"އިންޑިއާއިން ނަގާ ލޯނުތަކުގެ އިންޓަރެސްޓު ރޭޓުތައް ގަވަރުނަރަށްވެސް އެނގިވަޑައިނުގަންނަވާ"

އިންޑިއާއިން ނަގަމުންދާ ލޯނުތަކުގެ އިންޓަރެސްޓު ރޭޓުތަކަކީ ކޮބައިކަން މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީގެ ގަވަރުނަރު އަލީ ހާޝިމަށް ވިދާޅުވެނުދެއްވުނުކަމަށް އިދިކޮޅު އިއްތިހާދުން މިއަދު ބުނެފިއެވެ.

ދައުލަތުގެ ރިޒާވްގައި ކާޑުގެ ބާވަތްތައް ގަންނާނެ ފައިސާނެތި، ރިސާވް ހުސްވެ، ރައްޔިތުން ބަނޑަށް ޖެހިދާނެ ކަމުގެ ބިރުހީވާ ކަމަށް ބުނެ، އިދިކޮޅު އިއްތިހާދުގެ ލީޑަރުން މަރުކަޒީ ބޭންކުގެ ގަވަރުނަރާ ބައްދަލުކުރެއްވުމަށްފަހު ނޫސްވެރިންނާއި ބައްދަލު ކުރައްވައި ވާހަކަ ދައްކަވަމުން އިދިކޮޅު އިއްތިހާދުގައި ހިމެނޭ ޕީޕަލްސް ނޭޝަނަލް ކޮންގުރެސް (ޕީއެންސީ)ގެ ރައީސް ޢަބްދުއްރަޙީމް ވިދާޅުވީ މިއަދު ގަވަރުނަރާއެކު ހޭދަކުރެއްވި ކުޑަ ވަގުތުކޮޅަށްފަހު، ގައުމުގެ ހާލަތާއި މެދު ހުރި ކަންބޮޑުވުންތައް އިތުރު ވެއްޖެކަމަށެވެ.

"އަޅުގަނޑުމެން މިތަނުގައި ހޭދަކުރި ވަގުތުކޮޅަށްފަހު މި ނިކުންނަނީ އައިއިރަށްވުރެ ގިނަ ކަންބޮޑުވުންތަކާއެކު. އެއީ އަޅުގަނޑުމެންނަށް ބޭރު ތެރެއިން އިވޭ އަޑުތަކަކީ ހަގީގީ އަޑުތަކެއްކަން މިވީ ކުޑަ ވަގުތުކޮޅުގެ ތެރޭގައި އެނގިގެން ދިއުމުން،" ޢަބްދުއްރަޙީމް ވިދާޅުވިއެވެ.

އަދުރޭ ވީދާޅުވީ، ރާއްޖޭގެ އިގްތިސާދާއި ގުޅިގެން އިދިކޮޮޅުގެ ހުރި ކަންބޮޑުވުންތަކުގެ ހައްލުވެސް ގަވަރުނަރަށް ވިދާޅުވެ ނުދެއްވުނު ކަމަށެވެ. އަދި އޭއާއި އެކު އެންމެ ބޮޑަށް ކަންބޮޑުވާންޖެހުނު ސަބަބަކީ އިންޑިއާއިން ނަގަމުންދާ ބޮޑެތި ލޯނުތަކުގެ އިންޓަރެސްޓު ރޭޓުތައް ފަދަ ތަފުސީލުތައް ޚުދު ގަވަރުނަރަށްވެސް އެނގިވަޑައިނުގެންނެވުން ކަމުގައި އޭނާ ވިދާޅުވި އެވެ.

"އެއަށްވުރެ ބޮޑަށް ކަންބޮޑުވާން މިޖެހުނީ، މި އިންޑިއާ އިން މިނަގާ ލޯނު ތަކުގެ އިންޓްރެސްޓް ރޭޓެއް، އެޔެއް އެއްވެސް އެއްޗެއް ޚުދު ގަވަރު ނަރަށަްވެސް އެނގިވަޑައިނުގަންނަވާ. މިއީ މޯލްޑިވްސް މަނިޓަރީ އޮތޯރޮޓީ، ސެންޓްރަލް ބޭންކް މިތަނަކީ. މިތަނުގައި ހުންނަ އެންމެ އިސްވެރިޔަކަށް މިމީހުން [ސަރުކާރު] ހިންގާ މާލީ މުއާމަލާތްތަކުގެ ތަފުސީލު ނޭނގުމަކީ ހަގީގަތުގައި ދިވެހި ރައްޔިތުން ވަރަށް ބޮޑަށް ކަންބޮޑުވާންޖެހޭ ކަމެއް. އަޅުގަނޑުމެން މިއަދު މިތިބީ ކޮންފަދަ ހާލަތެއްގައި ކަމެއްވެސް ނޭނގެ" އަދުރޭ ވިދާޅުވިއެވެ.

އަދި މާލީ ހާލަތު އޮތް ގޮތާމެދު ގަވަރުނަރު ވިދާޅުވީ ކުރިއަށް އޮތް 20 ވަރަކަށް ދުވަހު ހިފަހައްޓައިލެވިދާނެކަމަށް ކަމަށާއި، މިހާރު ފާސްކޮށްފައިވާ 2023 ވަނަ އަހަރުގެ ބަޖެޓާމެދު، ވަރަށް ބޮޑު ކަންބޮޑުވުންތަކެއް ހުރި ކަމަށާ، އެކަމާއި ގުޅިގެން އެމްއެމްއޭއިން ހިއްސާކުރި ކަންބޮޑުވުންތަކަށް ބަޖެޓު ފާސްކުރުމުގައި ރިއާޔަތްކޮށްފައިނުވާކަމަށްވެސް ގަވަރުނަރު ވިދާޅުވިކަމުގައި އަދުރޭ ވިދާޅުވިއެވެ.

އެހެންކަމުން އެ ބައްދަލުވުމުންވެސް އެނގިގެންދިޔައީ ސަރުކާރާއި މެދު ރައްޔިތުން ކުރަމުންއައި ޝަކުވާތައް ކުރިއަށް ވުރެވެސް ބޮޑަށް ކުރުމުގެ ޖާގައެބައޮތް ކަމަށްވެސް އަދުރޭ ވިދާޅުވިއެވެ.

ޢަބްދުއްރަޙީމް ވިދާޅުވީ ގަވަރުނަރުގެ ވާހަކައިން އެނގުނުކަމަކީ މިނިވަންކަމާއެކު ޤާނޫނުން މަރުކަޒީ ބޭންކާ މަތިކޮށްފައިވާ މަސައްކަތްތައް ކުރުމަށް ބޭނުންވާ ޖާގައެއް އަދި އެކަމަށް ބޭނުންވާ މައުލޫމާތެއްވެސް މަރުކަޒީ ބޭންކަށް ލިބިފައި ނެތްކަންކަމަށާއި، އެހެންކަމުން ގަވަރުނަރަށް އެންމެ ރަނގަޅު ގޮތަކަށްވާނީ މަޤާމުން އިސްތިއުފާދެއްވުންކަމަށް ދެކެވަޑައިގަންނަވާ ކަމަށެވެ.