ލީގުގައި ބާކީހުރި މެޗުތައް ނުކުޅެން ކުލަބް ވެލެންސިއާ އިން ނިންމައިފި

ގިނަ ދުވަސްތަކެއް ވަންދެން ލީގުގެ ކުޅުން މެދުކަނޑާލާފައި އޮތުމަށް ފަހު މާދަމާ އަލުން ފަށާއިރު، ލީގުގައި ބަކީ ހުރި މެޗުތަކުގައި ބައިވެރިވެވެން ނެތްކަމަށް ކުލަބް ވެލެންސިއާ އިން އެފްއޭއެމަށް އަންގައިފި އެވެ.

ކުލަބް ވެލެންސިއާ އިން މިއަދު ނެރެފައި ވާ ބަޔާނެއްގައި ވާގޮތުން ގިނަ ސަބަބުތަކާއި ހުރެ ދިވެހި ޕްރެމިއާ ލީގުގައި ބާކީ ހުރި މެޗުތައް ފުރިހަމަ ނުކުރެވޭނެ ވާހަކަ އެކުލަބުން ވަނީ ފުޓްބޯޅަ އެސޯސިއޭޝަން އާއި ހިއްސާކޮށްފައެވެ. އަދި އެކުލަބުން މިފަދަ ނިންމުމެއް ނިންމަން ޖެހުނު އެންމެ ބޮޑު ސަބަބަކީ މާލީ ގޮތުން އެކުލަބަށް ގިނަ ދަތިތަކެއް ކުރިމަތިވެފައިވާތީ ކަމަށް އެ ބަޔާނުގައި ވެއެވެ.

މީގެ އިތުރުން އަވަސް އަވަހަށް ލީގު ތާވަލު ބަދަލުވެ، ފުޓްބޯޅަ ސީޒަން ދިގުދެމިގެން ގޮސްފައިވާތީ މާލީގޮތުން ފުއްދުންތެރިކަމެއް ނެތި އިތުރު މެޗުތަކެއް ކުޅެން ވެއްޖެނަމަ އެކަމުގެ ސަބަބުން މި ކުލަބަށް ލިބިދާނެ ގެއްލުންތަކުން ދުރާލައި ރައްކާތެރިވުމުގެ ގޮތުން އެކުލަބުން ނިންމި ނިންމުމެއް ކަމުގައި އެ ބަޔާނުގައި ވެއެވެ.

ލީގުގައި ވެލެންސިޔާ އިން މިހާތަނަށް 9 މެޗު ކުޅެފައިވާއިރު އެޓީމަށް ލިބިފައިވަނީ 2 ޕޮއިންޓެވެ. އަދި އެޓީމު މިވަގުތު އޮތީ 8 ޓީމު ހިމެނޭ ލީގު ތާވަލުގެ ފުލުގައެވެ.