މީޑިއާ ނެޓުން ގޮތް ދޫކޮށް ބޮޑު ސްކްރީންގައި ވޯލްޑްކަޕް ބެލޭނެ ކަމަށް ބުނެފި

މި އަހަރު ގަތަރުގައި ބޭއްވުމަށް ހަމަޖެހިފައިވާ "ފީފާ ވޯލްޑް ކަޕް 2022" ގެ މެޗުތައް ބޮޑު ސްކްރީނުގައި ދެއްކުން މަނާ ކުރަން މީޑިއާ ނެޓުން ނިންމި ނިންމުމަށް ގިނަ ބައެއްގެ ނުރުހުން އަމާޒުވުމާއި ގުޅިގެން އެ ނިންމުން ބަދަލުކޮށް ބޮޑު ސްކްރީންގައި ވޯލްޑްކަޕް ބެލޭނެ ކަމަށް ބުނެފިއެވެ.

ރާއްޖޭގައި ފޯރިއާއެކު ގިނަ ބަޔަކު ބޮޑު ސްރީންގައި ބަލަމުން އަންނަ ކުޅިވަރުގެ މި ބޮޑު ހަރަކާތް ބޮޑު ސްރީންގައި ދެއްކުން މަނާ ކޮށް، މީޑިއާ ނެޓުން ފޮނުވާފައިވާ އިންޒާރުގެ ސިޓީއެއް "ވޮއިސް" އަށް ލިބުމާއި ގުޅިގެން އެކަން އާއްމުންގެ ސަމާލުކަމަށް އިއްޔެ ވާނީ ގެނެސްފައެވެ.

އެގޮތުން މީޑީއާނެޓުން ފޮނުވާފައިވާ އިންޒާރުގެ ސިޓީގައި ޕީޕާ ވޯލްޑް ކަޕްގެ މެޗުތައް ރާއްޖޭގެ ސަރަހައްދުގައި ދެއްކުމަށް ބޭނުންވާ "މީޑިއާ ރައިޓްސް ލައިސެންސް" ފީފާގެ ފަރާތުން ލިބިފައިވަނީ މީޑިއާ ނެޓަށް ކަމަށެވެ. އަދި ފީފާގެ ހުއްދަ އާއި އެކު މީޑިއާނެޓުން ފީފާ ވޯލްޑް ކަޕްގެ މެޗުތައް ރާއްޖޭގެ ސަރަހައްދުގައި ދެއްކުމުގެ ސަބްލައިސެންސް ދީފައިވަނީ ރާއްޖެ ޓީވީ އާއި، ޕީއެސްއެމް އާއި އައިސް ޓީވީއަށް ކަމަށް ބުނެފައިވެއެވެ.

އަދި ސިޓީ ހޯޓާ، ރެސްޓޯރަންޓު ފަދަ ވިޔަފާރިތަކުން މުބާރާތުގެ މެޗުތައް ދެއްކުމަށް ބޭނުންވާ ކޮމާޝަލް ހުއްދަ އެކަމަށް އެދޭ ފަރާތްތަކަށް މީޑިއާނެޓުގް ފަރާތުން ދޫކުރުމަށް ހަމަޖެހިފައިވާ ކަމަށްވެސް އެ ލިޔުމުގައި ވެއެވެ.

އެހެންނަމަވެސް، ސްޓްރީމިންގ ނުވަތަ ފްރީ-ޓު-އެއާރގެ ގޮތުގައި ފީފާ ވޯލްޑް ކަޕްގެ އެއްވެސްް މެޗެއް ލައިވްކޮށް ބްރޯޑްކާސްޓް ކުރުމަކީ ސަބްލައިސެންސް ދީފައިވާ ފަރާތްތަކަށްވެސް ހުއްދަ ކަމެއް ނޫން ކަމަށް މީޑިއާނެޓުން ބުނެފައިވެއެވެ.

