކާރުން ގެންގުޅޭ ނަމަ މިއީ އަޅާނުލައި ފޮރުވާލާފައި ބާއްވާ ވަރުގެ ކުޑަ މައްސަލަ އެއް ނޫން ކަމަށާ މި މައްސަލަތަކުގެ "ވާނުވާ" ރައްޔިތުންނަށް އޮޅުންފިލުވައިދީ، ކަންކަން ސާފުކޮށްދޭން ޖެހޭ ކަމަށެވެ.
"އެމްޑީޕީން އަޅުގަނޑުމެން އެ އިންތިހާބު [ރިޔާސީ އިންތިހާބު] ކާމިޔާބު ކުރަން ބޭނުން ކަމަށްވަންޏާ، މީކީ ކުޑަ މައްސަލައެއް ނޫން. އަޅާނުލާ ފޮރުވާލާފައި ބާއްވައިގެން ގޮސްގެން އިންތިހާބު ކާމިޔާބު ކުރެވޭނެ ކަމަކަށް އަޅުގަނޑުމެން ގަބޫލުކޮށްގެނެއް ނުވާނެ"
މެންބަރު ހަސަން ލަތީފް
ހަސަން ލަތީފް އިތުރަށް ވިދާޅުވީ، އޭނާ ގަބޫލުކުރައްވާ ގޮތުގައި މި ސަރުކާރުގެ އެންމެ ބޮޑު އެއް މައްސަލައަކީ ކަންކަން ހިނގާ ގޮތް ސާފުކޮށް ބުނެ ނުދިނުމެވެ.
"ސަރުކާރުގެ މައިގަނޑު ސިޔާސަތަކީ، އެގެންގުޅޭ ސިޔާސަތެއް ކަމަށް އަޅުގަނޑަށް ފާހަގަވަނީ އެއްވެސް ސިޔާސަތެއް ނުގެންގުޅުމުގެ ސިޔާސަތު، އެއްވެސް ކަމެއްގައި އެއްވެސް ސިޔާސަތެއް ނުގެންގުޅުމުގެ ސިޔާސަތު. ޓްވީޓަކަށް ސްޓޭންޑް ބަދަލުވުން. ރައީސުލްޖުމްހޫރިއްޔާގެ ފައިންޕުޅު ދެކެވަޑައިގެންފައި ދަންނަވާލާ ވާހަކައަކަށް ސްޓޭންޑް ބަދަލުވުން. އެއީ ސިޔާސަތެއް ކަމަށް ގަބޫލުކުރެވޭކަށް ނެތް"
މެންބަރު ހަސަން ލަތީފް
ހަސަން ވިދާޅުވީ މިކަމުގައި ކަން ހިނގާ ގޮތާއި ދެން ވާން އުޅޭގޮތް ރައްޔިތުންނަށް ވަރަށް ސާފުކޮށް ކިޔާނުދޭ ކަމުގައި ވާނަމަ ރައީސް އިބްރާހިމް މުހައްމަދު ސޯލިހަށް ދެވަނަ ދައުރެއް ލިބޭނެ ކަމަށް ގަބޫލުފުޅު ނުކުރައްވާ ކަމަށެވެ.
"މިކަންކަން ނުކުރައްވާ [މައްސަލަތަކުގެ ހަގީގަތް ރައްޔިތުންނަށް ސާފުނުކޮށްދީ] ދެވަނަ ދައުރެއްގެ ވާހަކަ ދެއްކުމަކީ ވެސް ކުރަން ހެޔޮވާވަރުގެ ކަމެއް ކަމަކަށް އަޅުގަނޑު ގަބޫލެއް ނުކުރަން"
މެންބަރު ހަސަން ލަތީފް
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
