ޕޮލިސް ކޮމިޝަނަރުގެ މަގާމަށް ކުރިމަތިލުމަށް ހުޅުވާލައިފި

ހުސްވެފައިވާ ކޮމިޝަނާ އޮފް ޕޮލިސްގެ މަގާމަށް ކުރިމަތިލުމަށް ފުރުސަތު ހުޅުވާލައިފިއެވެ.

މިކަން އިޢުލާންކޮށް، ހޯމް މިނިސްޓްރީން ކުރި އިއުލާނެއްގައި ބުނީ އެސިސްޓެންޓް ކޮމިޝަނަރުގެ ރޭންކުން ފެށިގެން މަތީގެ ރޭންކްތަކުގައި މިވަގުތު ތިއްބެވި އޮފިސަރުުންގެ ތެރެއިން ޕޮލިސް ކޮމިޝަނަރުކަމަށް ޝައުގުވެރިވާ ބޭފުޅުންނަށް ފުރުސަތު ހުޅުވާލައިފައިވާ ކަމަށެވެ.

އެގޮތުން އެ މަގާމަށް ކުރިމަތިލުމުގެ ސުންގަޑިއަކީ މި މަހުގެ 19 ވަނަ ދުވަހުގެ މެންދުރު 12:00 ކަމަށްވެސް ބުނެފައިވެއެވެ.

ގާނޫނުގައި ވާގޮތުން ކޮމިޝަނަރު އައްޔަންކުރާނީ އެމަގާމަށް ކުރިމަތިލާ ފަރާތްތަކާ ޕޮލިސް ބޯޑުން އިންޓަވިއުކޮށް، ހޯމް މިނިސްޓަރަށް ހުށަހަޅާ ނަންތަކުގެ ތެރެއިން، ހޯމް މިނިސްޓަރގެ ލަފާގެމަތިން ރައީސުލްޖުމްހޫރިއްޔާއެވެ.

އަދި ޕޮލިސް ކޮމިޝަނަރު ޢައްޔަންކުރެވޭނީ 4 އަހަރުދުވަހުގެ ދައުރަކަށެވެ.

ޕޮލިސް ކޮމިޝަނަރުގެ މަގާމުގައި ހުންނެވި މުހައްމަދު ހަމީދު ރިޓަޔާ ކުރެއްވުމާއި ގުޅިގެން ނޮވެމްބަރުގެ މަހުގެ 15 އިން ފެށިގެން އެ މަގާމު ވަނީ ހުސްވެފައެވެ.

އެހެންކަމުން މިވަގުތު އެކްޓިންގ ޕޮލިސް ކޮމިޝަނަރުގެ މަގާމު ފުރުއްވަމުން ގެންދަވަނީ އެސިސްޓެންޓް ކޮމިޝަނަރު ފަރުހާދު ފިކުރީއެވެ.