"އަދި މުބާރާތުގެ އެއްވެސް މެޗެއް ސޯޝަލްމީޑިއާގެ އެއްވެސް ވަސީލަތަކުން ނުވަތަ އިންޓަނެޓް ގެ ޒަރީޢާއިން ބޭނުންކުރެވޭ އެއްވެސް ވަސީލަތަކުން ވަގުތުން ދެއްކުމަކީވެސް މަނާކަމެކެވެ. އަދި ސަބްލައިސެންސް ދައްކާފައިވާ ފަރާތްތަކުގެ ފީޑް ބޭނުން ކޮށްގެން ޕަބްލިކް ސްކްރީނެއްގައި ޢާއްމުންނަށް ހުޅުވާލައިގެން ފީފާ ވޯލްޑް ކަޕް ގެ މެޗުތައް މީޑިއާނެޓްގެ ހުއްދަނެތި ލައިވްކޮށް ބްރޯޑްކާސްޓް ކުރުމަކީ ވެސް މަނާކަމެކެވެ." މީޑިއާނެޓުން ނެރެފައިވާ ލިޔުމުގައި ވެއެވެ.

ވުމާއެކު މީޑިއާނެޓް ގެ ހުއްދަނެތި އެއްވެސް މީޑިއަމެއް ބޭނުން ކޮށްގެން ފީފާ ވޯލްޑް ކަޕްގެ މެޗުތައް ލައިވް ކުރުމަކީ މަނާ ކަމެއް ކަމަށާ، އަދި އެއީ ފީފާގެ ގަވާއިދުތަކާއި، ބައިނަލްއަގުވާމީ ގާނޫނުތަކާއި، ރާއްޖެއިން ބައިވެރިވެފައިވާ މުއާހަދާ ތަކާއި ޚިލާފް ކަމަކަށް ވުމުގެ އިތުރުން އެއީ ރާއްޖޭގެ ގާނޫނު ތަކާއިވެސް ޚިލާފް ކަމެއް ކަމަށް މީޑިއާނެޓުން ހާމަކޮށްފައިވެއެވެ. 
އަދި އެފަދައިން އެއްވެސް ފަރާތަކުން އަމަލުކޮށްފިނަމަ އެފަރާތްތަކާއި މެދު ގާނޫނާއި އެއްގޮތަށް ފިޔަވަޅު އަޅާނެ ކަމަށް މީޑީއާނެޓުން އިންޒާރު ދީފައިވެއެވެ.

މީޑިއާ ނެޓުގެ މި އިންޒާރުގެ މެސެޖާއި ގުޅިގެން ވަރަށް ގިނަ ފުޓުބޯޅަ އަށް ލޯބި ކުރާ މީހުން ވަނީ މީޑިއާނެޓް ބޯއިކޮޓް ކުރަންޖެހޭ ކަމަށް ގޮވާލައި ނުރުހުން ފައުޅުކޮށްފައެވެ.

އެ މައްސަލާގައި މީޑިއާ ނެޓުން މިހާރު ބުނެފައިވަނީ، ބޮޑު ސްކްރީނުގައި ވޯލްޑް ކަޕް ދެއްކުމަށް އެއްވެސް ހުރަހެއް ނާޅާނެ ކަމަށާ، އެހެންނަމަވެސް އެކަން ވިޔަފާރި އުސޫލުން ކުރުމަކީ މަނާ ކަމެއް ކަމަށެވެ. އަދި ބޮޑު ސްކްރީނުން ވޯލްޑްކަޕް ދައްކާއިރު ކުޅިވަރުގެ ރޫހާ ޚިލާފުނުވާހެން އެކަން ކުރެވޭނެކަމަށް އެ ކުންފުނިން ބުންޏެވެ. އަދި ފީފާއިން އެ ކަމުގައި އަންގައިފައިވާ ގޮތަށް އެކަން ކުރުމަކީ މުހިންމު ކަމެއްކަމަށް މިޑީއާ ނެޓުން ބުންޏެވެ.