ކޮތަޅު ފީގެ ގޮތުގައި ދައުލަތަށް 11 މިލިއަން ރުފިޔާ

ޕްލާސްޓިކް ކޮތަޅު ފީގެ ގޮތުގައި މިދިޔަ ނޮވެމްބަރު މަހުގެ ނިޔަލަށް ދައުލަތަށް 11.8 މިލިއަން ރުފިޔާ ލިބިއްޖެ އެވެ.

މޯލްޑިވްސް އިންލަންޑް ރެވެނިއު އޮތޯރިޓީ (މީރާ)ގެ ތަފާސްހިސާބުތަކުން ދައްކާ ގޮތުން މިދިޔަ ނޮވެމްބަރ މަހު އެކަނިވެސް ޕްލާސްޓިކް ކޮތަޅުގެ ފީ އިން ދައުލަތަށް 996،997 ރުފިޔާ ވަނީ ލިބިފައެވެ.

މިއީ އޮކްޓޯބަރ މަހާއި އަޅާ ބަލާއި އިރު ދަށް އަދަދެކެވެ. އެގޮތުން އޮކްޓޯބަރ މަހު 2.5 މިލިއަން ކޮތަޅު ފީ އިން ލިބިފައިވާއިރު ސެޕްޓެމްބަރު މަހު ލިބުނީ 484،246 ރުފިޔާ އެވެ.

ކުނި މެނޭޖުކުރުމުގެ ގާނޫނަށް އިސްލާހު ގެނެސް މިއަހަރުގެ އޭޕްރީލް މަހުން ފެށިގެން ޕްލާސްޓިކް ކޮތަޅުން 2 ރުފިޔާގެ ފީއެއް ނަގަން ފެށުމާއެކު އޭގެ ޖެހިގެން އައި މޭ މަހުގެ ނިޔަލަށް އެކަނިވެސް 1.1 މިލިއަން ރުފިޔާ ދައުލަތަށް ލިބުނެވެ.

ނަމަވެސް އެ ގާނޫނަށް ގެނެވުނު އިސްލާހު ގެ ސަބަބުން ޑަބަލް ޓެކްސް ދެފަހަރު ނޫނީ ތިން ފަހަރު ޓެކްސް ނެގެއެވެ. އެގޮތުން، ކޮތަޅު ބޮނޑި ގަންނަ ފަރާތްތަކުން ހޯލްސޭލް ރޭޓުގައި ކޮތަޅު ބޮނޑި ގަތަސް އެ ބޮނޑީގެ އަގުގެ އިތުރުން އެ ބޮނޑީގައިވާ ކޮންމެ ކޮތަޅަކަށް ދެ ރުފިޔާގެ ފީއެއް ދައްކަން ޖެހެ އެވެ.

މިގޮތަށް ދިމާވީ ކުނި މެނޭޖުކުރުމުގެ ގާނޫނުގެ ބިލް އިސްލާހު ކުރިއިރު، ޕްލާސްޓިކް ކޮތަޅުން ފީ ނެގުމުން އިސްތިސްނާވާ ހާލަތްތަކުގެ ތެރޭގައި 50 ނުވަތަ އެއަށްވުރެ ގިނަ ޕްލާސްޓިކް ކޮތަޅު ހިމެނޭ ކޮތަޅު ބޮނޑި ހިމަނާފައިވާ ނުވާތީއެވެ. އެހެންކަމުން އެބައި އިސްލާހު ކުރުމަށް މަޖިލީހަށް ހުށަހެޅި މަސައްކަތް ވަނީ ފެށިފައެވެ.