އާރޓް ގެލެރީ ބަންދުކޮށްފައި ހުންނަތާ ގިނަދުވަސް ވާތީ އާޓިސްޓުން ކަންބޮޑުވުން ފާޅުކޮށްފި
ނޭޝަނަލް އާރޓް ގެލެރީ މަރާމާތަށް ބަންދުކޮށް، ވަރަށް ގިނަ ދުވަސްތަކެއް ވަމުންދާތީ, 'މޯލްޑިވިއަން އާރޓިސްޓް ކޮމިއުނިޓީ'އިން ކަންބޮޑުވުން ފާޅުކޮށްފިއެވެ.
އެ ޖަމްޢިއްޔާއިން ކަންބޮޑުވުން ފާޅުކޮށް ނެރުނު ބަޔާނެއްގައި ބުނީ، އާރޓް ގެލެރީ ގިނަ ދުވަސްތަކެއްވަންދެން ބަންދުކުރެވިފައި ހުރުމުން ރާއްޖޭގެ ގިނަ ޕްރޮފެޝަނަލް ވިޝުއަލް އާޓިސްޓުންނަށް އެކަމުގެ ދަތިތައް ކުރިމަތިވަމުންދާކަމުގެ މަޢުލޫމާތު އެ ޖަމްޢިއްޔާއަށް ލިބިފައި ވާކަމަށެވެ.
މި ބަންދާއި ގުޅިގެން އެ ޖަމްޢިއްޔާގެ ފަރާތުން ރާވާ ހިންގަން ހުރި ގިނަ އާރޓް އިވެންޓްތައްވެސް ނުބޭއްވި ގިނަ ދުވަސްތަކެއް ވަމުންދާކަން ފާހަގަ ކުރަމުން އެ ޖަމިއްޔާ އިން ބުނީ ޚާއްސަކޮށް ގިނަ ހުނަރުވެރި ޒުވާނުން ބައިވެރިވާ އެގްޒިބިޝަންތައް ނުބޭއްވި ލަސްވަމުންދާ ކަމަށެވެ. އަދި އެއީ ރާއްޖޭގެ އާރޓްގެ ދާއިރާއަށް ލިބޭ ވަރަށް ބޮޑު ނިކަމެތި ކަމެއް ކަމަށެވެ.
"ނޭޝަނަލް އާރޓް ގެލެރީ މަރާމާތައް ގިނަދުވަސްތަކެއް ބަންދުކޮށްފައި ހުރުމުން ކަމާބެހޭ ފަރާތްތަކާ ވަރަށް ގިނަފަހަރު ވާހަކަ ދަކެވި މަޝްވަރާ ކުރެވުނު. މިނިސްޓަރ އޮފް އާރޓްސް ކަލްޗަރ އެންޑް ހެރިޓޭޖް ޔުމްނާ މައުމޫން އާއި މިނިސްޓްރީގެ ބައެއް ސިޔާސީ މާގާމުތަކުގައި ތިންބެވި ބޭފުޅުންނާއި އަދި އެން.ސީ.އޭގެ ބައެއް ބޭފުޅުންނާއި މީގެކުރިން އެތައްފަހަރު ވާހަކަދެކެވުނު،" އެ ޖަމިއްޔާގެ ބަޔާނުގައި ވެއެވެ.
ނަމަވެސް މި ހިނގާ 2023 ފެށިގެން ދާއިރުވެސް އެކަމަށް އެދެވޭ ނަތީޖާއެއް ނުލިބޭ ކަމަށް އާޓިސްޓުން ފާހަގަ ކުރިއެވެ.
އެހެންކަމުން، ވީހާވެސް އަވަހަށް ނޭޝަނަލް އާރޓް ގެލެރީ ހުޅިވި، އާޓިސްޓުންނަށް ތަނުގެ ބޭނުން ހިފަން ފުރުސަތު ލިބުމަށް އުންމީދު ކުރާ ކަމަށް އާޓިސްޓުންގެ ޖަމިއްޔާއިން ބުންޏެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
