މާލެސިޓީ ކައުންސިލްގެ ޤުރުއާން އަދި މަދަޙަ މުބާރާތުގައި ބައިވެރިވުމުގެ ފުރުޞަތު ހުޅުވާލަނީ

ރަމަޟާން މަހަށް ޚާއްސަކޮށް މާލެސިޓީ ކައުންސިލުން ކުރިއަށް ގެންދާ ޤުރުއާން އަދި މަދަޙަ މުބާރާތުގައި ބައިވެރިވުމުގެ ފުރުޞަތު ހުޅުވާލުމަށް ނިންމައިފިއެވެ.

ދެ މުބާރާތުގައި ބައިވެރި ވުމުގެ ފުރުޞަތު ހުޅުވާލުމަށް ނިންމާފައިވަނީ މާލެސިޓީ ކައުންސިލްގެ 80 ވަނަ ރަސްމީ އާއްމު ޖަލްސާގައެވެ. ޤުރުއާން އަދި މަދަޙަ މުބާރާތުގެ ޤަވާއިދާ އެކު އަންނަ ހަފްތާގައި މި ދެ މުބާރާތުގައި ބައިވެރިވުމުގެ ފުރުޞަތު ހުޅުވާލެވިގެން ދާނެއެވެ.

މުބާރާތާއި ގުޅޭގޮތުން ވާހަކަފުޅު ދައްކަވަމުން މޭޔަރު މުޢިއްޒު ވިދާޅުވީ ފާއިތުވި ރަމަޟާންމަހު ފެށިގެންދިޔަ މި ދެ މުބާރާތަށް ވަރަށްގިނަ ބެލެނިވެރިންނާއި، ކުދިންގެ ބޮޑު ތަރުޙީބެއް ލިބިގެން ދިޔަކަމަށެވެ. އެހެންކަމުން މިއަހަރުގެ ރަމަޟާން މަހު ބޭއްވުމަށް ނިންމާފައިވާ މުބާރަތަކީ ކުރީ އަހަރުގެ މުބާރާތުން ލިބުނު ތަޖުރިބާގެ އަލީގައި އަދި ބެލެނިވެރިންގެ ފަރާތުން ފާހަގަކުރި ކަންކަމަށް ރިޢާޔަތްކޮށް ރަނގަޅުކުރަންޖެހޭ ކަންކަން ރަނގަޅު ކުރުމަށްފަހު ނިމިދިޔަ އަހަރަށްވުރެ ފުރިހަމައަށް ކުރިއަށް ގެންދެވޭނެ މުބާރާތަކަށް ވެގެންދާނެ ކަމަށެވެ.

”އަޅުގަނޑުމެން ވިސްނާފަ މިއޮތީ މި އަންނަ ހަފްތާގައި ފުރުޞަތު ހުޅުވާލަން. އިދާރީ ކަންކަން ވެސް ކުރީފަހަރަށްވުރެ ރަނގަޅަށް ބެލެހެއްޓޭ ގޮތަށް. މަދަޙަ އާއި ޤުރުއާން މުބާރާތުގެ ކިޔެވުންތަކުގެ ރެކޯޑިންވެސް ރަމަޟާން މަސް އަންނަން ވާއިރަށް ނިންމާ، މުލަ ރޯދަ ދުވަހުން ފެށިގެން ޓީވީ ތަކުން ފެންނާނެ ހެން ތާވަލެއްގެ ތެރެއިން ކުރިއަށް ގެންދިއުމަށް.“ ޑރ. މުޢިއްޒު ވިދާޅުވިއެވެ.

މޭޔަރު ވިދާޅުވީ މި މުބާރާތުގެ ނަތީޖާ ފާޅުކުރުމުގެ ކަންކަންވެސް ރަމަޟާން މަސް ނިމުމާއިއެކު ލަސްތަކެއްނުވެ ކުރިއަށް ގެންދެވޭނެ ކަމަށެވެ.

މުބާރާތާއި ގުޅޭގޮތުން ޑެޕިއުޓީ މޭޔަރު އަހުމަދު ނަރީޝް ވިދާޅުވީ ފާއިތުވި އަހަރުގެ މުބާރާތަކީ ވަރަށްބޮޑު ތަރުޙީބެއް ލިބިގެން ދިޔަ މުބާރާތެއް ކަމަށާއި، ދުރާލާ ފުރުޞަތު ހުޅުވާލުމުން ގިނަ ކުދިންނަށް މުބާރާތުގައި ބައިވެރިވުމުގެ ފުރުޞަތު ފަހިވެގެން ދާނެ ކަމަށެވެ.

މި ދެ މުބާރާތުގައި ބައިވެރިވުމުގެ ފުރުޞަތު ހުޅުވާލެވޭއިރު، މުބާރާތާއި ގުޅޭ އުސޫލާއި ޤަވާއިދު އަދި ބައިވެރިވުމަށް އެދޭ ފޯމް މާލެ ސިޓީ ކައުންސިލްގެ ރަސްމީ ވެބްސައިޓުން ޑައުންލޯޑް ކުރެވެން ހުންނާނެއެވެ.

މާލެ ސިޓީ ކައުންސިލްގެ ފުރަތަމަ މަދަޙަ އަދި ޤުރުއާން މުބާރާތުން ވަނަ ވަނަ އައި ފަރާތްތަކަށް ވަނީ އަގު ހުރި އިނާމު ހަވާލުކޮށްފައެވެ. މާލެ ސިޓީ ކައުންސިލްގެ ފުރަތަމަ ޤުރުއާން މުބާރާތުގައި 293 ކުދީން ވަނީ ބައިވެރިވެފައެވެ. އަދި މަދަޙަ މުބާރާތުގައި 134 ކުދީން ބައިވެރިވިއެވެ.

މިއިން ކޮންމެ އުމުރުފުރާއެއްގައި އެތައް ދަރިވަރުންނެއް ވާދަކުރި އިރު މި ކުދީންނަށް އިންސާފުކޮށްދިނީ ރާއްޖޭގައި މި ރޮނގުން ފާހަގަކޮއްލެވޭ ފަނޑިޔާރުންނެވެ.